Read luo Johana 11 Bible Online

Johana 11 - luo bible

Johana 11

¹ Ng’at moro ma nyinge Lazaro, mane odak Bethania, ne tuo. Bethania e dala mane Maria odakie kod Maritha nyamin mare

² Maria ema ne owiro Ruoth Yesu gi mo mang’ue ng’ar, kendo oyweyo tiendene gi yie wiye. Ne en nyamin Lazaro, mane tuo.

³Nyimine Lazaro nooro ni Yesu wach niya, “Ruoth, osiepni mihero tuo.”

⁴To kane Yesu owinjo wachno, nowacho ni, “Tuono ok en mar tho, to osebiro mana ni mondo Wuod Nyasaye bende oyud duong’.”

⁵Yesu nohero Maritha gi nyamin mare kod Lazaro.

⁶To kata kamano ne otieko ndalo ariyo kuma ne entie bang’ winjo ni Lazaro tuo.

⁷Eka nowacho ni jopuonjrene ni, “Wadoguru Judea.”

⁸To jopuonjrene nowachone niya, “Japuonj, donge jo-Yahudi yandi dwaro goyi gi kite? Ang’o momiyo pod idwaro dok kuno?”

⁹Yesu nodwokogi ni, “Donge odiechieng’ achiel nigi seche apar gariyo? Ka ng’ato wuotho godiechieng’, to ok onyal chwanyore, nikech oneno ler mar pinyni.

¹⁰To ka owuotho gotieno, to ochwanyore nikech ler ongene.”

¹¹Bang’ mano Yesu nomedo wacho niya, “Lazaro osiepwa nindo otero, to adhi mondo achiewe.”

¹²Jopuonjrene nowachone ni, “Ruoth, ka nindo osetere, to kara obiro kwo.”

¹³Ne giwacho kamano nikech ne gigalo ni Yesu loso kuom nindo mar yueyo, to chutho noloso mana kuom tho mar Lazaro.

¹⁴Mano omiyo koro nowachonigi ratiro ni, “Lazaro osetho.

¹⁵To amor ni yandi ok an kuno, nikech mano biro konyou, mi uyie. Omiyo wadhiuru ire.”

¹⁶Eka Thoma mane onywol rude, nowacho ni jopuonjre wetene niya, “Wan bende wadhiuru mondo watho kode.”

¹⁷Kane Yesu ochopo, noyudo ni Lazaro osetieko ndalo ang’wen e bur.

¹⁸Bethania ne chiegni gi Jerusalem ma dirom kilomita adek,

¹⁹omiyo jo-Yahudi mang’eny nobiro duogo chuny Maritha gi Maria kuom tho owadgi.

²⁰Kane Maritha owinjo ni Yesu biro, nowuok mondo oromne, to Maria nodong’ e ot.

²¹Maritha nowacho ni Yesu niya, “Ruoth, ka da bed ni nyocha in ka, to owadwa ok dotho.

²²To kata kamano sani, ang’eyo ni Nyasaye biro timoni gimoro mikwaye.”

²³Yesu nodwoke ni, “Owadu biro chier.”

²⁴To Maritha nowachone ni, “Ang’eyo ni nochier chieng’ giko piny.”

²⁵Yesu nowachone niya, “An e chier, kendo an e ngima. Ng’ato ang’ata moyie kuoma nodok mangima, kata obedo ni osetho,

²⁶kendo ng’at mangima moyie kuoma ok notho nyaka chieng’. Bende iyie wachni koso?”

²⁷Maritha nodwoke ni, “Ee, Ruoth, ayie ni in e Mesia, Wuod Nyasaye, mane onego bi e piny.”

²⁸Kane Maritha osewacho wechego, nodhi oluongo Maria nyamin mare ling’ling’, mowachone niya, “Japuonj ni ka, kendo oluongi.”

²⁹Kane Maria owinjo kamano, noa malo piyo, mi odhi ir Yesu.

³⁰Noyudo ka Yesu pok odonjo e dala, to ne pod ochung’ mana kama ne Maritha oromonee.

³¹Jo-Yahudi mane ni kod Maria e ot ka duogo chunye, nonene kochung’ piyopiyo, mowuok oko. Omiyo ne giluwe, ka giparo ni odhi ywak e liel.

