Read luo Rapar mar Chik 32 Bible Online

Rapar mar Chik 32 - luo bible

Rapar mar Chik 32

¹“In polo, chik iti ka awuoyo! In piny, winj wechena!

²Puonj mara mondo obed ka koth machue e lek, kendo wechena mondo obed ka tho mamiyo lum doko mang’ich.

³Abiro luongo nying Ruoth Nyasaye, to dwokuru ni, ‘Omi Nyasaye duong’!’

⁴En lwanda, ma tichne long’o, nikech yorene duto ni kare. En Nyasaye ma jaadiera, kendo maonge ketho, ma timbene kare, kendo ma jaratiro.

⁵Tieng’ni to en tieng’ makoch, kendo mobam, ma timbegi mobam nyiso ni ok gin nyithind Ruoth Nyasaye.

⁶Yaye, oganda mofuwo ma onge gi rieko, mano e kaka utimo ni Ruoth Nyasaye adier? Donge en e wuoru mane ochueyou? Donge en ema omiyou doko oganda maratego?

⁷Paruru ndalo machon, kod tienge ma koro osekadho. Penjuru wuoneu kod jodongu, mondo ogannu sigendgi.

⁸ Kane Ng’ama Duong’ Moloyo ochiwo ni ogendini pinjegi, mondo obed kuondegi mag dak, noketo ni oganda ka oganda tong’ pinygi maromre gi kar romb nyithi Nyasaye.

⁹To Ruoth Nyasaye owuon noyiero joka Jakobo mondo obed joge owuon, kendo obed mwandune.

¹⁰Noyudo ogandano e thim malich ma ondiegi rutoe, mi nolworogi koni gi koni, moritogi maber.

¹¹Kaka ongo yiengo ode mondo nyithinde owuogi, koyaro bwombene mondo okawgi, kendo oting’gi e bwombene, e kaka Ruoth Nyasaye yaro bwombene, kendo kawo ogandane.

¹²Ruoth Nyasaye kende ema otelonigi, ka onge nyasaye moro makonye.

¹³Nomiyo giidho gode mag piny, kendo omiyo gichamo gik ma nyak e lowo. Nomiyo gichamo mor kich mothodhi e kind lwanda, kod mor zeituni manyak e lowo motimo kite.

¹⁴Ne gin gi cha adila gi cha rombe, kod nyirombe gi imbe mabeyo moloyo gi dhok moa Bashan, kod nyuogi, kaachiel gi ngano maber. Ne gimadho mana divai makwar maber.

¹⁵Kamano dhood Jakobo nochiemo, moyieng’. Adier, joka Jeshurun nodoko machwe, mogwecho. Ee, nubedo machwe ahinya, nikech nuchiemo mang’eny. Ne giweyo Nyasaye ma nochweyogi, ka gicharo Lwanda ma noresogi.

¹⁶Ne gimiyo nyiego omake kuom lamo nyiseche mamoko, kendo ne gimiye mirima gi timbegi makuero.

¹⁷ Ne gitimo lisweche ni jochiende ma ok Nyasaye, kendo ni nyiseche ma ok ging’eyo, ma kata mana kweregi bende ne ok ong’eyo.

¹⁸Wigi nowil gi Lwanda ma nochweyogi! Ne ok giparo Nyasaye ma nomiyogi ngima.

¹⁹Ruoth Nyasaye noneno gik mane yawuote gi nyige timo, mi nojwang’ogi nikech ne giwang’o iye.

²⁰Nowacho niya, ‘Ok named kwanogi ka joga, to abiro neno gikogi, nimar gin tieng’ ma wigi tek, nyithindo ma ok nyal gen.

²¹ Gisemiyo nyiego omaka, nikech giselamo gikma ok nyasaye. Adier gisewang’o iya, nikech giselamo gima nono. Omiyo abiro miyo nyiego makgi ka ayiero oganda ma nono oloyo, kendo abiro wang’o igi, ka ayiero oganda ma ok dew Nyasaye.

²²Mirimba osemoko mach! Mawang’o piny kaachiel gi gik manyakie, kendo owang’o mise mag gode, bende ochopo kata kar joma otho e liel piny.

²³Anamed masiche kuom joga, kendo nachielgi gi asechena duto,

²⁴mi kech nokagi, kendo midhusi notuogi, kendo tuoche maricho nogogi, bende naol kuomgi ondiegi mangemo, kod thuonde man gi kwiri mager.

