Read luo Rapar mar Chik 30 Bible Online

Rapar mar Chik 30 - luo bible

Rapar mar Chik 30

¹“Ka gueth kod kuong’ ma aketo e nyimugo duto osetimorenu, muparo wechena e pinje ma Ruoth Nyasaye ma Nyasachu oseteroue,

²mi uduogo ire gi chunyu duto, kaachiel gi nyithindu, mana kaka chike ma amiyougi dwaro,

³to Ruoth Nyasaye ma Nyasachu nong’wonnu, mi nochak omi udhi nyime maber kendo. Enochak ochoku kendo kanyakla, kogolou e pinje duto mane okeyoue.

⁴Kata obedo ni osekeyou e tung’ piny gi tung’ piny kamano, to nochak ochoku kaachiel kendo.

⁵Ruoth Nyasaye ma Nyasachu nodwoku e piny kwereu mondo udagie. Enomi unya mang’eny, kendo ubed gi mwandu mathoth moloyo kwereu.

⁶Ruoth Nyasaye ma Nyasachu nomi chunyu gi chuny nyikwau tim gik ma odwaro, mondo uhere gi chunyu duto kendo gi adiera, eka ubed mangima.

⁷Bang’e Ruoth Nyasaye ma Nyasachu nolok kuong’go duto ni wasiku, kendo ni joma sandou.

⁸Unuchak uluor Ruoth Nyasaye kendo, mi unurit chikene duto ma amiyou kawuonogi.

⁹Ruoth Nyasaye ma Nyasachu nomedu mwandu mang’eny moloyo. Unubed gi nyithindo mathoth, gi jamni mang’eny, kod cham mogundho. Enobed mamor komiyou mwandu, mana kaka nobedo mamor komiyo kwereu mwandu,

¹⁰to mana ka uluore, murito chikene gi buchene kaka ondiki e kitabu mar chikni, kendo ka uduogo ire gi chunyu duto kendo gi adiera.

¹¹“Chik ma amiou kawuononi ok en chik matek, to bende ok en kuma bor. Ok en e polo ma dimi uwach ni,

¹² ‘Ng’ama didhinwa malo e polo mondo oomnwa chikno, kendo opuonjwa, eka warite?’

¹³Bende ok en loka nam, ma dimi uwach ni, ‘Ng’ama ding’adnwa nam mondo okelwago, mi opuonjwa, eka warite?’

¹⁴To wach Nyasaye chiegni kodu ahinya, kendo en mana e dhou kendo e chunyu, omiyo ritogo yot.

¹⁵“Neuru, kawuono aketo gik moko ariyo e nyimu mondo uyier. Gin ngima gi ber, kata tho gi rach.

¹⁶Ka umako chik Ruoth Nyasachu ma amiyou kawuono, muhere kuluwo yorene, kendo urito chikene gi buchene, to unubed mangima, mi ununya mang’eny, kendo Ruoth Nyasaye ma Nyasachu noguedhu e piny ma ubiro donjoe mondo ukaw.

¹⁷To kuweye, mubaro kudhi lamo nyiseche mamoko kendo ukulorunigi,

¹⁸to ng’euru maler ni karu nolal nono, kendo ok unudag aming’a e piny ma ubiro donjoe mondo ukaw, kuseng’ado aora Jordan.

¹⁹Koro aluongo polo gi piny mondo obed joneno ni aseketo gik moko ariyo e nyimu mondo uyier. Gin ngima gi gueth, kata tho gi kuong’. To yieruru ngima, mondo udag maber kaachiel gi nyikwau.

²⁰ Heruru Ruoth Nyasaye ma Nyasachu, kuwinjo wachne, kendo kuketo chunyu kuome. Mano nomi ubed mangima, kendo udag aming’a e piny mane osingore ni kwereu ma Ibrahim gi Isaka kod Jakobo.”