Read luo Rapar mar Chik 23 Bible Online

Rapar mar Chik 23 - luo bible

Rapar mar Chik 23

¹“Ng’at ma nyangetane otore kata ma duong’ne ong’ad oko, kik donj e chokruok mar jo-Ruoth Nyasaye.

²“Kimirwa kik donji e chokruok mar jo-Ruoth Nyasaye, nyaka nyikwaye mar apar.

³ “Jo-Amon gi jo-Moab kata mana nyaka nyikwagi mar apar kik donj e chokruok mar jo-Ruoth Nyasaye. Ok ginidonj e chokruokno,

⁴ nikech ne ok giromonu gi chiemo kata gi pi kane uwuok Misri, to bende nikech ne giluongo Balaam wuod Beor modak Pethor manie piny Mesopotamia mondo okuong’u.

⁵ To Ruoth Nyasaye ma Nyasachu ne ok odewo wach Balaam, mi noloko kuong’no obedonu mana gueth, nikech noherou.

⁶Kik udwar gima dikelnigi kue kata gima dikelnigi dongruok e ndalou duto.

⁷“To kik ukaw jo-Edom ka joma okwedi, nikech gin joweteu, bende kik ukaw jo-Misri ka joma okwedi nikech ne udak e pinygi ndalo moko.

⁸Nyikwagi mar adek ema nyalo donjo e chokruok mar jo-Ruoth Nyasaye.

⁹“Ka un e kambi ndalo lweny, to kik utim gimoro mochido.

¹⁰Ka ng’at moro kuomu ogak nikech nende olekore gotieno, to nyaka owuog oa e kambi mobed oko.

¹¹To kochopo odhiambo, nyaka olwokre, eka oduog e kambi ka chieng’ podho.

¹²Nyaka ubed gi kamoro oko mulosorue,

¹³kendo kudhi kanyo, to nyaka udhi gi rapur, ukunygo bur, mi ka uselosoru to uiko.

¹⁴Nyaka utim kamano nikech Ruoth Nyasaye ma Nyasachu wuotho kuonde duto e kambiu, mondo oritu kendo omiu loyo wasiku. Emomiyo kambiu nyaka bed maler, mondo kik Ruoth Nyasaye nwang’ie gimoro marach ma dimi oweu.

¹⁵“Ka misumba moro opondo koa e piny moro, mi oringo obiro iru, to kik uduoke ni ruodhe.

¹⁶Nyaka uweye odag e pinyu e dala moro amora mohero. To kik uloke misumba.

¹⁷ “Onge nyar Israel moro kata wuod Isreal moro manyalo bedo jachode e od lemo.

¹⁸Pesa ma dhako moro kata ma dichwo moro oyudo kuom chode kik kel e Od Ruoth Nyasaye ma Nyasachu mondo ochopgo kuong’ruok, nikech pesa moyud kamano okwedi e nyim Ruoth Nyasaye ma Nyasachu.

¹⁹ “Kik imi ja-Israel wadu chul ohala kuom gima oholo, bed ni en pesa, kata chiemo, kata gimoro amora monego dwok gi ohala.

²⁰Inyalo kawo ohala kuom gima iholo japiny moro nono, to ok kuom ja-Israel wadu. Kuluwo chikno, to Ruoth Nyasaye ma Nyasachu noguedhu kuom gik moko duto mutimo e piny ma ubiro donjoe mondo udagie.

²¹ “Kikuong’ori kuom wach moro, to nyaka ichop kuong’ruokno piyopiyo, nikech ka ok itimo kamano, to Ruoth Nyasaye ma Nyasachu nobandhi wachno, kendo nibed jaketho.

²²Ka ok ikuong’ori to ok iketho,

²³to kikuong’ori ni Ruoth Nyasaye ma Nyasachu kuom heroni iwuon, to nyaka irit kendo ichop gima iwachono.

²⁴“Ka idonjo e puoth ng’ato mar mzabibu to inyalo chamo mzabibu kaka ihero, to kik ikaw moko iago.

²⁵Bende kidonjo e puoth ng’ato mar cham, to inyalo jako ajaka cham gi lweti, to kik ika gi pala.