Read luo Rapar mar Chik 31 Bible Online

Rapar mar Chik 31 - luo bible

Rapar mar Chik 31

¹Musa nomedo wuoyo ni jo-Israel, kowacho niya,

² “Koro hika gin mia achiel gi piero ariyo, kendo ok anyal dhi nyime gi telonu. To bende Ruoth Nyasaye osenyisa ni ok nang’ad aora Jordan.

³Ruoth Nyasaye ma Nyasachu owuon biro telo nyimu mondo otiek ogendini mudhi kawo pinygigo, mi unudag e pinygi, kendo Joshua notelnu kaka Ruoth Nyasaye osewacho.

⁴ Ruoth Nyasaye biro tieko ogendinigo mana kaka notieko Sihon gi Og, Ruodhi jo-Amor, kaachiel gi pinjegi.

⁵Nochiwgi e luetu, mi unutimnigi mana kaka nochikou.

⁶Beduru gi chir, kendo gi jing’o. Kik uluorgi, kendo kik chunyu nyosre, nimar Ruoth Nyasaye ma Nyasachu biro dhi kodu, kendo ok noweu kata jwang’ou ok nojwang’u.”

⁷Bang’e Musa noluongo Joshua mowachone e nyim jo-Israel duto niya, “Bed gi chir kendo gi jing’o, nikech in ema ibiro telo ni jogi ka gidhi e piny ma Ruoth Nyasaye nosingore ni kweregi ni nomigi, kendo inimi gikawe.

⁸ Ruoth Nyasaye owuon biro teloni, kendo nobed kodi. Ok noweyi, bende ok nojwang’i, omiyo kik ibed maluor, kendo kik chunyi nyosre.”

⁹Musa nondiko chikno momiyo jodolo ma jo-Lawi mane ting’o Sandug Muma mar Ruoth Nyasaye, kod jodong Israel duto.

¹⁰ Eka nochikogi kama: “Bang’ higni abiriyo ka higni abiriyo e higa miweyoe gope, e kinde mutimoe Sap Kiche,

¹¹ka jo-Israel duto biro mondo olam Ruoth Nyasaye ma Nyasachu kama obiro yiero mondo nyinge obedie, to nyaka usom chikni matek e nyimgi duto.

¹²Nyaka uchik ji duto, chwo gi mon kod nyithindo, kaachiel gi jopinje mamoko modak kuomu, mondo giwinj chikno, eka gipuonjre luoro Ruoth Nyasaye ma Nyasachu, mi girit wechene duto maber.

¹³Tienge mabiro mapok ong’eyo wechegi nowinjgi, mi nopuonjre luoro Ruoth Nyasaye ma Nyasachu ndalo duto ma gidakgo e piny ma ubiro kawo ka useng’ado aora Jorda,.”

¹⁴Ruoth Nyasaye nowacho ni Musa niya, “Ibiro tho machiegni, omiyo luong Joshua udhi e Hemb Romo mondo akete e tich.” Omiyo Musa gi Joshua ne jodhi kaka nowachnigi,

¹⁵kendo Ruoth Nyasaye nofwenyore e Hema ka ni e bor polo mane ochung’ e dho Hema.

¹⁶Ruoth Nyasaye nowacho ni Musa niya, “Ka isetho, moyiki, to jogi biro weya mi luw nyiseche mag jomoko ma gidhi yudo ka gidonjo e pinyno, mana kaka dhako weyo chwore, to dwanyore gi chwo mamoko. Giniweya, kendo giniketh singruok ma asetimo kodgi.

¹⁷Kuom mano, mirimba mager noliel kuomgi ka mach mi notiekgi. Anawegi, kendo ok nakwan-gi ka joga, mi ginithagre malit, kendo ginine masiche madongo. Eka bang’e giniwach niya, ‘Thagruokgi osebironwa mana nikech Nyasachwa koro ok ni kodwa.’

¹⁸To ok nawinjgi e ndalogo, nikech richo ma gisebedo ka gitimo mar lamo nyiseche mamoko.

¹⁹“Kuom mano, koro ndik wer ma anyisi ni, kendo ipuonjgi kaka iwere, mondo oparnigi chikena.

²⁰Ka asekelogi e piny maber kendo momew, kaka nasingora ni kweregi, mi giyudo chiemo, kendo gidoko machwe, eka bang’e ginichara, kendo giniketh singruokna, ka giluwo nyiseche mamoko kendo tiyonigi.

²¹Ka githagore malit kendo gineno masiche malit kamano, to wendni nobednigi rapar, nimar nyikwagi nosik ka were. Kata koroni, ka pok akelogi e piny ma nasingora ni namigi, ang’eyo kaka chunygi chalo.”

²²Musa nondiko wendno chieng’no, mopuonjo jo-Israel.

²³ Ruoth Nyasaye nochiko Joshua wuod Nun niya, “Bed gi chir, kendo gi jing’o, nikech in ema nitelni jo-Israel ka gidhi e piny ma ne asingora ni namigi kendo anabed kodi.”

²⁴Kane Musa osetieko ndiko chikno duto e kitabu,

²⁵nochiko jo-Lawi mane ting’o Sandug Muma mar Ruoth Nyasaye niya,

²⁶“Kawuru kitap chikni, uket e bath Sandug Muma mar Ruoth Nyasaye ma Nyasachu, mondo obednu kanyo ka rapar,

²⁷nimar ang’eyo ni un joma wigi tek ta. Usetamoru winjo Ruoth Nyasaye kata ka pod angima ka an kodu. Koro kasetho to ubiro dage machal nadi?

²⁸Omiyo chokuru jodong dhoutu gi jotendu duto e nyima, mondo awachnigi wechegi, kendo aluong polo gi piny mondo obedna joneno.

²⁹Ang’eyo ni ka asetho, to ubiro duworu malich, muwe yo ma asechikoue. Kuom mano, unune masiche e ndalo mabiro, nikech numiyo Ruoth Nyasaye mirima gi timbeu maricho.”

³⁰Bang’e Musa nowachonigi weche duto mag wendni, ka oganda jo-Israel ochiko itgi.