³²Kane Maria ochopo kama Yesu nitie, monene, nogoyo chonge piny e nyime, mowachone niya, “Ruoth, ka da bed ni nyocha in ka, to owadwa ok dotho!”

³³Yesu noneno Maria gi jo-Yahudi mane ni kode kaywak, mi mirima nomake, kendo noneno malit.

³⁴Eka nopenjo ni, “Uyike kanye?” Ne gidwoke ni, “Jaduong’, bi ine.”

³⁵Pi wang’ Yesu nochuer.

³⁶Omiyo jo-Yahudigo nowacho ni, “Neyeuru kaka yandi ohero Lazaro!”

³⁷To moko kuomgi nowacho niya, “Jali noyawo wang’ muofu! Donge ne onyalo geng’o tho monego Lazaroni?”

³⁸Mirima nochako omako Yesu kendo, mi odhi but liel, mane en bur mokuny ariwa e lak got, moket kidi e dhoge.

³⁹Yesu nowachonigi niya, “Goluru kidi oko e dho liel.” To Maritha, ma nyamin jal motho, nowachone ni, “Ruoth, koro osetieko ndalo ang’wen e bur, omiyo nyaka bed ni koro odum.”

⁴⁰To Yesu nodwoke ni, “Donge nende awachoni ni ka in gi yie, to ibiro neno duong’ mar Nyasaye?”

⁴¹Kuom mano ne ging’ielo kidi oko. Yesu nong’iyo malo, mowacho niya, “Wuora, agoyoni erokamano nikech isewinja.

⁴²An ang’eyo ni iwinja ndalo duto, to asewacho wechegi mondo oganda mochung’ ka ong’e ni in ema niora.”

⁴³Kane osewacho kamano, nokok matek niya, “Lazaro, wuog oko!”

⁴⁴Eka jal mothono nowuok, ka tiendene gi luetene obo gi nanga mar yik, kendo ka wang’e bende obo gi kitamba. Yesu nowachonigi niya, “Gonyeuru mondo odhi.”

⁴⁵Jo-Yahudi mang’eny mane obiro duogo chuny Maria noneno gima Yesu otimo, mi giyie kuome.

⁴⁶To moko kuomgi nodok ir jo-Farisai, mohulonigi gima Yesu osetimo.

⁴⁷Omiyo jo-Farisai kod jodolo madongo noluongo buchgi maduong’, mi openjore ni, “Ng’atni timo timbe madongo mang’eny! Wan to watimo ang’o?

⁴⁸Ka waweye odhi nyimekamano, to ji duto biro yie kuome, kendo jo-Rumi dibi, mi keth Hekaluwa, kendo tiek jowa duto.”

⁴⁹To ng’at achiel kuomgi, ma nyinge Kaiafa, mane jadolo maduong’ e higano, nowachonigi ni, “Un ok ung’eyo gima onego utim!

⁵⁰Donge ber ka ng’at achiel otho, moloyo ka ogandawa duto orumo?”

⁵¹Ne ok owacho kamano gi riekone owuon, to kaka ne en jadolo maduong’ e higano, ne okoro wach ni Yesu biro tho ni oganda jo-Yahudi.

⁵²To ne ok okoro ni Yesu biro tho mana ne jo-Yahudi kende, to ni obiro tho mondo ochok nyithind Nyasaye obed e kanyakla achiel.

⁵³Chakre chieng’no ne gichako chano kaka digineg Yesu.

⁵⁴Kuom mano, Yesu koro ne ok wuoth ratiro kama jo-Yahudi nitie, to noa kuno modhi e dala moro miluongo ni Efraim, mane nitie gweng’ moro momanyore gi thim, mi obet kuno gi jopuonjrene.

⁵⁵Sap jo-Yahudi mar Pasaka koro ne chiegni, omiyo ji mang’eny moa e gwenge mopogore opogore ne dhi Jerusalem mondo opwodhre, obed moikore ni sawono.

⁵⁶Ne gimanyo Yesu, kendo kane ginie Hekalu ne gipenjore ni, “Uparo nadi? Bende dobi e sawoni adier?”

⁵⁷Ne giwacho kamano nikech noyudo jodolo madongo gi jo-Farisai osegolo chik ni ka ng’ato ong’eyo kama Yesu nitie, to nyaka ohul, mondo omake.