Read luo Rapar mar Chik 24 Bible Online

Rapar mar Chik 24 - luo bible

Rapar mar Chik 24

¹ “Ka ng’ato okendo chiege, to bang’e oyudo ni ok ohere nikech osetimo gimoro ma ok owinjore, onyalo ndiko barup weruok momiye, kendo oriembe.

²Bang’e ka dhakono osea, nyalo bet ni ng’ato ochako okende, obedo chiege,

³to ka chwore mar ariyono bende ojok kode, mondiko barup weruok momiye, kendo oriembe, kata ka chwore mar ariyono otho,

⁴to chwore mokwongo mane oriembe cha kik chak kawe mi loke chiege kendo, nikech koro osedokone mogak. Tim ma kamano en kuero e nyim Ruoth Nyasaye ma Nyasachu, kendo dikel richo e piny ma Ruoth Nyasaye ma Nyasachu biro miyou obed mwanduu.

⁵“Ka ng’ato okendo, to kik tere e lweny kata e tich moro amora, to onego obed dala kuom higa achiel komiyo chiege mor.

⁶“Kik ng’ato mak pong’ rego kata mana nyapong’ ka gir singo, nikech mano chalre gi nego dhano.

⁷ “Ka oyud ng’ato kokwalo ja-Israel wadgi mi oloke misumbane, kata ong’iewe gio ng’ato, to nyaka neg jakuogno. Mano e kaka unupwodhru kuom richo ma kamano.

⁸ “Kuom weche mag tuo dhoho, nyaka utim mana kaka jodolo ma jo-Lawi biro chikou, nimar namiyogi chikena duto ma nyaka uriti.

⁹ Paruru gima ne Ruoth Nyasaye ma Nyasachu otimo ni Miriam ka ne usewuok Misri!

¹⁰ “Kiholo ja-Israel wadu gimoro, to kik idonj e ode kikawo gir singo.

¹¹Nyaka irit mana gi oko mondo ng’at ma jagopino ema okelni gino.

¹²Ka en ng’at ma jachan, mi omiyi lawe mar abola ka gir singo, to kik inind e laweno,

¹³to nyaka idwoknego ka pok chieng’ opodho mondo onindie. Kamano ng’atno noguedhi, kendo Ruoth Nyasaye ma Nyasachi nokwan gima itimono ka gima ber.

¹⁴ “Kik itim marach ni jatich moro modhier machandore, kataa obedo ni en ja-Israel kata jadak.

¹⁵Nyaka imiye pokne pilepile kapok chieng’ opodho, nimar en jachan kendo pokneno ema konye. Ka ok itimo kamano, to onyalo ywakni kuom Ruoth Nyasaye, mi dibed jaketho.

¹⁶ “Kik neg wuone nikech richo mag nyithinde, kata kik neg nyithindo nikech richo mag wuonegi, too ng’ato ka ng’ato noneg mana nikech richone owuon.

¹⁷ “Kik ung’ad buch amwor ni jodak kata ni nyathi kich, bende kik ukaw law dhako ma chwore otho ka gir singo.

¹⁸Paruru nii ne un wasumbni e piny Misri, to Ruoth Nyasaye ma Nyasachu noresou mogolou kuno. Mano emomiyo achikou ni mondo utim kamano.

¹⁹ “Ka ikayo cham e puothi, mi wiyi owil gi cham moko motue kuno, to kik idog iom, to nyaka iwegi ni jodak gi nyithindo ma kiye kod mond liete mondo Ruoth Nyasaye ma Nyasachu oguedhi kuom gik moko duto mitimo.

²⁰“Ka iseyiengo yiendi mag zeituni mondo olembe olwar, to kik ichak iyienggi kendo, to nyaka iwe modong’ ni jodak gi nyithi kiye kod mond liete.

²¹“Ka isepono mzabibu e puothi to kik ichak ipon kendo, to nyaka iwe modong’ ni jodak gi nyithi kiye kod mond liete.

²²Paruru ni ne un wasumbni e piny Misri. Mano emomiyo achikou ni mondo utim kamano.