Read luo Rapar mar Chik 25 Bible Online

Rapar mar Chik 25 - luo bible

Rapar mar Chik 25

¹“Ka ji ariyo larore e wach moro, mi gibiro mondo oyalgi, to nyaka jong’ad bura ng’ad nigi bura kare, ka giweyo ng’at ma onge gi ketho, to gikumo jaketho.

²Ka ong’ad ni ng’at ma jakethono buch chweto, to nyaka onind piny e nyim jang’ad bura, mi chwade. Nyaka chwade maromre gi kethone,

³ to kar kwan kiboko kik kadh piero ang’wen, nono to dipo ka chweto ohingo ja-Israel waduno, mi oyudo wichkuot marach e nyimu.

⁴ “Kik itue dho dhiang’ ka ywayo lodi madiemo cham.

⁵ “Ka owete odak kanyakla, mi achiel kuomgi otho ka ok oweyo nyathi ma wuowi, to ng’at moro nono ma ok jadalano ok nyal tero chiege. Owadgi chwor dhakono ema nyaka riwre kode, mi loke chiege, kendo timne gik moko duto ma owinjore yuor dhako tim.

⁶Nyathi ma wuowi ma dhakono okwongo nywolo nyaka kaw nying wuon mare mothono, mondo nyinge kik lal e Israel.

⁷ To ka owadgi ng’at mothono ok dwar tero chi owadgino, to dhakono nyaka dhi ir jodongo e dhoranga dala kar bura, mondo onyisgi niya, ‘Yuora otamore chungo wi owadgi e Israel, kendo odagi timona gima owinjore yuor ng’ato tim ni chi owadgi.’

⁸Ka jodong dala owinjo kamano, to nyaka giluong ng’atno, kendo giwuo kode e wachno. Ka owachonigi malong’o ni ok odwar kawe,

⁹to chi owadgino nyaka dhi ire e nyim jodongo mi lony wuore e tiende, kendo ng’udh wang’e olawo. Bang’ mano dhakono nyaka wach niya, ‘Ma e kaka watimo ni ng’at modagi chungo wi owadgi.’

¹⁰E Israel jood ng’atno noluong ni, ‘Jood ng’at ma olony wuore.’

¹¹“Ka ji ariyo gore, mi chi ng’at achiel kuomgi odhi konyo chwore, momako duong’ ng’at machielono,

¹²to nyaka ng’ad lwet dhakono oko ma ok ukeche.

¹³ “Kik ibed gi rapim mopogore opogore e mifuki, ma moro duong’ to moro tin.

¹⁴Bende kik ibed gi rapur mopogore opogore e odi, ma moro duong’ to moro tin.

¹⁵Nyaka ubed gi rapim kod rapur malong’o kendo makare mondo udag aming’a e piny ma Ruoth Nyasaye ma Nyasachu biro miyou.

¹⁶Joma timo gik ma kamago kawuondo ji, okwedi e nyim Ruoth Nyasaye.

¹⁷ “Paruru gima ne jo-Amalek otimonu e yo, ka uwuok e piny Misri.

¹⁸Ne gibutonu mi gimonjou gi ka ng’eu, ka uol kendo ujony, mi ginego joma nodong’ chien, ma ok gidewo luoro Nyasaye.

¹⁹Emomiyo ka Ruoth Nyasaye ma Nyasachu osemiyou kue kuom wasiku duto molworou e piny ma obiro miyou mondo obed mwanduu, to kik wiu wil mak utieko jo-Amalek, mi nyinggi lal e piny.