Read luo Rapar mar Chik 28 Bible Online

Rapar mar Chik 28 - luo bible

Rapar mar Chik 28

¹ “Ka uluoro Ruoth Nyasaye ma Nyasachu, kendo urito adimba chikene duto ma amiyou kawuono, to enoting’u malo moloyo ogendini duto mag piny,

²kendo guethgi duto biro bironu:

³Noguedhu kamoro amora ma untie; ka un e dala, kata ka un oko.

⁴Noguedhu gi nyithindo mang’eny, kendo gi cham mogundho kod jamni mathoth.

⁵Noguedh atongeu gi dakuondeu.

⁶Noguedhu kudonjo e dala kendo kuwuok.

⁷“Ruoth Nyasaye noket wasiku momonjou e luetu, kendo unulogi muriembgi. Ginirad kodu ka gin oganda achiel, to giniringu ka gike e sidienje abiriyo.

⁸Ruoth Nyasaye noguedh dereu kaachiel gii tich luetu duto e piny ma obiro miyou.

⁹Kurito chike Ruoth Nyasaye ma Nyasachu, kendo uwuotho e yorene, to obiro miyo udoko joge owuon maler, kaka nosesingorenu.

¹⁰Ogendini duto mag piny none ni un jo Ruoth Nyasaye mi giniluoru.

¹¹“Ruoth Nyasaye biro miyo udhi maber. Ubiro bedo gi nyithindo mang’eny, kendo gii jamni mathoth, kod cham mogundho e piny mane Ruoth Nyasaye osingore ni kwereu ni nomiu.

¹²Ruoth Nyasaye biro golo koth e polo kar kenone, mondo ochwenu e ndalo mowinjore, kendo obiro guedho gik moko duto mutimo. Ogendini mang’eny biro holo gik moko kuomu, to un ok nuhol kuomgi.

¹³Kurito chike mag Ruoth Nyasaye ma Nyasachu ma anyisou kawuono mondo urit matek,

¹⁴kendo ka ok utamoru chikego mi udagi lamo nyiseche mamoko, to Ruoth Nyasaye biro ketou jotelo, to ok joma itelonigi. Kamano ubiro dhi nyime maber, kendo ok nudog chien.

¹⁵“To ka ok uluoro Ruoth Nyasaye ma Nyasachu, mi udagi rito chikene gi buchene ma amiyou kawuono, to kuong’ gi duto biro makou:

¹⁶Nokuong’u kamoro amora ma untie; ka un e dala, kata ka un oko.

¹⁷Nokuong’ atongeu gi dakuondeu.

¹⁸Nokuong’u kuom nywol kendo kuom cham kod kuom jamni.

¹⁹Nokuong’u kudonjo e dala kendo kuwuok.

²⁰Ruoth Nyasaye noornu kuong’ gi chandruok kod kum ma ketho gik moko duto mutimo, nyaka otieku mi urum ka diemo wang’ kuom timbeu maricho, kendo nikech useweye.

²¹Ruoth Nyasasye biro goyou gi tuoche nyaka tieku ua e piny mudonjoe mondo ukaw.

²²Ruoth Nyasaye biro goyou gi kahera gi midhusi gi tuo akuodi kod guonyo, kendo kelonu oro, mi cham rochre ewi dongo. Gigo duto biro thagou nyaka urum.

²³Polo norieny ka mula, to piny nodok matek ka chuma.

²⁴Kar kelo koth, to Ruoth Nyasaye nomi lowo gi buru chwenu mana ka koth, nyaka tieku.

²⁵Ruoth Nyasaye noketu e lwet wasiku, mi ginilou. Unurad kodgi ka un oganda achiel, to unuringi kuke e sidienje abiriyo, mi unubed joma pinje duto wuoro.

²⁶Ringreu nobed chiemb winy gi le, kendo onge ng’at ma noriembgi.

²⁷“Ruoth Nyasaye biro goyou gi tuo buche mag Misri gi akuodi kendo gi kalanga kod guonyo ma ok nyal thiedhi.

²⁸Obiro goyou gi tuo mar neko, kendo lokou muofni gi joma morundore.

²⁹Unubed kumulo godiechieng’, mana kaka muofu mulo, kendo ok nuchop kuma udwaro dhiyoe. Nothiru kendo noyaku e ngimau duto, kendo onge ng’at ma nokonyu.

³⁰Unukend mon, to jomoko nono ema nonind kodgi. Unuger udi, to ok nudagie. Unupidh mzabibu, to ok unucham olembegi.

³¹Unune dhou kiyang’o, to ok unubil ringgi. Nomau kenjeu kuneno, to ok nodwoknugi. Rombeu nomi wasiku, to onge ng’ama nokonyu.

³²Yawuotu gi nyiu nokaw, kendo nomi jopinje mamoko ong’iew mana kuneno, mi siso nolou kodgi, to ok nubed gi teko mar timo gimoro.

³³“Oganda moro ma ok ung’eyo nocham gik monyak e puotheu, kendo unubed joma othir malich e ngimau duto.

³⁴Gigo biro miyo udoko joneko.

³⁵Ruoth Nyasaye biro goyo chongeu kod tiendeu gi buche ma ok nyal thiedhi, to ginilandre e dendu duto.

³⁶“Ruoth Nyasaye biro terou, kaachiel gi ruoth mubiro yiero, kuom oganda ma un ok ung’eyo kata kwereu bende ne ok ong’eyo, kendo kuno unulamie nyiseche mamoko mag yien kod mag kite.

³⁷Nyingu nolokre ka ngero kendo gima ji jaro kendo nyiero.

