Read luo Rapar mar Chik 22 Bible Online

Rapar mar Chik 22 - luo bible

Rapar mar Chik 22

¹ “Kineno dher wadu moro kata rombone ka ringo lal, kik iweye to nyaka igeng’e, mi idwoke ni wuon-go.

²Kopo ni wuon-go ok jagweng’u, kata ka ok ing’eye, to nyaka iter chiayono e dalani, kendo irite nyaka wuon-go nwang’e kuomi, eka idwoknego.

³Nyaka itim kamano ni kanj wadu, kata ni lawe, kata ni gimoro amora molalne, to kik iweye orweny.

⁴Kineno kanj wadu moro kata dhere kopodho e yo, to kik iwe mak ikonyo wuon-go chunge.

⁵“Dhako kik rwakre ka dichwo, dichwo bende kik rwakre ka dhako, nimar joma otimo kamano okwedi e nyim Ruoth Nyasaye ma Nyasachu.

⁶“Kapo ni iyudo od winyo man gi nyithindo kata tong’ e yath manie dir yo, kata man piny e lowo ka min-gi butnoe, to kik ikaw min-gi kaachiel gi nyithinde.

⁷Nyaka iwe min-gi dhi, to ikaw mana nyithinde kende. Kamano inibed maber kendo nidag aming’a.

⁸“Ka igero ot, to nyaka iriw rageng’ e lak tado gi yo ka oko, mondo kik ng’ato podhi koa ewi tatino, mi kel bura mar remo kuom odi.

⁹ “Kik ipidh kodhi moro amora e puothi mar mzabibu, nimar kitimo kamano, to gik ma kodhino onyago, kaachiel gi olembe mag mzabibu nyaka chiw ni Ruoth Nyasaye.

¹⁰“Kik ipur gi dhiang’ kod kanyna e kwer achiel.

¹¹“Kik irwak law molos gi usi mar yie rombo mokik gi usi mar katana.

¹² “Nyaka iket usi momin e konde ang’wen mag lawi mar abola.

¹³“Ka ng’ato okendo chiege, to bang’e ojok kode,

¹⁴mi ohangone wach kendo oketho nyinge, kowacho ni nokawe to ok oyude gi ringre,

¹⁵to jonywol nyakono nyaka dhi ir jodongo e dhoranga dala, ka gitero gima nyiso ni nyargino ne nigi ringre.

¹⁶Eka wuon nyako nowachni jodongo niya, ‘Namiyo ng’atni nyara mondo okendi, to koro ojok kode,

¹⁷omiyo osehangone wach, kendo oketho nyinge kowacho ni ne ok oyude gi ringre. To kata kamano ma e gima nyiso ni nyara ne nigi ringre.’ Bang’ mano, noyar law mane oywego ringre nyakono e nyim jodong dala.

¹⁸Jodongogo nyaka chwad ng’atno,

¹⁹kendo goye faini pesa moromo fedha mia achiel mondo omi wuon nyako, nikech ng’atno oseketho nying nyar Israel. Nyakono nosik kode, kendo ok noriembe nyaka chieng’.

²⁰To ka en adier ni nyakono ne onge gi ringre, kendo oonge gima nyiso ni ne en gi ringre,

²¹to nyaka tere e dhood wuon mare, kendo jodalagi nogoye gi kite nyaka otho nimar osekelo wichkuot e piny Israel kochodo ka pod en e dala wuon. Mano e kaka unupwodhru kuom richo ma kamaano.

²²“Ka onwang’ ng’ato ka terore gi chi wadgi, to nyaka neggi giduto. Mano e kaka unupwodh jo-Israel kuom richo ma kamano.

²³“Ka ng’ato onwang’o nyako moro minywomo, mi oterore kode e dala,

²⁴to nyaka ukelgi giduto e dhoranga dala, mi ugogi gi kite nyaka githo. Nyaka neg nyakono nikech kata obedo ni ne en e dala kamano, to ne ok ogoyo uwi mondo okonye. Ng’atno to nyaka neg kuom kuodo wi chi wadgi. Mano e kaka unupwodh ogandau kuom richo ma kamano.

²⁵“To ka ng’ato oyudo nyako moro minywomo, mi omako, kendo oterorego gi thwon oko e pap, to ng’atno kende ema nyaka negi.

²⁶Kik utim gimoro ni nyako, nikech en ok osetimo gimoro moromore gi buch tho,

²⁷nimar ng’atno nomake oko e pap, omiyo kata obedo ni nogoyo uwi to onge ng’at mane nyalo konye. Tim ma kamano chalo gi tim ng’at momonjo wadgi monego.

²⁸ “Ka ng’ato omako nyako ma ok nywom, mi oterorego, bang’e ofwenygi,

²⁹to nyaka ng’atno chul wuon nyako pesa moromo fedha piero abich. To bende nyaka okend nyakono, nikech osemiye wichkuot, kendo ok onyal riembe nyaka chieng’.

³⁰ “Kik ng’ato ter chi wuon mare, nimar kotimo kamano, to okuodo wi wuon.