Read luo Rapar mar Chik 20 Bible Online

Rapar mar Chik 20 - luo bible

Rapar mar Chik 20

¹“Kudhi kedo gi wasiku, muneno ogandagi ka duong’ moloyo maru, kendo nigi farese kod geche lweny, to kik uluorgi, nimar Ruoth Nyasaye ma Nyasachu ma nogolou Misri ni kodu.

²Ka uchiegni rado kodgi, to jadolo nowuogi e nyim ogandau mar lweny,

³kendo nowach niya, ‘Un jo-Israel, winjuru, kawuono uyuoro machiegni mondo uked gi wasigu. Kik chunyu nyosre, kendo kik uluor. Kibaji bende kik gou kuneno wasikugo,

⁴nikech Ruoth Nyasaye ma Nyasachu ema dhi kodu, mondo okednu, kendo olonu wasigu.’

⁵Jodongo bende nowach ni jolweny niya, ‘Ka ng’at moro kuomu osegero ot manyien, to pok orwako, onego odog dala, nimar dipo ka otho e lweny, mi ng’at machielo ema orwako odno.

⁶Kata ng’at mosepidho mzabibu, to pok ochamo olembgi, bende onego odog dala, nimar dipo ka otho e lweny, mi ng’at moro nono ema ochamo olembego.

⁷To bende ka nitie ng’ato mosenywomo nyako, to pok okawo, onego odog dala, nimar dipo ka otho e lweny, mi ng’at moro ema okawo chiege.’

⁸Jodongo nomed wuoyo gi jolweny, kawacho niya, ‘Bende kapo ni nitie ng’ama luor, kata ma chunye onyosore, to onego odog dala nikech dipo ka omiyo jowetene obedo maluor ka en.’

⁹Ka jodongo osetieko wuoyo, eka noket jotend lweny.

¹⁰“Kuchopo machiegni gi dala mudhi kedogo, to penjuru jodalano ka gidwaro timo kodu winjruok mar kue.

¹¹Ka giyie timo kodu winjruok, mi giyawonu dhoranga dala, to nyaka uchun ji duto munwang’o dalano e mondo otinu.

¹²To ka gidagi timo kodu winjruok, mi gichako kedo kodu, to lworuru dalano,

¹³kendo ka Ruoth Nyasaye ma Nyasachu okete e lwetu, to nyaka uneg chwo duto man kanyo.

¹⁴To unyalo kawo mon gi nyithindo, kendo yako jamni kod gik moko duto manie dalano, mi ukonyru gi gik ma Ruoth Nyasaye oseketo e lwetugo kaka uhero.

¹⁵Timuru kamano ni mier duto man mabor gi pinyu, mak mana miech ogendini mokiewo kodu ema kik utimnigi kamano.

¹⁶To e miech ogendini ma Ruoth Nyasaye ma Nyasachu biro miyougo, kik uweyee kata gimoro achiel ka ngima.

¹⁷Jo-Hiti gi jo-Amor gi jo-Kanaan gi jo-Perizi gi jo-Hivi kod jo-Jebus, nyaka utiek chuth, kaka Ruoth Nyasaye ma Nyasachu osechiko.

¹⁸Timuru kamano mondo kik gipuonju luwo timbegi makuero ma gitimo ni nyisechegi, nimar timbe ma kamago gin richo e nyim Ruoth Nyasaye ma Nyasachu.

¹⁹“Ka uselworo dala moro kuom kinde malach mondo ukaw, to kik utong’ yiend dalano mi ukethi. Unyalo mana chamo olembgi, to kik utong’gi, nimar yath ok en dhano ma unyalo kedogo.

²⁰To unyalo ng’ado kata tong’o yien ma ung’eyo ni olembgi ok cham, mi ugergo raidhi kod gi lweny mamoko mondo umonjgo dala mukedogo nyaka ukaw.