Read luo Rapar mar Chik 4 Bible Online

Rapar mar Chik 4 - luo bible

Rapar mar Chik 4

¹Musa nomedo wacho niya, “To koro, un jo-Israel, winjuru chike gi buche ma apuonjou, kendo umak, eka unubed mangima kendo unudonj e piny ma Ruoth Nyasaye ma Nyasach kwereu nomiu, mudagie.

² Kik umed gimoro kuom gik ma achikou, kata kik ugol gimoro kuomgi. Rituru chike mag Ruoth Nyasaye adimba, mana kaka amiyougi.

³ Nuneno gi wang’u gima Ruoth Nyasaye ma Nyasachu notimo Baal-peor. Nonego jou moko duto mane lamo Baal ma nyasach Peor.

⁴To un mane upadoru kuom Ruoth Nyasaye ma Nyasachu, pod ungima uduto nyaka chil kawuono.

⁵Asepuonjou chike gi buche kaka Ruoth Nyasaye ma Nyasacha nochika. Mago duto nyaka urit e piny mudhi donjoe, kendo kawo.

⁶Ritgiuru adimba, nimar mano biro nyiso ogendini mamoko ni uriek. Ka giniwinj chikegi eki, to giniwach niya, ‘Onge oganda moro mariek ka oganda maduong’ni.’

⁷Giniwach kamano nimar onge oganda moro, kata bed ni oduong’ manade, ma nyasache nyalo sudo machiegni kode kaka Ruoth Nyasaye sudo machiegni kodwa e sa asaya ma walame.

⁸Onge oganda moro kata bed ni oduong’ manade, man gi chike kod buche makare machal gi Chik ma aseketo e nyimu tinendeni.

⁹“To beduru kutang’ kendo neuru ni wiu ok owil gi gik museneno gi wang’u. Kik uwe gia e chunyu ka pod ungima, to hulgiuru ni nyithindu kendo ni nyikwau.

¹⁰Nyaka uparnigi gik mane otimore chieng’ mane uchung’ Horeb e nyim Ruoth Nyasaye ma Nyasachu cha, ka Ruoth Nyasaye wachona ni, ‘Chokna ji e nyima ka, mondo giwinj kawuoyo kodgi, kendo gipuonjre luora e ngimagi duto.’

¹¹ Nusudo machiegni, mi uchung’ e tiend got. Got ne wang’ gi mach matundo e polo, e mudho mandiwa gi rumbi kod ong’weng’o mopoto.

¹²Bang’e Ruoth Nyasaye noloso kodu gie majno, muwinjo dwol mawuoyo, to ne ok uneno kit gimoro amora. Dwol kende ema nuwinjo.

¹³ Nohulonu ratiro singruok ma koro notimo kodu, kochikou mondo urit singruokno, tiende ni rito Chike Apar, mane ondiko kuom kite ariyo mopamore.

¹⁴ To bende e sano Ruoth Nyasaye nochika ni mondo apuonju chike gi buche ma nyaka udhi urit e piny mudhi donjoe mondo ukauw.

¹⁵“Chieng’ mane Ruoth Nyasaye owuoyo kodu Horeb gie mach, ne ok uneno kit gimoro amora,

¹⁶ omiyo ritreuru matek ni kik udonj e richo mar loso kido maket, bed ni en gima chal gi dichwo, kata gi dhako,

¹⁷ kata mana machal gi chiayo, kata gi winyo,

¹⁸kata gi gima mol, kata gi rech.

¹⁹Bende kung’iyo polo, muneno gik moko duto mantie, kaka chieng’ gi due kod sulue, to kik gimoro ywau mondo ukulrunigi kata ulamgi. Gik ma kamago Ruoth Nyasaye osechiwo ni ogendini mamoko e piny duto ka gik ma gilamo.

²⁰ To un e oganda ma Ruoth Nyasaye nokawo, mogolo Misri e sand mager ka mach makakni, ni mondo ubed joge owuon, kaka pod un nyaka chil kawuono.

²¹ To Ruoth Nyasaye ma Nyasachu nokecho koda nikech un, mi okuong’ore ni ok nang’ad aora Jordan, kata donjo e piny maber ma omiyou mondo obed maruno.

²²An to nyaka atho e pinyni mak ang’ado Jordan, to un ubiro dhi loka mondo ukaw piny maberno.

²³Ritreuru mondo une ni wiu ok owil gi singruok mane Ruoth Nyasaye ma Nyasachu osetimo kodu. Kik ulos kido moro amora maket, kukethogo chik mar Ruoth Nyasaye ma Nyasachu,

²⁴ nimar Ruoth Nyasaye ma Nyasachu en mach matieko gik mowang’o, kendo en Nyasaye ma janyiego.