³⁸“Ubiro chwoyo kodhi mang’eny e puotheu, to unuka matin, nimar bonyo biro chamogi.

³⁹Unupidh mzabibu, kendo unudogi, to ok unuka olembgi kata madho divachgi, bende ok unumadhi nikech kudni nokethgi.

⁴⁰Yiend zeituni noyudre e pinyu kuonde duto, to ok unuwirru gi mogi, nimar ginilwar piny ka pok gichiek.

⁴¹Ununywol yawuowi gi nyiri, to ok ginisik kodu, nikech notergi e tuech.

⁴²Yiendu duto, kod gik monyak e puotheu, bonyo notiek pep.

⁴³Jopinje mamoko modak kuomu biro medo dongore molou, to un ubiro dok piny.

⁴⁴Ginibed gi gik ma giholou, to un ok nubed gi gima duholgi. Ginibed jotelo, to un unubed joma itelonigi.

⁴⁵“Masichego duto biro lawou mi maku nyaka tieku, nikech kane Ruoth Nyasaye ma Nyasachu ochikou mondo urit chikene gi buchene, to ne ok uwinjo wachne.

⁴⁶Masichego nobednu ranyisi mochwere, kendo ni nyikwau,

⁴⁷nikech ne ok utiyo ni Ruoth Nyasaye ma Nyasachu gi mor kendo gi ilo kuom chiwone mogundho.

⁴⁸Emomiyo unuti ni wasigu ma Ruoth Nyasaye biri oro mondo omnju. Kech nokau, kendo riyo nolou; unuwuoth duge, kendo nuchand gimoro amora. Ruoth Nyasaye noket jok mar nyinyo e ng’utu nyaka otieku.

⁴⁹“Ruoth Nyasaye biro kelo kuomu oganda moro moa kuma bor ma dhogi ok nuwinji. Ginimuomre kuomu mana kaka ongo muomore kuom nyagweno.

⁵⁰Ogandano nobed mager ahinya. Ok ginidew joma oti, kendo ok ginikech nyithindo.

⁵¹Ginicham jambu gi chambu, ma ok giweyonu cham kata divai kata mo kata mana chiayo moro kuom jambu nyaka urum.

⁵²Ginilwor mier duto ma Ryuoth Nyasaye nomiu mondo gikau, nyaka gimuk ohinga maboyo kendo motegno muparo ni dugeng’rugo.

⁵³Wasikugo nokelnu chandruok malich ahinya, e ndalo ma giluoro e miechu, mi unucham kata mana nyithindu uwegi ma Ruoth Nyasaye ma Nyasachu omiyou.

⁵⁴Kata mana ng’at malong’o kendo mang’wonie moloyo biro bedo ma iye kwar gi wadgi, kata mana chiege mohero kaachiel gi nyithinde modong’,

⁵⁵mi notamre pogonigi ringre nyithinde mochamo, nimar onge gimoro machielo ma nodong’ne, nikech chandruok malich ma wasiku biro kelonu e ndalo ma giluoroe miechu.

⁵⁶ Bende kata mana dhako malong’o kendo mang’wonie moloyo bende, ma nyaka nene ok wuoth gi tiende, biro bedo ma iye kwar gi chwore mohero kaachiel gi nyithinde,

⁵⁷mi notamre pogonigi bieche kata mana nyathi mosenywolo, nikech chandruok malich ma wasigu biro kelone e ndalo ma giluoroe miechu duto.

⁵⁸“Ka ok urito chike duto mondiki e kitabuni, kendo ok luoro nying Ruoth Nyasaye ma Nyasachu, ma en nying maduong’ kendo malich,

⁵⁹to ubiro kelo kuomu, kendo kuom nyikwau, masiche malich kendo miwuoro, kod tuoche mayuayo ji kuom kinde malach.

⁶⁰Ruoth Nyasaye nokel tuoche duto mag Misri mane uluoro, kendo ginisik kuomu.

⁶¹To bende nokel kuomu tuoche kod masiche ma ok ondik e kitap chikni, nyaka urum.

⁶²Kata obedo ni ung’eny ka sulue manie polo kamano, to ji manok kuomu kende ema nodong’ nikech ne ok uwinjo wach Ruoth Nyasaye ma Nyasachu.

⁶³Ruoth Nyasaye nobed mamor kokethou, kendo kotiekou mana kaka nobedo mamor koguedhou kendo omiyo unya, mi nogolu gi thuon e piny ma udonjoe mondo ukau.

⁶⁴Ruoth Nyasaye nokeu e kind ogendini, chakre tung’ piny konchiel nyaka tung’ piny komachielo, kendo kuondego duto unulamie nyiseche mag yien kod mag kite, ma un ok ung’eyo kata kwereu bende ne ok ong’eyo.

⁶⁵Ka un e kind ogendinigo, to ok nuyud kue, to unuriwni e kindgi, kendo Ruoth Nyasaye nomi ubed gi parruok, gi wenge mojony, kod chuny mokuyo.

⁶⁶Ok unung’e gima biro timorenu, kendo unubed gi kihondko odiechieng’ gotieno, mi ok unung’e sa thou.

⁶⁷Kihondkono gi gik mubiro neno, nomi uwach okinyi kokinyi ni, ‘Yaye! Mad obed odhiambo!’ To odhiambo kodhiambo unuwach ni, ‘Yaye! Mad obed okinyi.’

⁶⁸Ruoth Nyasaye nodwoku Misri gi yiedhi, kata obedo ni nosingore ni ok nudog kuno kendo. Unuhonru ni wasiku mondo ong’iewu ka wasumbni, to onge ng’ama nong’iewu.”