Read luo Johana 15 Bible Online

Johana 15 - luo bible

Johana 15

¹“An e mzabibu maradier, kendo Wuora e japur mzabibuno.

²Bedena duto ma ok nyag olemo, ong’ado oko, to bede duto ma nyago olemo olwero maler mondo omed nyak.

³Un koro osedoko maler nikech wach ma asewachonu.

⁴Beduru e iya kaka an bende abet e iu. Kaka bad mzabibu ok nyal nyago olemo kende, ka ok en kuom yath mzabibu, e kaka un bende ok unyal nyago gimoro, kapok ubet e iya.

⁵“An e mzabibu, to un, un bedene. Ng’at mobet kuoma, kaka abet kuomu, nyago olemo mang’eny, nikech ka upogoru koda, to ok unyal gimoro.

⁶Ka ng’ato ok obet kuoma to iwite oko, mana kaka iwito bad yath, mi two. Bede ma kamago ichoko, kendo iwito e mach, mi wang’.

⁷Ka ubet kuoma, kendo wachna obet kuomu, to gimoro amora mukwayo notimnu.

⁸Ka unyago olemo mang’eny, to umiyo Wuora duong’. Kamano unyiso ni un jopuonjrena.

⁹Kaka Wuora osehera, e kaka an bende aseherou. Sikuru e herana.

¹⁰Ka urito chikna, to eka usiko e herana, mana kaka an bende aserito chik Wuora, kendo asiko e herane.

¹¹“Awachonu wechegi mondo un bende ubed gi mor ma an-go, kendo mondo mor ma un-gono obed moromo chuth.

¹² Chik ma amiyou e ma: herreuru mana kaka aherou.

¹³Onge hera maduong’ ma ng’ato nyalo herogo osiepne, moloyo chiwonigi ngimane.

¹⁴Ka utimo gik ma achikou, to eka un osiepena.

¹⁵Chakre kawuono ok nachak aluongu kendo ni wasumbini, nikech misumba ok ong’eyo gima ruodhe timo. To aluongou ni osiepena, asenyisou gik moko duto ma Wuora osenyisa.

¹⁶Un ne ok uyiera, to an ema ne ayierou, mi awalou mondo udhi unyag olemo, kendo mondo olemo munyagono osiki, mondo Wuora omiu gimoro amora mukwaye e nyinga.

¹⁷To chik ma amiyou en ni, herreuru e kindu uwegi.

¹⁸“Ka piny mon kodu, to nyaka ung’e ni nomon koda chon, kane pok omon kodu.

¹⁹Ka da bed ni un mag pinyni, to da piny ohero gire owuon. To piny mon kodu nikech aseyierou kuom piny, omiyo koro ok un mag piny.

²⁰ Paruru gima nawachonu ni, ‘Misumba ok duong’ moloyo ruodhe.’ Ka an ema gisanda, to un bende nyaka gisandu, to ka girito wachna, to wachu bende giniriti.

²¹To ginitimnu kamano mana nikech an, nimar gikia Jal mane oora.

²²Ka dine ok abiro mi awuoyo kodgi, to da ok gibedo joketho. Koro to onge kaka digiriasre.

²³Ng’at mamon koda, to mon gi Wuora bende.

²⁴Ka dine ok atimonigi honni ma ng’ato pok otimo, to da ok gibedo joketho. To giseneno gik matimo, to pod gimon amona koda kaachiel gi Wuora bende.

²⁵ Mago duto nyaka timre mondo ochop weche mondiki e Chikgi ni, ‘Ne gimon koda kayiem nono.’

²⁶“Abiro oronu Jakony koa kuom Wuoro. En Roho mar adiera moa kuom Wuoro. Ka osebiro to enonyisu wach kuoma.

²⁷Un bende ununyis ji wach kuoma, nikech usebet koda nyaka ne achak tija.