Read luo Rapar mar Chik 27 Bible Online

Rapar mar Chik 27 - luo bible

Rapar mar Chik 27

¹Kane Musa nigi jodong Israel, nochiko ji niya, “Rituru chike duto ma amiyou kawuono,

² kendo chieng’ ma ung’ado aora Jordan kudhi e piny ma Ruoth Nyasaye ma Nyasachu biro miyou, to uchung kite madongo, kendo umwon-gi.

³Ndikuru kuomgi weche duto mag chikni, mondo udonji e piny maber momew ma Ruoth Nyasaye ma Nyasachu nosingore ni kwereu ni nomiu.

⁴Ka useng’ado aora Jordan, to unuchung kitegi e got Ebal mana kaka achikou kawuono, kendo umwon-gi.

⁵ Geruru kendo-mar-misango kanyo ni Ruoth Nyasaye ma Nyasachu gi kite ma ok opa gi chuma.

⁶Kendo mar Ruoth Nyasayeno nyaka ger gi kite ma ok opa, bende utimie ni Ruoth Nyasaye ma Nyasachu misengni miwang’o pep.

⁷Timuru misengni mag sawo, kendo chiemuru kanyo, mi ubed mamor e nyim Ruoth Nyasaye ma Nyasachu.

⁸Ndikuru malong’o weche duto mag chikni kuom kitego.”

⁹Musa kod jodolo ma jo-Lawi nowacho ni jo-Israel duto niya, “Chikuru itu maber, un jo-Israel. Tinendeni usedoko jo-Ruoth Nyasaye ma Nyasachu.

¹⁰Winjuru Ruoth Nyasaye ma Nyasachu, kendo rituru chikene gi buchene ma amitou kawuono.”

¹¹Chieng’no ema Musa nogoloe chik, kowacho ni ji niya,

¹² “Ka useng’ado aora Jordan, to jo-Simeon gi jo-Lawi gi jo-Juda gi jo-Isakar gi jo-Josef kod jo-Benjamin nyaka chung’ e got Gerizim, mondo oguedh ji.

¹³To jo-Reuben gi jo-Gad gi jo-Asher gi jo-Zebulun gi jo-Dan kod jo-Naftali mondo ochung’ e got Ebal, kihulo weche mag kuong’.

¹⁴Bang’ mano jo-Lawi nowach nii jo-Israel duto gi dwol maduong’ niya.

¹⁵ “ ‘Okuong’ ng’at moloso kido mar nyasaye manono mar bao kata mar chuma, kata bed ni oketo gino kama opondo. Mano en tim makuero e nyim Ruoth Nyasaye.

¹⁶ “ ‘Okuong’ ng’at mochayo wuon kata min.

¹⁷ “ ‘Okuong’ ng’at moketho kiepe gi wadgi.

¹⁸ “ ‘Okuong’ ng’at mowuondo muofu, mi obaro oweyo yo.

¹⁹ “ ‘Okuong’ ng’at moketho buch japiny moro modak kodu, kata buch nyathi ma kich, kata buch chi liel.

²⁰ “ ‘Okuong’ ng’at moterore gi chi wuon, nikech oelo dug wuon mare.

²¹ “ ‘Okuong’ ng’at moterore gi le moro amora.

²² “ ‘Okuong’ ng’at moterore gi nyamin hie, kata nyamin ma nyar wuon.

²³ “ ‘Okuong’ ng’at moterore gi mar mare.

²⁴“ ‘Okuong’ ng’at mogoyo wadgi ling’ling’.

²⁵“ ‘Okuong’ ng’at mochamo asoya mondo oneg ng’at ma onge gi ketho.

²⁶ “ ‘Okuong’ ng’at ma ok orito kata ma ok ochopo weche duto mag chikni. Bang kuong’ ka kuong’ to ji duto nyaka duok ni, ‘Obed kamano.’