Read luo Johana 20 Bible Online

Johana 20 - luo bible

Johana 20

¹To chieng’ Jumapil, kane piny pod huyuhuyu, Maria nyar Magdala nodhi e liel moyudo ka kidi oseng’iel oko e dho liel.

²Kuom mano noringo odhi ir Simon Petro kod japuonjre mane Yesu ohero cha, mowachonigi niya, “Gisegolo ringre Ruoth e liel, to wakia kama giketee.”

³Eka Petro gi japuonjre machielo nowuok modhi e liel.

⁴Ji ariyogo noringo kaachiel, to japuonjre machielono noyombo Petro, mi okwongone chopo e liel.

⁵Nolung’ore, moneno nanga mane obogo Yesu ka ni piny kanyo, to ne ok odonjo ei liel.

⁶Simon Petro bende nobiro kalawe. En to nodonjo ei liel moneno nangano piny kanyo.

⁷Kitamba mane onalgo wi Yesu, to ne ok ni kaachiel gi nanga machielono, to nokete yore kar kende, kapod odolore adola.

⁸Bang’e japuonjre machielo mane okwongo chopo e liel cha bende nodonjo ei liel moneno gik mantie, mi oyie.

⁹Nyaka chop kindeno ne pok ging’eyo tiend gima Muma wacho ni nyaka ochier oa kuom joma otho.

¹⁰Bang’e jopuonjrego nodok dala.

¹¹Maria to noyudo ochung, e dho liel kaywak. Kane oywak kamano, ne olung’ore mong’iyo i liel,

¹²mi oneno malaika ariyo morwako lewni marachere, ka achiel obet yo ka wi kama noketie ringre Yesu, to machielo obet yoka tiende.

¹³Ne gipenje ni, “Nyarwa, ang’o momiyo iywak?” To ne odwokogi ni, “Gisegolo ruodha, to akia kama giketee.”

¹⁴Kane osewacho kamano, nowichore, moneno Yesu kochung’ kanyo, to ne ok ong’eyo ni en Yesu.

¹⁵Yesu nopenje niya, “Nyako ang’o momiyo iywak? Imanyo ng’a?” Maria ne galo ni Yesu en jarit puodho, omiyo nowachone niya, “Jaduong’, ka in ema igole, to nyisa kama iketee, mondo adhi akawe.”

¹⁶Yesu noluonge ni, “Maria!” Eka Maria nowichore, mowachone gi dho Hibrania ni, “Raboni!” tiende ni, “Japuonj”.

¹⁷To Yesu nowachone ni, “We maka, nikech pok aidho adhi ka Wuora, to dhiyo ir owetena, mondo iwachnigi ni, an aidho adhi ka Wuora ma bende Wuonu. Adier, adhi ka Nyasacha ma Nyasachu.”

¹⁸Maria nyar Magdala nodhi mowacho ni jopuonjre ni oseneno Ruoth, kendo nonyisogi weche mane Yesu owachone.

¹⁹Chieng’ Jumapilno, kane piny oyuso, jopuonjre ne nie ot, kendo ne gichiego dhoudi nikech ne giluoro jo-Yahudi. Eka Yesu nobiro mochung’ e diergi, kendo omosogi ni, “Okueuru!”

²⁰Kane osemosogi kamano, nonyisogi luetene kod ng’etne, mi ne gidoko mamor kuom neno Ruoth.

²¹Yesu nowachonigi kendo niya, “Kue obed kodu! Kaka ne Wuora oora, e kaka an bende koro aorou.”

²²Kane osewacho kamano, nokudho muche kuomgi, mowachonigi niya, “Nwang’uru Roho Maler.

²³ Joma uweyonigi richogi, ema richogi owenigi, to joma ok uweyonigi richogi, to richogi ok owenigi.”

²⁴To Thoma (tiende ni, ng’ama onywol rude), mane achiel kuom jopuonjre apar gariyo, ne ok ni kodgi e kinde mane Yesu obirono.

²⁵Omiyo kane jopuonjre mamoko owachone ni giseneno Ruoth, to nowachonigi ni, “Ka ok aneno luetene kuonde mane musmal ochwowo, mi aketoe lith lweta e ng’etne, to ok anayie ngang’!”

²⁶Bang’ juma achiel, jopuonjre Yesu ne ochako obedo e odno, to koro Thoma bende ne ni kodgi. Kata obedo ni dhoudi nochiegi, to Yesu nobiro, mochung’ e diergi, kendo omosogi ni, “Okueuru!”

²⁷Eka nowacho ni Thoma niya, “Kel lith leti ka, ine luetena. Lueti bende kel mondo iso e ng’etna. We bedo ng’at ma ok oyie, to bed ng’at man gi yie!”

²⁸To Thoma nodwoke ni, “Ruodha, kendo Nyasacha!”

²⁹Eka Yesu nowachone ni, “In iyie nikech isenena. Joma ok onena, to oyie, gin johawi!”

³⁰Yesu notimo honni moko mang’eny ka jopuonjrene neno, to honnigo ok ondik e kitabuni.

³¹To mago mantiegi osendiki mondo uyie ni Yesu e Mesia, Wuod Nyasaye, kendo ka uyie, to mondo ubed gi ngima kuom nyinge.