Read luo Johana 3 Bible Online

Johana 3 - luo bible

Johana 3

¹Chieng, moro ja-Farisai moro ma nyinge Nikodemo mane jaduong’ jo-Yahudi,

²nodhi ir Yesu gotieno, mowachone niya, “Rabi, wang’eyo ni in japuonj moa ka Nyasaye, nikech onge ng’at manyalo timo honni mitimogi, mak mana ka Nyasaye ni kode.”

³To Yesu nodwoke niya, “Adier, adier, awachoni ni ka ok onywol ng’ato nywol manyien, to ok onyal neno Loch Nyasaye.”

⁴Nikodemo nopenje ni, “Ere kaka dichak nywol ng’ato kosedoko ng’ama duong’? Dodog ei min, kendo chak nywole?”

⁵To Yesu nodwoke niya, “Adier, adier awachoni ni, ka ng’ato ok onywol gi pi kendo gi Roho, to ok onyal donjo e Piny Ruoth Nyasaye.

⁶Gima ringruok onywolo en mar ringruok, kendo gima Roho onyuolo en mar Roho.

⁷Omiyo kik ibwogi ka awachoni ni nyaka nywolu nywol manyien.

⁸Yamo kudho kuma ohero, kendo iwinjo dwonde, to ikia kuma oaye, kata kuma odhiye. Gima kamano bende ema timore ni ji duto ma Roho onywolo.”

⁹Nikodemo nopenje ni, “Ere kaka gik ma kamago nyalo timore?”

¹⁰To Yesu nodwoke kapenje ni, “Ere kaka inyalo bet japuonj e Israel, to ikia gik ma kamago?

¹¹Awachoni adier ni wawacho gik ma wang’eyo, kendo wanyiso ji gik ma waseneno, to onge ng’ato kuomu moyie ni gik mwawacho gin adier.

¹²Ka gik manie piny ka ema anyisou, to ok uyie, koro ere kaka duyie ka anyisou gik polo?

¹³Onge ng’at mosedhi e polo, mak mana Wuod Dhano, mane olor oa e polo.

¹⁴ “Kaka ne Musa ochungo thuond mula e thim, e kaka ibiro chungo Wuod Dhano bende,

¹⁵mondo ng’ama oyie kuome to oyud ngima ma nyaka chieng’ kuome.

¹⁶Nyasaye nohero piny ahinya kama, omiyo nochiwo Wuode ma miderma mondo ng’ama oyie kuome kik lal, to obed gi ngima ma nyaka chieng’.

¹⁷Nyasaye ne ok ooro Wuowi ni obi e piny mondo ong’ad ni piny bura, to noore ni mondo piny onwang’ warruok kuome.

¹⁸Ng’ama oyie kuom Wuowi onge gi bura, to ng’ama ok oyie kuome to bura oseloyo nikech ok oyie kuom Wuowi ma miderma mar Nyasaye.

¹⁹“Burano chalo kama: ler osedonjo e piny, to ji ohero mudho moloyo ler nikech timbegi richo.

²⁰Ji duto ma timbegi richo ok dwar ler, kendo ok dwar dhi e ler, nikech ok gidwar mondo timbegi maricho ofwenyre.

²¹Ng’at ma timbene kare to dhiyo e ler mondo timbene ong’ere e lela ni otimogi koluoro Nyasaye.”

²²Bang’ mano, Yesu nodhi e piny Judea gi jopuonjrene, mi obet kodgi kuno ka obatiso ji.

²³Johana bende ne batiso ji Aenon, machiegni gi Salim, nikech pi ne ng’eny kuno. Ji ne dhi ire, kendo nobatisogi.

²⁴ Mago notimore kapok otueye e jela.

²⁵Mbaka nowuok e kind jopuonjre Johana gi ja-Yahudi moro kuom wach puodhruok.

²⁶Kuom mano, ne gidhi ir Johana, mi giwachone ni, “Japuonj! Ng’at mane ni kodi loka aora Jordan, kendo mane iwuoyo kuome cha, koro batiso ji, kendo ji duto dhi ire.”

²⁷To Johana nodwokogi niya, “Onge ng’at manyalo bedo gi gimoro mak mana ka Nyasaye ema omiye.

²⁸ Un donge nuwinjo ka akwer ni ok an Mesia, to an mana jal mane oor mondo otel nyim Mesia?

²⁹Ng’at man gi miaha e wuon kisera, to osiep wuon kisera mochung’ kanyo bedo mamor kowinjo dwond wuon kisera. Mor ma kamano ema an bende an-go, kendo koro oroma chuth.

³⁰En nyaka odongi, to an adog piny.”

³¹Jal moa malo duong’ moloyo ji duto. Ng’at monywol e piny en mar piny, kendo owacho weche mag piny. Jal moa e polo to duong’ moloyo ji duto.

³²Owacho gik moseneno, kendo mosewinjo, to onge ng’ama oyie ni gima owacho en adier.

³³To ka ng’ato oyie ni gima Jalo wacho en adier, to obiro ng’eyo malong’o ni Nyasaye en jaadiera.

³⁴Jal mane Nyasaye ooro wacho mana weche Nyasaye, nimar Nyasaye chiwo Roho mogundho, ma ok ong’wonyo lwete.

³⁵ Wuoro ohero Wuowi, kendo oseketo gik moko duto e lwete.

³⁶Ng’at moyie kuom Wuowi nigi ngima ma nyaka chieng’. To ng’at ma ok owinjo Wuowi ok none ngimano ngang’, to mirimb Nyasaye osiko kuome.