Read luo Rapar mar Chik 3 Bible Online

Rapar mar Chik 3 - luo bible

Rapar mar Chik 3

¹“Bang’e ne wawuok, mi wamako yo mochomo piny Bashan. Eka Og ruodh Bashan kaachiel gi joge duto ne jowuok mondo oked kodwa Edrei.

²To Ruoth Nyasaye nowachona niya, ‘Kik uluor Og, nimar asechiwe kaachiel gi joge kod pinye e lwetu. Timneuru mana kaka nutimo ni Sihon ruodh jo-Amor mane odak Heshbon.’

³Kamano Ruoth Nyasaye ma Nyasachwa nochiwo Og ruodh Bashan kaachiel gi joge e lwetwa, mi ne wanegogi duto, ma ok waweyo kata ng’at achiel ka ngima.

⁴E kindeno bende ne wakawoe gweng’ Argob duto, man e piny Og ruodh Bashan. Ne wakawo mier mage duto, ma onge kata achiel mane odong’.

⁵Ne gin mier piero auchiel, mochiel motegno gi ohinga maboyo, moketie dhorangeye man gi thipe kod lodi. To bende ne wakawo mier moko matindo mang’eny ma ok ochiel.

⁶Dala ka dala ne wanegoe ji duto modakie, chwo gi man kod nyithindo, mana kaka be watimo ni miech Sihon ruodh Heshbon.

⁷To jamni kod mwandu duto mane nie miego, ne wayako.

⁸“Kamano e kaka ne wakawo pinje mag ruodhi ariyo mag jo-Amor mane ni loka Jordan yo wang’chieng’, chakre holo mar Arnon nyaka got Hermon.

⁹(Jo-Sidon lwongo got Hermon ni Sirion, to jo-Amor luonge ni Senir.)

¹⁰Ne wakawo mier duto manie piny gode motarore, kaachiel gi piny Gilead kod piny Bashan, nyaka Saleka gi Edrei, miech Og ruodh Bashan.

¹¹(Og ruodh Bashan kende ema nodong’ kuom jo-Refaim. Sandug liende, molos gi kite maratenge, pod ni Raba dala jo-Amor nyaka chil kawuono. Borne chiegni romo mita abich to to lachne mita ariyo.)

¹²“Kane wakawo pinyno ne apogo ni jo-Reuben gi jo-Gad piny man yo nyndwat mar Arwer, e bath holo Arnon, kod nus mar piny gode man Gilead, kaachiel gi mier duto mane ni kuno.

¹³To nus piny Gilead, komachielo kod Bashan piny Og, napogo ni nus jo-Manase. (Piny Bashan duto niluongo ni piny jo-Refaim.

¹⁴Jair nyakwar Manase nokawo gweng’ Argob duto nyaka tong’ jo-Geshur gi jo-Maakath. Pod nitie mier moko e Bashan kuno miluongo ni Havoth-jair ma tiende ni miech Jair.)

¹⁵Napogo ni joka Makir piny Gilead.

¹⁶To jo-Reuben gi jo-Gad napogonigi piny mochakore Gilead nyaka dier holo mar Arnon, kendo nyaka holo mar Jabok, moting’o tong’ gi piny jo-Amon,

¹⁷kaachiel gi piny manie holo mar aora Jirdan, chakre Nam Galili nyaka Nam Araba miluonmgo ni Nam Kado, man yo podhochieng’ mar got Pisga.

¹⁸ “E kinde nogono nachiko dhoudi ariyo gi nusgo kama: ‘Ruoth Nyasaye ma Nyasachu osemiyou pinyni mondo obed mwanduu, to jolwenju duto nyaka dong’ e oganda lweny, kendo otel e nyim jo-Israel weteu.

¹⁹Mak mana mondu gi nyithindu kod jambu ema mondo odong’; e mier masemiyougo. (Ang’eyo ni un gi jamni mathoth.)

²⁰To ka Ruoth Nyasaye osekonyo oweteu kaka osekonmyou, mi gikawo piny man loka Jordan ma Ruoth Nyasaye ma Nyasachu miyogi, mi gidakie, eka unyalo dok e piny ma asemiyouni, ng’ato ka ng’ato e dalane.’

²¹“Chieng’no bende nachiko Joshua niya, ‘Nuneno gi wang’u gima Ruoth Nyasaye ma Nyasachu notimo ni ruodhi ariyo kande. Ruoth Nyasaye biro timo mana kamano ni pinje duto mubiro donjoe kuseng’ado aora Jordan.

²²Kik uluorgi, nimar Ruoth Nyasaye ma Nyasachu ema biro kedonu.’

²³ “Chieng’ onogono, nakwayo Ruoth Nyasaye niya,

²⁴‘A Ruoth Nyasaye, isechako nyisa duong’ni gi tekoni. Onge Nyasaye moro amora e polo kata e piny ma tekone nyalo romo gi tekoni, kata manyalo timo timbe madongo mitimogi.

²⁵Akwayi ni yie ang’ad Jordan mondo aneye piny maber man loka cha kod piny gode mabeyo, kaachiel gi piny Lebanon.’

²⁶To Ruoth Nyasaye nokecho koda ahinya nikech gik musetimo, omiyo notamore winjo kwayona. Nodwoka nioya, ‘We! Mano oromo. Kik ichak iwuo koda kendo kuom wachno.

²⁷Dhiyo ewi got Pisga mondo irang yo nyandwat gi yo milambo, kendo irang yo wuokchieng’ gi yo podhochieng’. Inyalo mana neno pinyno gi wang’i, to in iwuon ok ning’ad Jordan.

²⁸Ket Joshua mondo okaw kari. Ijiwe kendo imiye teko, nimar en ema obiro telo ni jogi, koterogi loka cha mondo gikaw piny minenono.’

²⁹“Kuom mano ne wadong’ e hoho momanyore gi Beth-peor.”