Read luo Rapar mar Chik 6 Bible Online

Rapar mar Chik 6 - luo bible

Rapar mar Chik 6

¹“Koro magi e chike kod buche mane Ruoth Nyasaye ma Nyasachu ochika mondo apuonju uriti e piny mubiro donjoe kendo kawo mondo obed maru.

²E ngimau duto un kaachiel gi nyikwau nyaka uluor Ruoth Nyasaye ma Nyasachu, kendo urit buchene gi chikene ma amiyou kawuono. Bang’e eka unudag maber aming’a.

³Omiyo un jo-Israel winjuru kendo rituru chikego mondo udag maber kendo unya e piny maber kendo momewno, mana kaka Ruoth Nyasaye ma Nyasach kwereu nosingorenu.

⁴ “Winjuru un jo-Israel. Ruoth Nyasaye e Nyasachwa, en e Ruoth Nyasaye, kendo en kende e Nyasaye.

⁵ Heruru Ruoth Nyasaye ma Nyasachu gi chunyu duto, gi parou duto, kendo gi tekou duto.

⁶ Chike ma amiyou kawuonogi, kanuru e chunyu,

⁷kendo puonjgiuru nyithindu. Bende twaguru kuomgi e mier, kata kuwuotho e yo, kata kudhi nindo, kata kuchiew gokinyi.

⁸Tuegiuru ka ranyisi e lwetu, kendo mien-giuru e lend wang’u ka kido,

⁹bende ndikgiuru e sirni mag dhoutu kendo kuom rangeyeu.

¹⁰ “Ruoth Nyasaye ma Nyasachu nokelu e piny mane osesingore ni kwereu ma Ibrahim gi Isaka kod Jakobo ni nomiu. En piny man gi mier mang’eny madongo miwuoro, mane ok ugero,

¹¹kod udi mopong’ gi kit gik moko duto mabeyo ma un ne ok uketoe. En gi sokni mokuny e lwanda ma un ne ok ukunyo, kod puothe mag olemb mzabibu kod mag zeituni mane ok upidho. Kusechiemo, muyieng,

¹²to kik wiu wil gi Ruoth Nyasaye mane ogolou e piny Misri, kuma ne ubedoe wasumbni.

¹³ Luoruru Ruoth Nyasaye ma Nyasachu, kendo utine. Ka ukuong’oru to nyaka ukuong’ru mana gi nyinge.

¹⁴Kik uluw nyiseche mag ogendini mokiewo kodu,

¹⁵nikech kuluwogi, to Ruoth Nyasaye modak e dieru biro kecho kodu ahinya mi dotieku e wang’ piny, nimar Ruoth Nyasaye ma Nyasachu en Nyasaye ma janyiego.

¹⁶ “Kik utem Ruoth Nyasaye ma Nyasachu, kaka nuteme ka un Masa.

¹⁷Nyaka urit malong’o chike Ruoth Nyasaye ma Nyasachu, kaachiel gi wechene kod buchene moko mane omiyou.

¹⁸Timuru gik makare kendo mabeyo e nyim Ruoth Nyasaye, mondo udag maber mi udonj kendo ukaw opiny maber mane osesingore kokuong’ore ni kwereu

¹⁹Obiro riembonu wasiku duto mondo owenu thuolo, kaka nosingore.

²⁰“To e ndalo mabiro ka yawuotu nopenju ni, ‘Weche gi buche kod chike mane Ruoth Nyasaye omiyou, tiendgi ang’o?’

²¹To nudwokgi niya, ‘Ne wan wasumb Farao e piny Misri, to Ruoth Nyasaye nogolowa kuno gi teko maduong’.’

²²Kendo nosando piny Misri gi Farao kod joge duto, kokelonigi masiche madongo gi ranyisi kod honni, kaka ne waneno.

²³Nogolowa kuno mondo oterwa e piny mane osesingore ni kwerewa ni nomiwa.

²⁴Ruoth Nyasaye nochikowa ni mondo warit chikegi duto, kendo ni mondo waluore. Eka dwadag maber ndalo duto, kendo domed ritowa.

²⁵Ka warito chikegi duto e nyim Ruoth Nyasaye ma Nyasachwa, to obiro kwanowa ka joma kare.”