Read luo Tich Joote 10 Bible Online

Tich Joote 10 - luo bible

Tich Joote 10

¹Ne nitie ng’at moro Kaisaria ma nyinge Kornelio. Ne en jatend oganda lweny miluongo ni, ‘Oganda Italia’,

²kendo ne en ng’at modimbore, kendo moluoro Nyasaye gi joode duto. Notimo timbe ng’wono mang’eny kokonyogo jo-Yahudi modhier, kendo ne olamo Nyasaye pile.

³Chieng’ moro kar sa ochiko mar odhiambo, nopo ka malaika mar Nyasaye obirone malong’o e fweny, mi olwonge ni, “Kornelio!”

⁴Ne orango malaika mi openje koluor ni, “En ang’o, Ruoth?” Malaika nodwoke ni, “Lemoni gi timbeni mag ng’wono osechopo malo e nyim Nyasaye, kendo Nyasaye osepari.

⁵To koro or wach Jopa, iluong ng’at moro ma nyinge Simon, ma bende iluongo ni Petro.

⁶En wendo janyong’ piende moro ma nyinge bende Simon, ma ode nie dhonam.”

⁷Kane malaika mane wuoyo kode osea, noluongo jotich ode ariyo gi askari moro modimbore, mane achiel kuom joma rite.

⁸Eka nonyisogi weche duto, mi oorogi Jopa.

⁹Kinyne kane jootego nie yo chiegni chopo Jopa, Petro noidho e tat ot kar sa auchiel mondo olem.

¹⁰Nodenyo, kendo ne odwaro chiemo, to kane pod iloso chiemo, ayula wang’ notere,

¹¹mi oneno ka polo oyawore, kendo ka gimoro machal gi nanga maduong’ iloro piny gi kondene ang’wen.

¹²To ei gino ne nitie kit gik moko mangima, kaka jamni gi le kod gik mamol gi winy.

¹³Dwol moro nowacho niya, “Petro, a malo mondo ineg gimoro kuom gigo, icham!”

¹⁴To Petro nokwer ni, “Ngang’, Ruoth! Nyaka nene pok achamo gima ok ler kata makuero.”

¹⁵Eka dwol nochako owuoyo kode mar ariyo ni, “Gimoro amora ma Nyasaye owacho ni ler, in kik iwach ni ok ler.”

¹⁶Mano notimore didek, eka nodwok gino malo e polo mana gie sano.

¹⁷Kane Petro pod hum nono, kaparo tiend fweny mane oseneno, joote mane Kornelio ooro nochopo e dhorangach, bang’ penjo kuma Petro odakie.

¹⁸Ne giluongo ka gipenjo ni, “Bende wendo moro ni ka ma nyinge Simon Petro?”

¹⁹To paro Petro ne pod oyudo ni kuom fweny mane oseneno cha, to Roho ne onyise ni, “Ji adek moko dwari.

²⁰Omiyo lor piny idhi kodgi, mak iriwo gi kiawa, nikech an ema aseorogi.”

²¹Kuom mano, Petro nolor piny, mi owacho ni jogo ni, “An e ng’at mudwaro. Ere wach ma un go?”

²²Ne gidwoke ni, “Jaduong’ lweny moro ma nyinge Kornelio ema oorowa. En ng’at makare, moluoro Nyasaye, kendo ma jo-Yahudi duto ogeno. To nonyise mondo oluongi idhi e ode, owinj ane wachni.”

²³Omiyo Petro norwakogi e ot, mi ginindo kanyo otienono. Kinyne noa malo modhi kodgi, kendo owete moko moa Jopa bende ne odhi kode.

²⁴Chieng’ maluwo mano, ne gichopo Kaisaria, kuma ne Kornelio, kaachiel kod wedene kod osiepene mane oseluongo, ritogie.

²⁵Kane Petro ochopo, Kornelio noromone, mi ogoyo chonge piny e tiende, kamiye duong’.

²⁶To Petro nochunge, kawachone ni, “Chungi, nikech anto an mana dhano.”

