Read luo Rapar mar Chik 9 Bible Online

Rapar mar Chik 9 - luo bible

Rapar mar Chik 9

¹“Winjuru un jo-Isarel. Kawuono ubiro ng’ado Jordan mondo udhi ukaw piny ogendini marateke kendo madongo moloyou, kaachiel gi mier mochiel gi ohinga mochopo e polo.

²Gin joma dongo kendo maboyo ma nyikwa Anakim, kaka ung’eyo, nimar usewinjo ka iwacho niya, ‘Ere joma nyalo siro nyikwa Anakim?’

³To ubiro ng’eyo kawuono ni Ruoth Nyasaye ma Nyasachu ema otelonu kachalo mach matieko gik mowang’o. Obiro tiekogi en owuon, kendo obiro loyonugi. Kuom mano, ubiro riembogi kendo tiekogi piyopiyo, mana kaka Ruoth Nyasaye nosingorenu.

⁴“Ka Ruoth Nyasaye ma Nyasachu riembo jogo mondo owenu thuolo, to kik uwach ni timbeu mabeyo ema osemiyo Ruoth Nyasaye okelou e pinyni.

⁵Ok timbeu mabeyo kata dimbruok ma un-go ema omiyo ubiro donjo e piny jogo mondo ukaw, to en mana nikech richo mag ogendinigo emomiyo Ruoth Nyasaye ma Nyasachu riembogi mondo giwenu thuolo, kochopogo singruok ma notimo gi kwereu ma Ibrahim gi Isaka kod Jakobo.

⁶Kuom mano koro ng’euru ni Ruoth Nyasaye ma Nyasachu ok miu piny momewni nikech timbeu mabeyo, nimar ka adier, to un joma tokgi tek.

⁷“Paruru ma wiu ok owil kaka numiyo Ruoth Nyasaye ma Nyasachu mirima e thim, chakre chieng’ ma ne uwuokie Misri nyaka chieng’ mane uchopoe ka, usebedo kutamoru winjo Ruoth Nyasaye.

⁸Nukwinye e got Horeb, mokecho kodu, kendo odwaro tiekou.

⁹ Noyudo ka asedhi ewi got mondo akaw kite mopamore mag singruok ma Ruoth Nyasaye otimo kodu, mi ne abet ewi got kuno kuom ndalo piero ang’wen, odiechieng’ gotieno, ka ok achiem kata ok amadh gimoro.

¹⁰Eka Ruoth Nyasaye nomiya kite ariyo mopamore, mondik gi lith lwete. Weche duto mane Ruoth Nyasaye owachonu gie mach ewi got chieng’ chokruok, ondiki e kitego.

¹¹Kane ndalo piero ang’wen-go orumo, Ruoth Nyasaye nomiya kite ariyo mopamore mag singruokgo,

¹²kowachona niya, ‘Lor piny piyopiyo ia e got, nikech jou mane igolo Misri osetimo marach. Piyopiyo nono, giseweyo yo mane achikogi ni mondo giluw, mi giloso kido mar dhahabu moleny mondo gilam.’

¹³“Bang’ mano Ruoth Nyasaye nowachona niya, ‘Aserango jogi, ma ayudo ni gin joma tokgi tek.

¹⁴We mondo atiekgi, kendo ami nyinggi olal e piny duto. Bang’e anamiyi doko oganda maratego kendo maduong’ moloyogi.’

¹⁵Kamano nawichora mi alor piny kaa ewi got mane oyudo wang’, ka ating’o kite mopamore mag singruok e lweta.

¹⁶Naneno ni useketho e nyim Ruoth Nyasaye kuom loso kido mar nyaroya gi dhahabu moleny, kendo ni piyopiyo nono, useweyo yo mane Ruoth Nyasaye ochikou mondo uluw.

¹⁷Omiyo nakawo kite ariyo mopamorego, mawito piny gi lwetena ariyo, mi ne ging’inyore matindotindo e nyimu.

¹⁸Eka nariera piny e nyim Ruoth Nyasaye kuom ndalo piero ang’wen odiechieng gotieno, kaka nasetimo e kinde mokwongo, mi ariyo kech ka ok achiem kata ok amadh gimoro, nikech richo duto mane usetimo kuketho e nyim Ruoth Nyasaye, kendo kumiye mirima.

¹⁹ Naluoro mirima mager mar Ruoth Nyasaye mane chiegni tiekou, to Ruoth Nyasaye nochako owinjo ywakna.

²⁰Ruoth Nyasaye nokecho gi Harun ahinya, kendo nodwaro tieke, to e sano en bende ne alemone.

²¹Eka nakawo gima nukethogo, ma en kido mar nyaroya mane uloso, mi awang’o e mach. Ne atoye matindotindo mi arege, molokore buru, kendo nakawo buruno makiro e aora mamol koa e got.

²² “Bende numiyo Ruoth Nyasaye mirima ka un Tabera gi Masa kod Kibroth-hataava,

²³ kendo kane un Kadesh-barnea, Ruoth Nyasaye ma Nyasachu nowacho ni mondo udhi ukaw piny momiyou, to nudagi winjo wachne, kendo ne ok ugeno kuome, bende ne ok urito chikne.

²⁴Usebedo kudagi Ruoth Nyasaye chakre chieng’ mokwongo mane ang’eyoue.

²⁵“Nariera piny e nyim Ruoth Nyasaye kuom ndalo piero ang’wen, odiechieng’ gotieno nimar nosewacho ni odwaro tiekou.

²⁶Nalamo Ruoth Nyasaye kakwaye niya, ‘A Ruoth Nyasaye ma Ruodha, kik itiek jogi, nimar gin mwanduni mane iwaro gi tekoni maduong’, mi igolo Misri gi bat motegno.

²⁷Par jotichni ma Ibrahim gi Isaka kod Jakobo, kendo kik idew wich teko gi kethruok kod richo mag jogi,

²⁸nikech ka ok kamano to weg piny mane igolowae biro wacho niya, “Ruoth Nyasaye osetero joge e thim mondo otho kuno, nikech osin kodgi, kendo nikech ok onyal terogi e piny mane osesingore ni nomigi.”

²⁹To Ruoth Nyasaye, jogo gin jogi kendo mwanduni iwuom mane igolo e piny Misri gi tekoni maduong’ kod bat morie.’