²⁵“Ka usedak e pinyno aming’a munywolo nyithindu gi nyikwau, to beduru motang’ mondo kik udonj e richo kuom loso kido moro amora maket.

²⁶Koro aluongo polo gi piny mondo obed janeno ni, ka timbeu obedo maricho e nyim Ruoth Nyasaye ma Nyasachu kamano, mokecho kodu, to unurum piyopiyo, kendo ok nudag aming’a e piny ma koro ung’ado Jordan mondo udhi ukaw, to notieku chuth.

²⁷ Ruoth Nyasaye noriembu, kendo nokeu e kind ogendini mamoko, mi nudong’ ji manok e kindgi.

²⁸Kuondego unulamie nyiseche molos gi yien kata gi kidi, ma ok nyal neno, kata winjo wach, kata chamo gimoro. Tik gimoro bende ok ginyal winjo.

²⁹ To kudwaro Ruoth Nyasaye ma Nyasachu gi chunyu duto gi adiera kuonde moterouego, to unuyude.

³⁰To mogik, ka gigi otimorenu, mi udonjo e masira, to unudog ir Ruoth Nyasaye ma Nyasachu, kendo unurit chikene.

³¹Ruoth Nyasaye ma Nyasachu en Nyasaye mang’won, omiyo ok nojwang’u, kata kethou ok nokethu, kendo wiye ok nowil gi singruok ma notimo gi kwereu kokuong’ore.

³²“Koro penjuru ane gima notimore e higni machon, ndalo mane pok onywolu, chakre kinde mane Nyasaye ochueyoe dhano e piny. Bende penjuru ane wach, chakre tung’ piny nyaka tung’ piny, ka gima duong’ kamano oseneye kata osewinjie.

³³Bende nitie oganda moro mosewinjo dwond Nyasaye kawuoyo gie mach kaka usewinjo, to kendo pod ngima?

³⁴Koso nitie Nyasaye moro mosetemo golo oganda moro kuom oganda machielo mane oselokogi wasumbni? Bende nyasaye moro osetimo timbe madongo gi ranyisi kod honni, kokedo gi teko maduong’ kendo komiyo ji luoro kod kibaji? To Ruoth Nyasaye ma Nyasachu notimonu gik ma kamago kogolou Misri mana kuneno gi wang’u.

³⁵ Mago duto Ruoth Nyasaye notimo mondo onyisu ni en Nyasaye. Onge Nyasaye moro mak mana en.

³⁶Ne oyienu winjo dwonde gie polo mondo opuonjugo, bende noyienu neno maye malich ei majno.

³⁷Nohero kwereu, moyiero nyikwagi, omiyo en owuon nogolou Misri gi tekone maduong’,

³⁸kendo noriembo ogendini madongo kendo mohewou gi teko, ni mondo udonj e pinygi, kendo ukaw obed maru, kaka pod en nyaka chil kawuono.

³⁹Kuom mano koro beduru gi adiera, kendo ung’e ni Ruoth Nyasaye en Nyasaye, kendo onge nyasaye moro e polo kata e piny.

⁴⁰Emomiyo rituru buche kod chike Nyasaye ma amiyou kawuono. Eka un kaachiel gi nyikwau unubed maber, kendo unudag aming’a e piny ma Ruoth Nyasaye ma Nyasachu miyou mondo obed maru nyaka chieng’.”

⁴¹ Bang’e Musa noyiero mier adek e piny man yo wuokchieng’ mar aora Jordan,

⁴²mondo obed kuonde ma ka ng’ato oboth, monego wadgi ma yande ok gimonrego, to onyalo pondoe. Kochopo e achiel kuom miergo, to oreso ngimane.

⁴³Miergo ne: Bezer-e-thim manie piny gode motarore, mane jo-Reuben nyalo pondoe, gi Ramoth-gilead manie piny Gilead, mane jo-Gad nyalo pondoe, kod Golan manie piny Bashan, mane jo-Manase bende nyalo pondoe.

⁴⁴Koro magi e chike mane Musa omiyo jo-Israel.

⁴⁵Gin e chike gi buche mane Musa onyiso jo-Israel kane gisea Misri,

⁴⁶mi gichopo e piny man yo wuokchieng’ mar aora Jordan e hoho momanyore gi Beth-peor e piny Sihon ruodh Amor modak Heshbon. Musa gi jo-Israel noloyo ruodhno kane gisea Misri,

⁴⁷mi ne gikawo pinye kaachiel gi piny Og ruodh Bashan. Ruodhigo ne mag jo-Amor mane odak e piny man yo wuokchieng’ mar Jordan.

⁴⁸Pinyno nochakore Aroer man e bath holo mar Arnon nyaka got Sirion, ma bende iluongo ni Hermon,

⁴⁹kaachiel gi piny pap duto man yo wuokchieng’ mar aora Jordan, nyaka Nam Kado man e tik got Pisga.