Read luo Johana 7 Bible Online

Johana 7 - luo bible

Johana 7

¹Bang’ mano, Yesu nowuotho koni gi koni ka puonjo e piny Galili. Ne ok odwa dhi Judea nikech jodong jo-Yahudi ne dwaro nege.

² Sap jo-Yahudi miluongo ni Sap Kiche ne chiegni,

³omiyo owetene nowachone ni, “A ka, idhi Judea mondo jopuonjreni one honni mitimo.

⁴Ka ng’ato dwaro mondo ji ong’eye, to ok onyal tiyo kama opondo. Ka en adier ni itimo gik ma kamagi, to ara nyisri e nyim piny.”

⁵Ne giwachone kamano nikech kata gin ma gin owetene ne ok giyie kuome.

⁶Yesu nodwokogi niya, “Kindena pok ochopo, to un, kindeu nitie ndalo duto.

⁷Un piny ok nyal mon kodu to an omon koda nikech kinde duto asiko kanyise ni timbene richo.

⁸Un, dhiuru adhiya e sawono. An to ok adhi, nikech kindena pok ochopo.”

⁹Kane osewacho kamano, nodong’ Galili.

¹⁰To kane owete Yesu osedhi e sawo, en bende nodhi. To ne ok odhi ratiro, to nodhi mana ling’ling’.

¹¹Jodong jo-Yahudi nomanye e sawo, ka penjo kuma entie.

¹²Ji mang’eny mane odhi e sawono ne wuoyo kuom Yesu, ka moko wacho ni, “Ooyo, owuondo ogandawa.”

¹³To kata kamano onge ng’ama noloso kuome ratiro, nikech ne giluoro jodong jo-Yahudi.

¹⁴To chieng’ mane ndalo sawo ochopo e diere, Yesu nodhi e Hekalu, mochako puonjo ji.

¹⁵Jodong jo-Yahudi nowuoro, kawacho ni, “Ere kuma ng’atni oyudoe rieko makama, to ok osomo?”

¹⁶Yesu nodwokogi ni, “Gik ma apuonjo ok gin maga awuon, to gin mag Jal mane oora.

¹⁷Ng’at moyie timo gima Nyasaye dwaro, to biro ng’eyo kata ka weche ma apuonjo oa ka Nyasaye, kata ka apuonjo mana wechena awuon.

¹⁸Ng’at ma loso gi tekone owuon en ng’at madwaro mondo oyud duong’, to ng’at madwaro mondo ng’at mane oore oyud duong’ en jaadiera, kendo oonge gi miganga kata matin.

¹⁹Donge Musa nomiyou Chik, to onge kata ng’at achiel kuomu morito? Ka ok kamano, to ang’o momiyo udwaro nega?”

²⁰Ji nodwoke ni, “Jachien ni kodi! Ng’ano madwaro negi?”

²¹Yesu nowachonigi niya, “Ne atimo gimoro achiel kende chieng’ Sabato, mi ubwok uduto.

²² Paruru ni Musa nomiyou chik mar tero nyangu. (To chutho Musa ok ema nokelo chikno, to kwereu ema nochake.) Chikno omiyo utero yawuotu nyangu chieng’ Sabato.

²³ To ka un utero nyathi nyangu chieng’ Sabato, mondo kik uketh Chik Musa, to marang’o ukecho koda kuom chango ng’ato chieng’ Sabato, mi dende duto bed mangima?

²⁴Mano omiyo kik ung’ad bura kurango mana gik ma oko, to ng’aduru bura mana gi adiera.”

²⁵Jo-Jerusalem moko nopenjore niya, “Donge ma e jal ma gidwaro nego cha?

²⁶To winjuru kaka opuonjo ji mana e lela, to onge ng’ama wachone gimoro. Koso dibed ni jodongwa ong’eyo ni en Mesia?

