Read luo Rapar mar Chik 8 Bible Online

Rapar mar Chik 8 - luo bible

Rapar mar Chik 8

¹“Nyaka urit chike duto ma amiyou kawuononi, mondo ubed mangima, mi unya, kendo udonj e piny mane Ruoth Nyasaye osingore ni nomi kwereu, odagie.

²Paruru wuoth mabor mane Ruoth Nyasaye ma Nyasachu otelonue kuom higni piero ang’wen ka un e thim. Nodwokou piny kotemougo, mondo ong’e ane ka unyalo rito chikene adier.

³ Nodwokou piny, kendo nomiyo kech okayou, eka bang’e nomiyou manna mondo ucham. En chiemo mane pok uneno, kendo kwereu bende ne ok oneno. Notimo kamano mondo onyisugo ni dhano ok bed mangima nikech chiemo kende, to obedo mangima gi weche duto mawuok e dho Ruoth Nyasaye.

⁴Kuom higni piero ang’wen go duto, lepu ne ok oti, kata tiendu ne ok okuot.

⁵To nyaka ung’e ni Ruoth Nyasaye ma Nyasachu ne rieyou mondo opuonju mana kaka ng’ato puonjo nyathine.

⁶Rituru chike Ruoth Nyasaye ma Nyasachu mondo uwuoth e yorene, kendo umiye duong’,

⁷nimar Ruoth Nyasaye ma Nyasachu terou e piny maber, motimo aore gi sokni, kendo man gi kuonde ma pi wuokie ewi gode kendo e holni.

⁸En piny machiego cham kaka ngano gi shairi, kendo machiego mzabibu gi ng’owo gi zeituni kod olembe mamoko, bende ma mor kich ng’enyie.

⁹En piny ma unubedie gi chiemo mang’eny, kendo onge gima unuchandie. Bende en piny man gi kite miloso nyinyo. Mula bende unyalo kunyo e godene.

¹⁰Kusebedo gi chiemo mang’eny, moromou, to pakuru Ruoth Nyasaye ma Nyasachu kuom piny maber mosemiyouno.

¹¹ “Kik wiu wil gi Ruoth Nyasaye ma Nyasachu, kendo kik uwe rito chikene gi buchene ma amiyou kawuononi.

¹²Kusebedo gi chiemo mang’eny moromou, kendo usegero udi mabeyo mudakie,

¹³mi jambu gi fethu gi dhahapu kod mwanduu duto omedore,

¹⁴to kik ubed josunga, mi wiu wil gi Ruoth Nyasaye ma Nyasachu mane ogolou Misri kuma nubedoe wasumbni,

¹⁵nimar notelonu e thim maduong’ kendo malich, kuma otwo ma onge pi, kendo ma thuonde man gi kwiri maricho kod thomoni opong’o. En ema nomiyo pi owuoknu e lwanda motegno,

¹⁶bende nomiyou manna mane kwereu pok ong’eyo mondo ucham e thim. Notimo kamano mondo odwokugo piny, kotemou, eka bang’e ogwedhu.

¹⁷Emomiyo kik uwach ni tekou gi riekou ema osemiyo uyudo mwandugo,

¹⁸to paruru Ruoth Nyasaye ma Nyasachu, nimar en ema omiyou teko mar yudo mwandu. Kamano ochopo singruok mane omiyo kwereu, kokuong’ore.

¹⁹“To kapo ni wiu owil gi Ruoth Nyasaye ma Nyasachu, muluwo nyiseche mamoko, mi ulamogi kendo ukulorunigi, to akuong’ora kawuono ni natieku ma onge kiawa.

²⁰Adier, ka ok uluoro Ruoth Nyasaye ma Nyasachu, to notieku mana kaka ogendini ma obiro tieko ka odonjo e pinyni.