Read luo Johana 6 Bible Online

Johana 6 - luo bible

Johana 6

¹Bang’ mano, Yesu nowuok modhi loka nam Galili, ma bende iluongo ni nam Tiberia.

²Oganda maduong’ noluwe, nikech ne gineno honni mane otimo kochango joma tuo.

³Eka Yesu noidho got moro, mobet piny kuno gi jopuonjrene.

⁴To Sap Pasaka, ma en sawo mar jo-Yahudi, koro ne chiegni.

⁵Yesu noting’o wang’e, moneno ka oganda maduong’ biro ire, omiyo nopenjo Filipo niya, “Ere kuma wanyalo ng’iewoe makati ma dwami jogi ocham?”

⁶Nowacho kamano kotemo go Filipo, nimar en owuon nong’eyo gima obiro timo.

⁷To Filipo nodwoke niya, “Siling’ mia ang’wen ok ding’iew makati moromo ng’ato ka ng’ato kawo matintin.”

⁸Japuonjrene moro machielo, ma nyinge Andrea, owadgi Simon Petro, nowachone niya,

⁹“Rawera moro ni ka, man gi makati abich mag shairi, kod rech mothol ariyo. To magi dinyal ang’o kuom joma ng’enygi?”

¹⁰To Yesu nokone ni, “Nyisuru ji obed piny.” Kamano ji nobet piny. To kanyo noyudo nitie lum mang’eny. Kuom ji duto mane obet piny kanyo ne nitie joma chwo ma dirom alufu abich.

¹¹Bang’ mano, Yesu nokawo makati, mi ogoyo ni Nyasaye erokamano. Eka nopogogi ni ji ka obet piny kamano. Rech bende nopogo, kendo ng’ato ka ng’ato nochiemo kaka odwaro.

¹²Ka ne giseyieng’ giduto, Yesu nowacho ni jopuonjrene niya, “Chokuru ng’injo modong’ mondo kik gimoro lal.”

¹³Kuom mano ne gichoko ng’injo mag makati abich mane ji ochamogo, mi opong’o aditini apar gariyo.

¹⁴Kane ji oneno hono mane Yesu otimono, ne giwacho ni, “Nyaka bed ni jali e janabi mane onego bi e piny ka.”

¹⁵Yesu nong’eyo ni ji dwaro make, kendo chune mondo obed ruoth, omiyo nopondo modhi e got kar kende.

¹⁶Kane piny ochopo odhiambo, jopuonjrene nodhi e dhonam,

¹⁷moidho yie moro mondo ong’ad nam odog loka Kapernaum. Piny koro nosechido, to Yesu ne pok ochopo irgi.

¹⁸E kindeno ahiti maduong’ ne kudho, omiyo nam noloko marach ahinya.

¹⁹Kane gisekiewo yie kama bor ma dirom kilomita abich kata auchiel, ne gineno Yesu kawuotho ewi pi, biro irgi e yie. Luoro nomakogi ahinya,

²⁰to Yesu nowachonigi ni, “Kik uluor! En mana an.”

²¹Eka ne gikwaye mondo odonj irgi e yie, kendo gikanyono yie nogowo e dhowath mane gidwaro dhiye.

²²Kinyne, oganda mane odong’ loka machielo noparo ni yie achiel kende ema ne ni kanyo, kendo ne ging’eyo ni Yesu ne ok oidho e yieno kod jopuonjrene, to jopuonjrene nodhi mana kendgi.

²³To yiedhi moko moa Tiberia nobiro, mogowo machiegni gi kama ne ji ochamoe makati mane Yesu oguedho.

²⁴Omiyo kane ji oneno ni Yesu onge kanyo, kendo ni jopuonjrene bende onge, ne giidho yiedhigo, mi gidhi Kapernaum, manyo Yesu.

²⁵Kane jogo oyudo Yesu loka machielo, ne gipenje niya, “Japuonj, ichopo ka karang’o?”

²⁶Yesu nodwokogi ni, “Awachonu adier ni, udwara mana nikech makati ma nyoro uchamo, muyieng’, to ok nikech honni museneno.

²⁷Kik uti ni chiemo makethore, to tiuru mana ni chiemo mosiko, kendo makelo ngima ma nyaka chieng’. Wuod Dhano ema nomiu chiemono, nikech en ema Nyasaye Wuoro oseketo kido mare kuome, manyiso ni oyie kode.”

²⁸Eka ne gipenje ni, “Ang’o monego watim, eka wabed joma tiyo tich Nyasaye?”

²⁹To Yesu nodwokogi ni, “Tich ma Nyasaye dwaro mondo uti en ni mondo uyie kuom Jal mane ooro.”

³⁰Kuom mano ne gichako gipenje niya, “To ere ranyisi minyalo timo mondo wane, eka wayie gima iwacho? Ang’o minyalo timo?

³¹ Kwerewa ne ochamo chiemo miluongo ni Manna e thim, kaka ondiki e Muma ni, ‘Nomiyogi chiemo moa e polo mondo gicham.’ ”

³²Eka Yesu nomedo wachonigi niya, “Adier, adier, awachonu ni, Musa ne ok omiyou kuon maradier moa e polo, to Wuora ema miyou kuon maradier moa e polo,

³³nikech kuon ma Nyasaye chiwo en mana jal molor oa e polo, kendo ochiwo ngima ni piny.”

³⁴Kane giwinjo wachno ne gikwaye ni, “Jaduong’ yie imiwa kuonno pile.”