²⁷To mano ok nyal bet kamano, nikech waduto wang’eyo kuma jali oaye. Mesia to kabiro, to onge ng’ama nong’e kuma oaye.”

²⁸Mano nomiyo Yesu owacho gi dwol maduong’, kopuonjo e Hekalu niya, “En adier ni ung’eya, kendo en adier ni ung’eyo kuma aaye, to kata kamano ok asebiro gi tekona awuon. Jal mane oora e wuon adiera, to un ok ung’eye.

²⁹An to ang’eye, nikech aa ire, kendo en ema noora.”

³⁰Eka ne gitemo make, to ne ok ginyal, nikech kindene ne pok ochopo.

³¹To ji mang’eny noyie kuome, kapenjore ni, “Ka Mesia obiro, dotim honni mang’eny moloyo ma jali timo koso?”

³²Jo-Farisai nowinjo ka ji kuodho wechego kuom Yesu, omiyo ne giriwo wach gi jodolo madongo, mi gioro askeche mondo omake.

³³To Yesu nowacho ni, “Pod abiro medo bet kodu kuom kinde moko, eka bang’e nadog ir Jal mane oora.

³⁴Unumanya, to ok unuyuda, nikech kama abiro betie ok unyal biroe.”

³⁵Jodong jo-Yahudi nopenjore kendgi niya, “Kanye modwaro dhiye ma ok wanyal nwang’ee? Koso odwaro dhi kuom jo-Yahudi modak e pinje joma ok jo-Yahudi mondo opuonj joma ok jo-Yahudi?

³⁶Ere tiend wach mowachoni, wanamanye to ok wanayude, kendo ni, kuma obiro betie wan ok wanyal dhiye?”

³⁷ Chieng’ mogik mar sawo, mane en odiechieng’ maduong’ ahinya, Yesu nochung’ mowacho gi dwol maduong’ niya, “Ng’at ma riyo oloyo mondo obi ira, omodhi.

³⁸ En mana kaka Muma wacho ni, ‘Aore mag pi mangima nomol kawuok kuome.’ ”

³⁹To Yesu ne oloso kuom Roho, ma ji duto moyie kuome ne biro yudo. To e kindeno Roho ne pok obiro, nikech Yesu ne pok oyudo duong’ne.

⁴⁰Jomoko kuom joma ne owinjo wechego nowacho niya, “Nyaka bed ni jali e Janabi mwasebedo kwageno ni biro biro.”

⁴¹Jomoko to nowacho ni, “En e Mesia.” To ji moko nokwer ni, “Mesia ok nyal wuok Galili!

⁴² Donge Muma wacho ni Mesia nobed nyakwar Daudi, kendo ni nonywole Bethlehem, dala Daudi?”

⁴³Kamano ji nopogore kuom wachne.

⁴⁴Jomoko kuomgi ne dwaro make, to onge ng’at mane otimo kamano.

⁴⁵Kane askeche odwogo, jodolo gi jo-Farisai nopenjo gi ni, “Ang’o momiyo ok usekele ka?”

⁴⁶To ne gidwoko niya, “Pok wanenoe ng’at mawuoyo ka ng’atni!”

⁴⁷Eka jo-Farisai nopenjogi ni, “Kara un bende osewuondou.

⁴⁸Bende usenenoe jatendwa moro, kata ja-Farisai moro, moyie kuome?

⁴⁹To ji ajia ma ok ong’eyo Chik, gin joma okuong’!”

⁵⁰ Ng’at achiel kuom jodongogo ne Nikodemo, mane oyudo osedhi ir Yesu. En nowachonigi ni,

⁵¹“Donge Chikwa okwer ni kik ng’ad ni ng’ato bura ka pok oyale, mi owinj wechene?”

⁵²To ne gipenje ni, “In bende in ja-Galili koso? Som Muma, to ibiro yudo ni onge janabi manyalo wuok Galili!”

⁵³[Eka ji duto noa, modok miechgi.