Read luo Rapar mar Chik 7 Bible Online

Rapar mar Chik 7 - luo bible

Rapar mar Chik 7

¹ “Ka Ruoth Nyasaye ma Nyasachu oterou mondo ukaw piny ma ubiro dhiyoeno, noriembnu ogendini abiriyo madongo kendo marateke moloyou, ma gin jo-Hiti, gi jo-Girgash gi jo-Amor gi jo-Kanaan gi jo-Perizi gi jo-Hivi kod jo-Jebus.

²Kosechiwogi e lwetu kamano, muloyogi to nyaka uneggi duto. Kik utim kodgi winjruok, to bende kik uwe mak utiekogi,

³Kik uyie yawuotgi okend nyiu, bende kik yawuotu kend nyigi,

⁴nimar kutimo kamano, to nyigo nolok chuny yawuotu mondo kik lam Ruoth Nyasaye, to olam mana nyiseche mamoko. Mano dimi Ruoth Nyasaye kech kodu, kendo tieku piyopiyo.

⁵ Kuom mano, onego utimnigi mana kama: Mukuru kendegi mag liswa, kendo kethuru sirni maggi milamo mag kite gi mag yien, mi uwang’ kido mag nyisechegi manono,

⁶ nimar un joma owal ni Ruoth Nyasaye ma Nyasachu. Ruoth Nyasaye ma Nyasachu noyierou e kind ji duto mae piny mondo ubed ogandane moyiero.

⁷“Uparo ni Ruoth Nyasaye ma Nyasachu noparou, moyierou nikech ung’eny moloyo ogendini mamoko duto koso? Ooyo, ka adier to un e oganda matinie moloyo.

⁸Noyierou mana nikech noherou, kendo nikech norito singruok mane otimo ni kwereu. Mano emomiyo nogolou gi tekone maduong’ e piny mane unie wasumbini, moresou e lwet Farao ruodh Misri.

⁹ Omiyo koro ng’euru ni Ruoth Nyasaye ma Nyasachu en Nyasaye. En Nyasaye ma jaadiera kendo marito singruokne kuom tienge gana gi gana mag jii mohere kendo momako chikene, koherogi gi hera mosiko.

¹⁰To jogo mochaye kendo ma ok ohere, otieko chuth piyopiyo ma ok odeko.

¹¹Nyaka umak chikene gi buchene ma amiyou kawuononi, kendo uritgi.

¹² “Kuwinjo chikegi kendo uritogi, to Ruoth Nyasaye ma Nyasachu biro rito singruok mane otimo gi kwereu, kendo obiro siko koherou.

¹³Enoheru kendo enogwedhu, mi enomi unya mathoth. Enoguedhu gi nyithindo mang’eny kod gik manyak e pwotheu, kaka ngano gi divai kod mo, kendo enoguedhu gi jamni mang’eny e piny ma nosingore ni kwereu ni nomiu.

¹⁴Unubed joma ogwedhi moloyo ogendini mamoko duto. Ok nobedie bwoch kata lur kuom jou kata kuom jambu.

¹⁵Ruoth Nyasaye notiek tuoche duto kuomu bende ok nokelnu tuoche maricho mane goyou e piny Misri, to wasiku ema nokelne tuochego.

¹⁶Tiekuru ji duto ma Ruoth Nyasaye ma Nyasachu biro chiwo e lwetu. Kik uwegi, to bende kik ulam nyisechegi, nikech kutimo kamano, to mano dibednu obadho.

¹⁷“Dipo ka uwacho niya, ‘Ogendinigi ng’eny mohingowa. Ere kaka dwariembgi?’

¹⁸Kata kamano kik uluorgi, to paruru gik ma Ruoth Nyasaye ma Nyasachu notimo ni Farao kendo ni piny Misri ngima.

¹⁹Paruru timbe madongo mane uneno gi wang’u kod ranyisi gi honni kaachiel gi teko maduong’ mane Ruoth Nyasaye ma Nyasachu ogolougo Misri gi bat morie. Kamano e kaka obiro timo ni ogendini duto muluorogo.

²⁰Bende obiro miyogi kihondko, mondo otiek joma pod odong’, kata mago mopondo kamoro amora.

²¹Kik luoro maku kukedo kodgi, nimar Ruoth Nyasaye ma Nyasachu, ma en Nyasaye maduong’ kendo malich ni kodu.

²²Obiro riembonu ogendinigo matintin nyaka girum. Ok unutiekgi dichiel, nimar dipo ka ondiegi onywolore mang’eny, mothagou.

²³To Ruoth Nyasaye ma Nyasachu nochiw ogendinigo e lwetu, kendo ok nowenigi thuolo nyaka chop girum te.

²⁴Enochiw ruodhi mag ogedinigo e lwetu, mi unumi kargi lal chuth, kendo onge kata ng’at achiel kuomgi ma nosiru, to unutiekgi pep.

²⁵Nyaka uwang’ kido mag nyisechego manono, kendo kik ugomb fedha gi dhahabu ma gibawogo nyisechegigo, bende kik ukawgi. Kutimo kamano, to enobednu obadho, nimar gigo gin gik makuero e nyim Ruoth Nyasaye ma Nyasachu.

²⁶Kik ukel gimoro amora makuero e miechu, nikech kutimo kamano, to un bende unubed joma okwedi. Nyaka ubed mosin kod gik ma kamago, kendo ukwan-gi ka gik makuero, nikech gin gik ma nyaka utiek, marum chuth.