²⁵Ligangla noneggi ka gin oko, kendo ka gin ei udi, mi nyithindgi nodong’ kiye, kendo mondgi nodok mond liete. Yawuowi gi nyiri bende notho, kaachiel gi nyithindo mayom, kod jodongo moti.

²⁶Naparo ni mondo ang’adgi matindotindo, kendo atiekgi ma ok nochak opargi.

²⁷To naparo ni dipo ka wasigu ojara, ka gipakore ni gin ema gisetimo gigo duto, to ok an, Ruoth Nyasaye.’

²⁸“Joma wacho kamano gin oganda mofuwo, kendo maonge gi paro.

²⁹Ka dine giriek, to dine ging’eyo tiend gik matimore, dine ging’eyo gima biro timorenigi e giko.

³⁰Ere kaka ng’at achiel dilaw ji gana achiel, kata ji ariyo riemb ji gana apar, mak mana ka ok Ruoth Nyasaye ma Lwandagi ema oweyogi, moketogi e lwet wasikgi?

³¹To adier, lwanda mar wasikwa ok chal gi Lwandawa, kata mana wasikwa bende ong’eyo kamano.

³²Mzabibu maggi gin mzabip Sodom, mopidh Gomora ma olembgi otimo kwiri, kendo kech.

³³Divachgi chalo gi kwich thuol mager.

³⁴“Ruoth Nyasaye wacho niya, ‘Donge gigo duto okan maber e od kenona,

³⁵ nyaka chop chieng’ ma abiro chuloe kuor kendo kumogi mana chieng’ ma tiendgi nokierie, mi gipodh piny? Chieng’’ mar masira, ma gibiro rumoe sudonigi machiegni!’

³⁶ “Adier, ka Ruoth Nyasaye oneno ni joge ool, kendo ni onge kata ng’at achiel modong’ makonyogi, to obiro ng’adonigi bura maber, kendo obiro kechogi.

³⁷Enowach niya, ‘Nyisecheu ni kanye, lwanda mane udwaro yudo konyruok kuome?

³⁸Ere nyisecheu mane chamo boche mag misengni mau, kendo madho divai mar misengni miolo piny? Koro gibi mondo gikonyu, kendo gibednu kar konyruok.’

³⁹“Koro ng’euru malong’o ni an e Nyasaye, kendo onge nyasaye moro, mak mana an. An kende ema anego ji, kendo an ema achiwo ngima. Ahinyo, bende achango. Onge ng’ama nyalo reso ng’ato e lweta.

⁴⁰Koro ating’o bada ka akuong’ora gi nyinga awuon mochwere ni,

⁴¹kasepiago ligangla mamil, to anachul kuor ni wasika, kendo kasechako ng’ado bura, to anakum jogo mochaya.

⁴²Anami asere maga chadhre gi remb joma onegi kod joma omaki. Liganglana nochadh jotend wasigu.

⁴³ “Un polo, moruru kaachiel gi Ruoth Nyasaye. Un nyiseche duto, kulreneuru. Moruru un ogendini kaachiel gi joge, kendo malaika duto mag Nyasaye mondo opak tekone, nikech enochul kuor kuom remb jotichne, kokumo wasike kod joma ochaye. Enopwodh piny kaachiel gi joge.”

⁴⁴Musa nobiro gi Joshua wuod Nun, mosomo weche duto mag wendno, ka ji ochiko itgi.

⁴⁵Kane Musa osetieko wuoyo ni jo-Israel duto,

⁴⁶nowachonigi niya, “Chikuru itu maber mondo uwinj weche duto ma asiemougo kawuono. Puonjuru nyithindu chikego duto, mondo girit kendo gitim, mak giweyo kata achiel,

⁴⁷nikech ok gin weche ma nono, to gin e ngimau. Kuritogi, to gibiro miyo udag aming’a e piny ma ubiro kawo ka useng’ado aora Jordan.”

⁴⁸ Odiechieng’ onogo Ruoth Nyasaye nowacho ni Musa niya,

⁴⁹“Idh got Nebo ma en achiel kuom gode Abarim manie piny Moab, yo wuokchieng’ mar Jeriko, mondo irang piny Kanaan ma abiro miyo jo-Israel ka mwandugi.

⁵⁰Initho ewi got ma ibiro idhono, mi iluw kwereni, mana kaka owadu Harun notho e got Hor, moluwo kwerene.

⁵¹Gima kamano nyaka timre nimar nuketho e nyima kane ok uluora e nyim jo-Israel e sokni mag Meribath-kadesh, e thim Zin.

⁵²Inine piny ma abiro miyo jo-Israelno gi chien, to ok inidonjie.”