²⁷Eka nodonjo e ot kowuoyo kode, kendo noyudo ji mathoth kochokore kanyo.

²⁸Nowachonigi niya, “Uduto ung’eyo ni chikwa ok oyie mondo ja-Yahudi olim ng’at moro ma ok ja-Yahudi, kata osud machiegni kode. To Nyasaye osenyisa ni kik akwan ng’ato ang’ata ka ng’ama ok ler kata mogak.

²⁹Emomiyo ka nyocha uluonga, to abiro abira ma ok amino wach. To koro apenjou ni, ere gima ne omiyo uluonga?”

³⁰Kornelio nodwoke niya, “Ndalo adek mokadho, ne oyudo alemo e oda kar sa ochiko mar odhiambo. To ne apo ka ng’at moro morwako lewni mang’angni ochung’ e nyima,

³¹moluonga ni, ‘Kornelio! Nyasaye osewinjo lemoni, kendo oseneno timbeni mag ng’wono.

³²Koro or wach Jopa mondo iluong ng’at moro ma nyinge Simon Petro. En wendo e dala janyong’ piende moro ma nyinge Simon, modak e dhonam.’

³³Mano omiyo ne aoroni joote mana gi sano, kendo agoyoni erokamano ahinya kuom biro. To koro waduto eri wan ka e nyim Nyasaye, kwarito wach moro amora ma Ruoth osenyisi mondo iwachi.”

³⁴ Eka Petro nochako wuoyo, kawacho ni, “Koro asefwenyo adier ni Nyasaye timoni ji duto mana machalre.

³⁵Oyie gi ng’ato ang’ata moluore, kendo matimo gik makare, bed ni oa e oganda mane!

³⁶Ne ooro wachne ni jo-Israel, kokelonigi Wach Maber mar kue kuom Yesu Kristo, ma en Ruodh ji duto.

³⁷Ung’eyo gima duong’ mane otimore e piny Israel duto, chakre Galili, bang’ wach batiso mane Johana olando.

³⁸Ung’eyo kaka Nyasaye noyiero Yesu ja-Nazareth, komiye Roho Maler, kendo omiye teko. Ne odhi kuonde duto, kotimo timbe mabeyo, kendo ochango ji duto mane Satan sando, nikech Nyasaye ne ni kode.

³⁹Wan ne waneno gik moko duto mane otimo e piny jo-Yahudi kod Jerusalem, kendo wawuoyo ni ji kuomgi. Jo-Yahudi ne onege kogure e msalaba,

⁴⁰to Nyasaye ne ochiere oa kuom joma otho chieng’ mar adek, momiyo ofwenyorenwa.

⁴¹Ji duto ne ok onene, to mak mana wan mane Nyasaye oyiero. Wan ne wachiemo kendo wametho kode kane osechier oa kuom joma otho.

⁴²Ne omiyowa chik mondo waland ni ji Wachne, kwahulo ni en ema Nyasaye oseyiere jang’ad bura mar joma ngima gi joma otho.

⁴³Jonabi duto nowuoyo kuome, kawacho ni ng’ato ka ng’ato moyie kuome nowene richone nikech en.”

⁴⁴Kane Petro pod wuoyo, Roho Maler nolor kuom ji duto mane oyudo winjo wachne.

⁴⁵Jo-Yahudi mane oyie kuom Kristo mane osebiro gi Petro koa Jopa ne owuoro ahinya ka gineno ni Nyasaye omiyo joma ok jo-Yahudi Roho Maler,

⁴⁶nikech ne giwinjo ka giwuoyo gi dhok mayoreyore, ka gipako duong’ mar Nyasaye. Eka Petro nowacho niya,

⁴⁷“Jogi oseyudo Roho Maler mana kaka ne wayudo! Bende ng’ato nyalo tamogi mondo kik batisgi gi pi adier?”

⁴⁸Eka nogolo chik ni mondo obatisgi e nying Yesu Kristo. Bang’e ne gikwaye mondo omed bet kodgi kuom ndalo moko.