Read luo Rapar mar Chik 21 Bible Online

Rapar mar Chik 21 - luo bible

Rapar mar Chik 21

¹“Ka oyud ringre ng’at motho ka oriere e pap e piny ma Ruoth Nyasaye ma Nyasachu dwaro miyou, to ng’at monege ok ong’e,

²jodongu gi jou ma jong’ad bura nyaka dhi opim bor mae kind kama ringruokne nitie, gi miech gweng’no, mondo ong’e ni ere dala machiegni gi kanyo.

³Jodong dala machiegni gi ringruokno nyaka yier nyaroya ma pok otiyo tich moro kata ma pok oywayo jok.

⁴Ginikele e holo moro ma ok pur man gi aora ma ok dwon, kendo ginitur ng’ute kanyo.

⁵Jodolo ma jo-Lawi bende nyaka bedie, nikech Ruoth Nyasaye ma Nyasachu oseyierogi mondo gitine, kendo giguedh ji e nyinge. Gin ema omigi tich ng’ado buche ma ji laroe gimoro, kod buche goruok duto.

⁶Bang’e jodongo duto mag dala machiegni gi ringruokno nyaka log lwetgi kuom nyaroya mosetur ng’ute e holo cha,

⁷ka giwacho niya, ‘Wan ne ok wachuero remoni, kata ng’at ma nochuere bende ne ok waneno.

⁸A Ruoth Nyasaye, yie iwe richo mag jogi Israel ma isewaro, kendo kik iyie mondo remo ma onge gi ketho mien-gi.’ Kamano ginipuodhre kuom richo mar chuero remono.

⁹Mano e kaka unugol remo ma onge gi ketho kuomu, kutimo gima ber ma Ruoth Nyasaye dwarono.

¹⁰“Kusekedo gi wasiku, mi Ruoth Nyasaye ma Nyasachu oketogi e lwetu, kendo umako jomoko udhigo,

¹¹mi ng’ato kuomu oneno dhako moro ma jaber kuomgi ma doher mondo okendi,

¹²to onyalo kawe akawa, motere dala. Bang’ mano noliel wiye, mi ong’ad koke,

¹³kendo olony lewni mane omakego. Dhakono nodag e dala ng’atno koywago min gi wuon kuom due ngima, eka ng’atno nyalo loke dhako.

¹⁴To kapo ni bang’e ojok kode, to onyalo weye odhi kuma ohero. To ok nong’iewe gi ng’ato, kata loke misumba, nikech oseriwore kode.

¹⁵“Ka ng’ato nigi mon ariyo, ma achiel ohero, to machielo ok ohero, to dhako ma ok oherono ema onywolone wuowi makayo,

¹⁶kendo kinde modwaro lamo nie yawuowi ochopo, to kik okaw wuod dhako moherono ka wuode makayo kar wuod dhako ma ok ohero, ma adier e wuowi makayo.

¹⁷Nyaka omi wuode makayo duong’ne mar nywol, kopogone pok nyadiriyo moloyo yawuote mamoko, kata dabed ni en wuod dhako mocha kamano, nimar en e wuode motieko wuowine, omiyo duong’ mar nywol en mare.

¹⁸“Kapo ni ng’ato nigi wuowi ma wiye tek kendo ma achach, ma ok nyal winjo jonywolne, kata da gikume,

¹⁹to nyaka gimake, mi gitere e nyim jodongo e dhoranga dala.

²⁰Giniwach ni jodongo niya, ‘Wuodwani wiye tek, kendo en achach. Ok otim gima wawachone, bende timbene richo kendo ojamer.’

²¹Eka jodalano duto nyaka goye gi kite nyaka otho. Mano e kaka unupodhru kuom richo ma kamano, mi jo-Israel duto nowinj wachno, kendo nobed maluor.

²²“Ka oseng’ad ni ng’ato buch tho, mi onege, kendo olier ringre e yath,

²³ to ringreno kik we kanyo otienono duto. Nyaka yike chieng’ onogo, mondo kik uketh piny ma Ruoth Nyasaye ma Nyasachu biro miyou ka mwanduu, nikech ng’at molier e yath okuong’ e nyim Nyasaye.