Read luo Johana 9 Bible Online

Johana 9 - luo bible

Johana 9

¹Kane Yesu wuotho, noneno ng’at moro mane onywol muofu.

²Jopuonjrene nopenje ni, “Japuonj, ng’atni nonywol muofu nikech richone owuon koso nikech richo mag jonywolne?”

³Yesu nodwokogi ni, “Jali ne ok onywol muofu nikech richone owuon, kata nikech richo mag jonywolne, to nonywole muofu mana ni mondo ji one teko mar Nyasaye kichange.

⁴Nyaka wati tije mag Jal mane oora kapod piny odiechieng’, nikech otieno biro chopo ma ng’ato ok nyal tiyoe.

⁵ Kapod anie piny, to an e ler mar piny.”

⁶Kane Yesu osewacho kamano, nong’ulo olawo piny, mi olosogo lowo, owirogo wang’ ng’atno.

⁷Eka nowachone ni, “Dhi ilwok wang’i e yawo mar Siloam.” (Tiend nying yawono en ‘Ote’.) Kuom mano ng’atno nodhi olwoko wang’e mi odwogo ka oneno.

⁸Jodalagi, kod joma ne osenene ka okwecho, nopenjore niya, “Donge jali ema yandi bet kakuecho cha?”

⁹Jomoko kuomgi noyie ni mano en, to moko nokwer ni, “Ooyo, ok en, to ochal mana kode.” Ng’atno owuon to nowachonigi ni, “En mana an.”

¹⁰Eka ne gipenje ni, “To ere kaka wang’i oyawore?”

¹¹Nodwokogi ni, “Ng’at moro ma nyinge Yesu noloso lowo mi owirogo wang’a, bende onyisa mondo adhi alwok wang’e e yawo mar Siloam. Omiyo ne adhi malwoko wang’a mi wang’a oyawore.”

¹²Eka ne gipenje ni, “Ng’at onogo ni kanye?” To nodwoko ni, “Ok ang’eyo.”

¹³Bang’e ne gitero ng’at ma yandi muofuno ir jo-Farisai.

¹⁴To chieng’ mane Yesu olosoe lowo kendo ochangoe wang’ muofuno, ne en chieng’ Sabato.

¹⁵Kuom mano jo-Farisai bende nopenjo muofuno kaka ne wang’e ochango. Nodwokogi ni, “Ng’atno nowiro wang’a gi chuodho, eka ne aluoko, kendo koro aneno!”

¹⁶Jo-Farisai moko nowacho ni, “Ng’at mane otimo kamano ok nyal bet ng’at Nyasaye, nikech ok orito Chik Sabato.” To moko nowacho ni, “Bende ng’at ma jaricho ditim honni ma kamagi adier?” Kamano ne gipogore kuom wachno chutho.

¹⁷Omiyo ne gichako gipenjo muofuno niya, “In to koro ang’o miwacho kuome, kaka oseyawo wang’i ni?” Ne odwokogi ni, “En janabi.”

¹⁸Jodong jo-Yahudi ne ok nyal yie ni ng’atno ne en muofu to koro oneno. Omiyo ne giluongo jonywolne,

¹⁹mi gipenjo ni, “Ma en wuodu koso? Uwachoni nonywole ka en muofu adier? Ka kamano, to koro ere kaka oneno?”

²⁰Jonywol ng’atno nodwokogi ni, “Wang’eyo ni en nyathiwa, kendo nonywole muofu.

²¹To kata kamano ok wang’eyo kaka koro oneno, to bende ok wang’eyo ng’at moyawo wang’e. To en ng’at maduong’, omiyo penje uru, nikech onyalo dwokou kende owuon.”

²²Jonywolne nodwoko kamano nikech ne giluoro jodong jo-Yahudi. Ne oyudo jodong jo-Yahudi osewinjore kendgi ni ng’ato ang’ata moyie ni Yesu e Mesia, to nyaka tam mondo kik dhi e od lemo.

²³Mano e momiyo jonywol ng’atno nowacho ni, “En ng’at maduong’, penjeuru owuon.”

²⁴Eka jodongo nochako oluongo ng’at mane onywol muofuno irgi, mi giwachone niya, “Kuongri gi nying Nyasaye ni ibiro wacho adiera. Wan wang’eyo ni jali en jaricho.”

²⁵To ng’atno nodwokogi ni, “An ok ang’eyo kata en jaricho, to wach achiel mang’eyo en mana ni yande an muofu to koro aneno!”

²⁶Eka ne gipenje ni, “Ang’o mane otimoni moyawo wang’i?”

²⁷Ne odwokogi niya, “Donge asenyisou, to udagi winjo? Ang’o momiyo udwaro ni mondo achak awachnu kendo? Koso un bende udwaro doko jopuonjrene?”

²⁸Bang’ mano ne gijare, ka giwachone ni, “In ema in japuonjrene, wan to wan jopuonjre Musa.

²⁹Wang’eyo ni Nyasaye nowuoyo gi Musa. Ng’atni to wakia kuma oaye!”

³⁰Eka ng’atno nowacho niya, “Kara ma en wach miwuoro! Un uwacho ni ukia kuma oaye, to en ema oseyawo wang’a!

³¹Wang’eyo ni Nyasaye ok winj wach joricho, to ng’at moluore, kendo matimo gik ma odwaro, ema owinjo.

³²Nyaka nene pok owinjie ng’at moyawo wang’ ng’at mane onywol muofu.

³³Ka da bed ni ng’atni ok en ng’at Nyasaye, to da ok obedo gi teko mar timo kamano.”

³⁴To ne giwachone ni, “In nonywoli e chuny richo, to koro ere kaka dipuonjwa?” Eka ne giriembe oko e od lemo.

³⁵Yesu nowinjo ni oseriemb ng’atno e od lemo, omiyo kane oyude, nopenje ni, “Bende iyie kuom Wuod Dhano koso?”

³⁶To ng’atno nodwoke ni, “Jaduong’, Wuod Dhano en ng’a mondo ayie kuome?”

³⁷Yesu nowachone ni, “Isenene, kendo en ema oloso kodi ni!”

³⁸Eka ng’atno nogoyo chonge piny e nyim Yesu, kowachone ni, “Jaduong’, ayie!”

³⁹Bang’ mano, Yesu nowacho ni, “Asebiro e piny mondo akel bura, mondo joma muofni onen, to joma neno odok muofni.”

⁴⁰Jo-Farisai moko mane ni kanyo nowinjo gima owacho, mi openje ni, “Iparo ni wan bende wan muofni koso?”

⁴¹Yesu nodwokogi ni, “Ka da bed ni un muofni, to da ubedo ma onge gi ketho, to kaka koro uwacho ni uneno, omiyo kethou osiko.”