³⁵To Yesu nodwokogi ni, “An e kuon mar ngima, kendo ng’ama obiro ira ok nowinj kech nyaka chieng’, bende ng’at moyie kuoma riyo ok nochak olo ngang’.

³⁶To asewachonu ni, kata obedo ni usenena, to ok uyie kuoma.

³⁷Ji duto ma Wuoro omiya nobi ira, kendo ng’ato ang’ata mobiro ira ok nariemb ngang’,

³⁸nikech ok aselor aa e polo mondo atim gik ma Jal mane oora dwaro.

³⁹Jal mane oora dwaro ni kik awit kata ng’at achiel kuom joma ne omiya, to ni mondo achiergi duto chieng’ giko piny.

⁴⁰Adier, Wuora dwaro ni mondo ng’ato ang’ata moneno Wuowi, mi oyie kuome, oyud ngima ma nyaka chieng’; kendo anachiere chieng’ giko piny.”

⁴¹Jo-Yahudi nochako ng’ur kane giwinjo ka Yesu owacho ni en e kuon moa e polo.

⁴²To ne gipenjore ni, “Jali ok e Yesu wuod Josef koso? Donge wang’eyo wuon mare? To ere kaka onyalo wacho ni olor oa e polo?”

⁴³Yesu nodwokogi ni, “Weuru ng’ur.

⁴⁴Onge ng’ama nyalo biro ira mak mana ka Wuoro mane oora ema okele; kendo anachiere chieng’ giko piny.

⁴⁵ Ondik e Kitap jonabi ni, ‘Nyasaye nopuonj ji duto.’ Omiyo ng’ato ka ng’ato ma owinjo dwond Wuoro mi opuonjore kuome, to biro mana ira.

⁴⁶Ok awach ni nitie ng’at moro moseneno Wuoro, to mak mana Jal mane oa ka Nyasaye kende ema osenene.

⁴⁷Awachonu adier ni, ng’at moyie ema nigi ngima ma nyaka chieng’.

⁴⁸An e kuon mar ngima.

⁴⁹Kwereu nochamo Manna e thim, to kata kamano ne githo.

⁵⁰Anto awuoyo kuom kuon moa e polo, ma ka ng’ato ochamo to ok nyal tho ngang’.

⁵¹An e kuon mangima mane olor oa e polo. Ng’at mochamo kuonni nobed mangima nyaka chieng’. To bende kuon ma abiro chiwo mondo piny oyud ngima en ringra.”

⁵²Jo-Yahudi nochako dhawo kendgi niya, “Ere kaka jali dimiwa ringre mondo wacham?”

⁵³Yesu nowacho nigi ni, “Awachonu adier ni, ka ok uchamo ringre Wuod Dhano kendo umadho rembe, to uonge gi ngima e iu.

⁵⁴Ng’at ma ochamo ringra, kendo omadho remba, nigi ngima ma nyaka chieng’, kendo anachiere chieng’ giko piny.

⁵⁵Ringra e chiemo madieri, kendo remba e math adieri.

⁵⁶Kamano ng’at ma ochamo ringra, kendo omadho remba, ema osiko kuoma, kendo an bende asiko kuome.

⁵⁷Kaka Wuoro mangima noora, kendo angima nikech en, e kaka ng’at mochamo ringra bende nobed mangima nikech an.

⁵⁸Ma e kuon mane olor oa e polo. Ok ochal gi gima ne kwereu ochamo to bang’e otho. Ng’at ma ochamo kuonni to nobed mangima nyaka chieng’”

⁵⁹Yesu nowacho wechego kapuonjo e od lemo Kapernaum.

⁶⁰Jopuonjre Yesu mang’eny mane owinjo wechego nowacho niya, “Ma puonj matek manadi! Ng’ano ma dichikne ite?”

⁶¹Yesu nong’eyo ni jopuonjrene ng’ur kuom puonjneno, omiyo nopenjogi ni, “Wachni obwogou koso?

⁶²Ka kamano, to kara dubwogi machal nadi, ka uneno Wuod Dhano kaidho dok malo kama ne oaye?

⁶³Roho ema kelo ngima; dhano to ok nyal gimoro. Weche ma asewachonu gin roho kod ngima,

⁶⁴to ji moko kuomu pod ok oyie.” Yesu nowacho kamano nikech nyaka a chakruok noseng’eyo joma oyie, kod ng’at mane biro ndhoge.

⁶⁵Eka nomedo wacho niya, “Mano ema omiyo ne awachonu ni ng’ato ok nyal biro ira ka ok Wuora ema omiyo obiro.”

⁶⁶Chakre kanyo ng’eny jopuonjrene nodok chien, mi oweyo luwe.

⁶⁷Omiyo nopenjo joote apar gariyo ni, “Un bende udwaro weya koso?”

⁶⁸ To Simon Petro nodwoke ni, “Ruoth, ere ng’ama dwadhi ire, to in ema in gi weche makelo ngima ma nyaka chieng’?

⁶⁹Wan koro waseyie, kendo wang’eyo ni in e Ng’ama Ler mar Nyasaye.”

⁷⁰To Yesu nodwokogi niya, “Un ji apar gariyo, donge ne ayierou uduto? To kata kamano ng’at achiel kuomu en jachien.”

⁷¹Nowuoyo mana kuom Judas wuod Simon Iskariot, nikech kata obedo mana ni Judas ne achiel kuom joote apar gariyogo, to en ema nobiro ndhogo Yesu.