Read luo Johana 17 Bible Online

Johana 17 - luo bible

Johana 17

¹Kane Yesu osetieko wacho wechego, nong’iyo polo, mowacho niya, “Wuora, sana koro osechopo. Mi wuodi duong’.

²Isemiye teko kuom ji duto, mondo en bende ochiw ngima ma nyaka chieng’ ni ji duto misemiye.

³Ka ng’ato ong’eyi, in Nyasaye ma achiel kende, kendo ong’eyo Jal mane ioro, ma en Yesu Kristo, to en gi ngima ma nyaka chieng’.

⁴Asemiyi duong’ e pinyka kuom tieko tich mane imiya mondo ati.

⁵A Wuora, koro miya duong’ kabedo kama intie. Ee, miya duong’ mane an-go kodi kane piny pok obetie.

⁶“Asemiyo joma ne igolo e piny ong’eyo kaka ichal. Ne gin jogi, kendo in ema nimiyagi. Giserito wachni,

⁷kendo koro ging’eyo ni gik moko duto misemiya wuok mana kuomi.

⁸Asehulonigi wach mane imiya, mi girwako, kendo giseng’eyo maonge kiawa ni ne aa iri adier, bende giseyie ni in ema ne iora.

⁹“Koro gin ema akwayonigi. Ok akwa ni piny, to akwayo mana ni joma ne imiya, nikech gin jogi.

¹⁰Giga duto gin magi; gigi bende gin maga, kendo kuomgi ema aseyudoe duong’ maler.

¹¹An koro ok anie piny, nimar abiro iri. To gin pod ginie piny. A Wuoro Maler, ritgi gi teko mar nyingi ma isemiya, mondo gibed achiel, mana kaka wan kodi wan achiel.

¹² Kane an kodgi, to ne aritogi gi teko mar nyingi mane imiya. Naritogi maber mi kata achiel kuomgi ne ok olal, mak mana jal mane ochunore ni nyaka lal mondo gima ondiki e Muma otimre.

¹³An koro abiro iri, omiyo awacho gigi e piny mondo jopuonjrenagi obed gi mor ma an-go, kendo morno mondo obed moromo chuth.

¹⁴Asenyisogi wachni, mi piny odoko mamon kodgi, nikech ok gin mag piny, mana kaka an bende ok an mar pinyni.

¹⁵Ok akwa ni mondo igolgi e piny, to akwayo mana ni mondo iritgi kuom Ng’ama Rach.

¹⁶Gin ok gin mag piny, mana kaka an bende ok an mar piny.

¹⁷Walgi gichiwreni kuom adiera. Wachni en adiera.

¹⁸Aseorogi e piny mana kaka in bende ne iora e piny.

¹⁹Achiworani nikech gin, mondo gin bende gibed joma owalni kuom adiera.

²⁰“Ok gin kende ema akwayonigi, to akwayo bende ni jogo moyie kuoma nikech wach ma gilando.

²¹Wuora, mi gibed achiel. Kaka in kuoma, kendo kaka an kuomi, e kaka bende gibed kuomwa, mondo piny oyie ni in ema niora.

²²Asemiyogi duong’ mane imiya, mondo gibed achiel kaka wan bende wan achiel,

²³ka an kuomgi, kendo in kuoma. Kamano gibed malong’o nyaka chop gibed achiel chutho, mondo piny ong’e ni niora, kendo iherogi kaka ihera.

²⁴“Wuora, adwaro mondo joma isemiyagi obed koda kama intie, mondo gine duong’ ma isemiya, nikech nihera kapok ochwe piny.

²⁵A Wuora makare, kata obedo ni piny ok ong’eyi, an to ang’eyi, kendo jogi bende ong’eyo ni ne iora.

²⁶Asemiyo ging’eyi, kendo abiro medo miyo ging’eyi, mondo hera miherago obed kuomgi, kendo an bende abed kuomgi.”