Read luo Rapar mar Chik 26 Bible Online

Rapar mar Chik 26 - luo bible

Rapar mar Chik 26

¹“Ka usechopo e piny ma Ruoth Nyasaye ma Nyasachu biro miyou mondo obed mwanduu, mi udak kuno,

² to nyaka ng’ato ka ng’ato kaw gik moko duto mokwongo nyak e pinyno, kendo ket e atonga, mi dhigo kama Ruoth Nyasaye ma Nyasachu biro yiero mondo nyinge obedie.

³Nyaka odhi ir jadolo man kanyo, kendo owachne niya, ‘Ahulo ni Ruoth Nyasaye ma Nyasacha kawuono ni asechopo e piny mane Ruoth Nyasaye osingore ni kwerewa ni nomiwa.’

⁴Bang’ mano jadolo nokaw atonga e lwet ng’atno, mi noket piny e nyim kendo-mar-misango mar Ruoth Nyasaye.

⁵Eka ng’atno nowach e nyim Ruoth Nyasaye niya, ‘Kwara ne en ja-Aram ma bayo abaya, ma onge gi kar dak. Ne odhi e piny Misri kane pod joge nok, mi gidak kuno. Bang’e ne ginya, mi gidoko oganda maratego man gi ji mang’eny.

⁶To jo-Misri nosandowa, monyorowa, kendo oketowa e tich misumba malit.

⁷Ne waywak ni Ruoth Nyasaye ma Nyasach kwerewa mondo okonywa, mi nowinjo ywakwa, kendo oneno thagruok gi nyor mane inyorowago, kod tich matek mane watiyo.

⁸Kuom mano nogolowa e piny Misri gi teko maduong’ kod bat morie, kendo gi timbe madongo kod ranyisi gi honni.

⁹Nokelowa kaeri momiyowa piny maber kendo momewni.

¹⁰A Ruoth Nyasaye, mano emomiyo akeloni gik mokwongo nyak e lowo misemiya.’ Eka noket atongano piny e nyim Ruoth Nyasaye, mi okulorene piny mondo olame.

¹¹Bang’e un gi jo-Lawi kod jopinje mamoko modak kuomu nyaka utim sawo mondo upargo gik mabeyo duto ma Ruoth Nyasaye osetimonu kaachiel gi jou.

¹² “Ka usetieko choko achiel kuom apar mag gik monyak e higa mar adek, ma en higa michiwoe achiel kuom apar mar gik manyak, to nyaka uchiw gigo ni jo-Lawi gi jopinje mamoko modak kuomu, kaachiel gi nyithindo ma kiye kod mond liete, mondo gibed gi chiemo moromogi e miechu.

¹³Bang’ mano ng’ato ka ng’ato nowach e nyim Ruoth Nyasaye ma Nyasachu niya, Asegolo gik mowalni e oda, mi amiyo jo-Lawi gi jopinje mamoko gi nyithindo makiye kod mond liete mana kaka nichika. Wiya ok osewil, kata ok aseketho chikni moro kata achiel.

¹⁴Pok achamo gik mowalnigo e ndalo ma aywago ng’at motho, kata gologi e oda ka agak, kendo ok asechiwogi ni ng’at motho. A Ruoth Nyasaye asemako chikni, katimo gik moko duto midwaro.

¹⁵Rang piny gie polo kar dakni maler, mondo iguedh jogi Israel kod piny maber kendo momew misemiyowa, kaka nikuong’ori ni kwerewa.”

¹⁶“Kawuono, Ruoth Nyasaye ma Nyasachu chikou mondo urit chikegi gi buchegi duto. Nyaka uritgi gi chunyu duto.

¹⁷Usehulo tinende ni Ruoth Nyasaye e Nyasachu, kendo ni ubiro luwo yorene, murit chikene gi buchene, kendo uwinj wachne.

¹⁸ Ruoth Nyasaye bende osehulo tinende ni un e joge owuon, marito chikene duto, kaka nosingorenu.

¹⁹Obiro ting’ou malo moloyo ogendini mamoko duto mane ochueyo, mondo nyinge oyud duong’ gi pak kod huma. Kamano unubed oganda mowal ni Ruoth Nyasaye ma Nyasachu mana kaka nosingore.”