Read luo Rapar mar Chik 33 Bible Online

Rapar mar Chik 33 - luo bible

Rapar mar Chik 33

¹Kane Musa ng’at Nyasaye chiegni tho, noguedho jo-Israel, kowacho kama:

²“Ruoth Nyasaye nobiro koa Sinai. Ne orienynigi gie Seir, kendo gie got Paran. Nobiro ka ji maler gana gi gana oruowo e bathe ma korachwich.

³Adier, ohero joge maler, kendo oguedhogi. Giluwe kamoro amora modhiye, kendo giwinjo chikene

⁴mane Musa omiyowa, mondo obed mwandu mar oganda joka Jakobo.

⁵Ruoth Nyasaye nodoko Ruodh Israel ma bende iluongo ni jo-Jeshurum, kane jodong dhoutgi ochokore kaachiel.”

⁶Kuom jo-Reuben, Musa nowachoe niya, “Jo-Reuben mondo obed mangima kendo kik githo, to kata kamano, onego gibed manok.”

⁷Kuom jo-Juda to nowuoyoe kama, “A Ruoth Nyasaye, winj ywak jo-Juda mondo idwokgi kuom ogandagi. Bednigi tekregi ma gisirorego kendo ikonygi kuom wasikgi.”

⁸ Jo-Lawi to nowuoyo kuomgi niya, “A Ruoth Nyasaye, nimiyo nyikwa Lawi ombulu miluongo ni Urim gi Thumim mondo ging’ego dwaroni, nikech gin joma tiyoni gi adiera. Ne itemogi Masa, kendo e sokni mag Meriba mi inwang’o ni gin joma inyalo geno.

⁹Hera mane giherigo oloyo hera mane giherogo wuonegi gi minegi kod owetegi, kata nyithindgi, nikech ne giluwo mana chikeni, mi girito singruok mari maber.

¹⁰Gipuonjo joka Jakobo chikeni. Ee, gipuonjo jo-Israel chikeni. Giwang’oni misengni, madum tik mamit, kendo gitimoni misengni miwang’o pep e kendoni mar misango.

¹¹A Ruoth Nyasaye, guedh riekogi duto, kendo iyie gi tichgi. Tiek wasikgi duto, mondo wasikgigo kik chak bed gi teko.”

¹²To kuom jo-Benjamin nowuoyoe kama, “Joma Ruoth Nyasaye ohero odak gi kue; Nyasaye Maduong Moloyo ritogi seche duto, kendo gidak e godene.”

¹³Kuom joka Josef to nowachoe niya, “Ruoth Nyasaye onego guedh lopgi, gi chiwo maber moa e polo malo, kaachiel gi pi manie bwo piny,

¹⁴gi olembe mabeyo ma chieng’ onyago, kod olembe mabeyo manyak due ka due,

¹⁵gi gik mabeyo mag gode ma chon mochwere,

¹⁶kaachiel gi gik mabeyo mag piny, kod gik moko duto manie iye, gi ng’wono mar Jal modak e Bungu Maliel. Guethgi duto onego bed ewi joka Josef, jal mane oyier kuom owetene.

¹⁷Dhoode nochal gi nyarwath makayo, ma tungene chalo gi tung jowi, ma obiro chwowogo ogendini, moriembgi nyaka tung piny gi tung’ piny. Tungego gin gi ji tara gi tara ma jo-Efraim, kod ji gana gi gana ma jo-Manase.”

¹⁸Jo-Zebulun to nowuoyo kuomgi kama, “Un jo-Zebulun, beduru mamor e wuodheu, kendo un jo-Isakar, beduru mamor e hembeu.

¹⁹Dhoudi ariyogo biro luongo ogendini e got, kama gitimoe misengni makare, nimar gibiro yudo mwandu mogundho e nembe, kendo gik mabeyo mopondo e dhonam.”

²⁰Kuom jo-Gad to nowuoyoe niya, “Oguedh jalo mayaro tong’ jo-Gad. Dhood Gad chalo gi sibur madhako, mogwom piny, ka yiecho bat gi wi gima omako.

²¹Ne giyiero piny koma ber moloyo, nikech gin ema nopognigi migap jatelo. Ne gibiro ir jotend ji, kendo ne gitimo kaka Ruoth Nyasaye dwaro, ka girito chike mane Ruoth Nyasaye omiyo jo-Israel.”

²²Kuom jo-Dan nowachoe kama, “Dhood Dan chalo gi nyathi sibuor, machikore koa Bashan.”

²³Kuom jo-Naftali to nowuoyoe niya, “Dhood Naftali nigi gik moko duto modwaro, kendo en gi gueth mogundho, moa kuom Ruoth Nyasaye. Bende opogne nam Galili kod dho wedhe ma milambo.”

²⁴To kuom jo-Asher nowachoe kama, “Dhood Asher mondo oyud gueth moloyo dhout owetene mamoko. Dhout owetene mondo oher dhoode, kendo mondo dhoode odag maber.

²⁵Lodi mag dhorangeyene obed mag chuma gi mag mula, kendo tekone omedre ndalo duto.

²⁶“Onge Nyasaye moro machal gi Nyasach joka Jeshurun maringo e kor polo e duong’ne maler mondo okonyu.

²⁷Nyasaye mochwere ma nyaka chieng’ en kar daku, kendo bedene mochwere ema konyou. Noriembonu wasigu, mi ogolo chik mondo neggi.

²⁸Kamano jo-israel odak gi kue. Adier, nyikwa Jakobo odak maonge ng’ama thagogi e piny machiego cham gi divai, kama tho moa e polo tonie maber.

²⁹Ere joma mor ka un, un jo-Israel ma Ruoth Nyasaye owaro! Ruoth Nyasaye e kuot mogeng’ou, kendo en e liganglau mar duong’. Wasiku mondo obolrenu, kendo unyon hembko maggi gi tiendu.”