Read luo Johana 10 Bible Online

Johana 10 - luo bible

Johana 10

¹Yesu nodhi nyime kowacho niya, “Adier, adier, awachonu ni, ng’at ma ok oluwo dhorangach ka donjo e duond rombe, to donjo mana gi kamoro nono, en jakuo kendo jamecho.

²Jakwadh rombe to donjo mana gi e dhorangach.

³En ema jarit rangach yawone. Rombe bende winjo duonde koluongogi achiel achiel gi nyinggi kogologi oko.

⁴Kosegologi duto to otelonigi, kendo giluwe, nikech ging’eyo duonde.

⁵Ok ginyal luwo ng’ama gikia nikech ok ging’eyo duonde, omiyo giringo aringa.”

⁶Kata obedo ni Yesu nogoyonigi ngerono, to ne ok giwinjo tiende.

⁷Emomiyo nowachonigi niya, “Adier, adier, awachonu ni an e dhoranga duond rombe.

⁸Ji duto mane obiro mokwongona ne jokuo kendo jomecho, kendo rombe ne ok odewogi.

⁹An to an e dhorangach. Ng’at mokadho kuoma ema nokwo. Ng’atno nodonj kendo nowuog oko, mi nonwang’ lek maber mokwayoe.

¹⁰Jakuo biro mana ni mondo okwel, kendo oneki, kendo oketh gik moko. Anto asebiro ni mondo ji oyud ngima kendo obed ngima moromo chuth.

¹¹“An e jakwath maber. To ung’eyo ni jakwath maber chiwo ngimane nikech rombe.

¹²Jakwath mondiki, ma ok jakwath ma wuon rombe, to ringo weyo rombe koneno ka ondiek biro. Kuom mano ondiek gore kuom rombe kendo keyogi.

¹³Ng’atno ringo nikech ondike andika, omiyo ok odew rombe.

¹⁴ An to, an jakwath maber. Ang’eyo rombena, kendo gin bende ging’eya,

¹⁵mana kaka Wuora ong’eya, kendo an bende ang’eyo Wuora. Mano emomiyo ayie chiwo ngimana nikech romba.

¹⁶To bende an gi rombe moko ma ok ni e duondni. Gin bende nyaka akelgi, kendo giniwinj duonda, eka rombe duto nobed kueth achiel man gi jakwath achiel.

¹⁷“Wuora ohera nikech ayie chiwo ngimana mondo chieng’ moro achak ayude kendo.

¹⁸Onge ng’at manyalo mayago, to an ema ayie chiwe, nikech mano ema ahero timo. An gi teko mar chiwe, bende an gi teko mar kawe kendo. Wuora ema osenyisa mondo atim kamano.”

¹⁹Wechego nomedo kelo pogruok e kind jo-Yahudi giwegi.

²⁰Ji mang’eny kuomgi nowacho ni, “Jachien ni kode, kendo ojaneko! Ang’o momiyo uchiko itu ne wechene?”

²¹Jomoko to nowacho ni, “Onge ng’at man gi jachien manyalo wacho weche ma kamagi. Bende uparo ni jachien diyaw wang’ ng’at mamuofu?”

²²Noyudo ndalo mar Sap Pwodho Hekalu ochopo, kendo ne en ndalo chwiri.

²³To Yesu nonwang’o wuotho e Hekalu e agola miluongo ni Agoch Solomon.

²⁴Eka jo-Yahudi nochokore molwore, mi openje ni, “Ibiro miyo wariwo gi kiawa nyaka karang’o? Ka in e Mesia to nyiswa ane malongo!”

²⁵Yesu nodwokogi ni, “Asenyisou, to utamoru yie. Gik ma atimo e nying Wuora ema wuoyonu kuoma.

²⁶To un ok uyie, nikech ok un e kueth romba.

²⁷Romba ong’eyo dwonda, kendo an bende ang’eyogi, kendo giluwo bang’a.

²⁸Amiyogi ngima ma nyaka chieng’, kendo ok ginilal ngang’, bende onge ng’at manyalo gologi e lweta.

²⁹Wuora mane omiyagi duong’ moloyo gik moko duto kendo onge ng’at manyalo gologo e lwete.

³⁰Wan gi Wuora wan gimoro achiel.”

³¹Kane jo-Yahudi owinjo wachno, ne gichako gikwanyo kite kendo mondo gigogo Yesu.

³²Omiyo Yesu nopenjo gi ni, “Asenyisou gik mabeyo mang’eny ma asetimo gi teko mar Wuora. To kuom tijena go duto, ere ma omiyo odwaro goya gi kite?”

³³ To jo-Yahudi nodwoke ni, “Ok wadwar goyi nikech gimoro maber misetimo, to wagoyi mana nikech ipiem gi Nyasaye, nimar in mana dhano, to eka iwacho ni in Nyasaye!”

³⁴ Yesu nowachonigi ni, “Donge ondiki e Kitap Chiku ni Nyasaye owacho ni, un nyiseche?

³⁵To wang’eyo malong’o ni wach Nyasaye ok nyal lokore.

³⁶Kane Nyasaye oluongo joma ne wachne obironigi ni, ‘Nyiseche’ kamano, koro ere gima omiyo uwacho ni apiem gi Nyasaye, ka awacho ni an Wuod Nyasaye? To an ema Nyasaye ne oyiera, mi oora e piny ka!

³⁷Ka uneno ni ok ati tich Wuora, to kik uyie koda.

³⁸To ka atiyo tichne, to kata ka ok unyal yie koda, to onego uyie gi tich matiyo, mondo ung’e chutho ni an ei Wuora kendo Wuora ni eiya.”

³⁹Kane giwinjo wachno, ne gitemo make kendo, to nopondo motony.

⁴⁰ Bang’ mano, Yesu nong’ado aora Jordan modhi loka kuma ne Johana obatisoe ji mokwongo, mi nodak kuno.

⁴¹Ji mang’eny ne obiro ire, mowacho niya, “Johana ne ok otimo honni, to gik moko duto mane owacho kuom jali gin adiera chutho.”

⁴²Kamano ji mang’eny, ne oyie kuom Yesu kuno.