Read luo Tich Joote 24 Bible Online

Tich Joote 24 - luo bible

Tich Joote 24

¹Bang’ ndalo abich, Anania jadolo maduong’ gi jodongo mamoko kod jabura moro mariek ma nyinge Tertulo ne jodhi Kaisaria. Ne gibiro e nyim ruoth Feliks, mi gidonjo ni Paulo.

²Eka ne oluong Paulo, mi Tertulo ochako wuoyo kuome kama: “Jaduong’ moluor! Isekeloni jowa kue maduong’, kendo telo mari mariek osemiyo pinywa dongruok e yore mang’eny.

³Mago duto wamorgo ahinya kuonde duto, kendo wagoyoni erokamano maduong.

⁴To ok adwar ketho secheni, omiyo akwayi gi ng’wono, ni mondo iyie iwinjie wachwa matin.

⁵Wasenwang’o ni ng’atni en achach marach, kendo okelo jemo e kind jo-Yahudi e piny ngima, to bende en jatend kanyakla mar Jo-Nazareth.

⁶Bende ne otemo dwanyo Hekalu, to ne wamake, [kendo ne wadwaro ng’adone bura kaka Chikwa obet.

⁷To Lusio ma jaduong’ lweny nobiro mogole kuomwa gi thwon!

⁸Bang’e ne ogolo chik mondo joma donjone obi e nyimi.] To koro ka inono ng’atni in iwuon, to ibiro nwang’o ni gik mwadonjonegogi gin adier.”

⁹Jo-Yahudi bende noriwore gi Tertulo, ka giramo ni wechego duto gin adier.

¹⁰Bang’ mano, ruoth nogwelo Paulo mondo odwok wach, mi Paulo nochako wuoyo, kowacho ni, “Amor mondo adwok wach man kuoma e nyimi, kang’eyo ni isebedo jang’ad bura ni ogandani kuom higni mang’eny.

¹¹Inyalo yudo ka en adier ni ndalo apar gariyo pok okadho nyaka nyocha adhi Jerusalem mondo alem.

¹²To jo-Yahudi ne ok onwang’a e Hekalu, kata e ut lemo, kata kamoro amora e Jerusalem, ka amino wach gi ng’ato, kata ka athuwo ji.

¹³Bende ok ginyal ng’eng’a kuom weche ma gidonjonagogi.

¹⁴To gimoro achiel ma anyalo yie, en ni alamo Nyasach kwerewa kaluwore gi Yor Ruoth ma giluongo ni kanyaklano, ka ayie gi weche duto mondik e Chik Musa, kendo e kitepe mag Jonabi.

¹⁵Ayie kuom Nyasaye, kageno ni ji duto, mabeyo kod maricho, nochier mana kaka gin bende gigeno.

¹⁶Kuom mano, an bende aritora mondo abed gi chuny makare e nyim Nyasaye kendo e nyim ji ndalo duto, mana kaka gin.

¹⁷ “To bang’ bedo maonge e Jerusalem kuom higni moko, ne adok kuno mondo ater mich ni ogandawa, kendo atim ni Nyasaye misango.

¹⁸Mano e gima ne ginwang’a e Hekalu ka atimo, kendo ka asepuodhora. Onge ji mathoth mane ni koda, kendo koko moro bende ne onge.

¹⁹To jo-Yahudi moko moa e piny Asia ema ne ni kanyo, kendo gin ema aye onego gibi e nyimi kaeri, kapo ni gin gi wach moro ma gidwaro donjonago!

²⁰Kata joma ni kaerigi mondo owach ane ketho mane oyudago kane otera e nyim buchgi maduong’,

²¹ ka ok mana wach achiel mane ahulo ka achung’ e nyimgi niya, ‘Iyala kawuono nikech ayie ni joma otho nochier.’ ”

²²Bang’ mano, Feliks, mane ong’eyo wach mar Yor Ruoth ahinya, noloro bura, kowachonigi niya, “Abiro tieko wachu ka Lusio ma jaduong’ lweny obiro.”

²³Eka nonyiso jatend askeche mondo orit Paulo, to mondo omiye thuolo moromo kendo kik otam osiepene timone gik modwaro.

²⁴Bang’ ndalo moko, Feliks nobiro gi Drusila chiege ma nyar jo-Yahudi. Ne oluongo Paulo ire, kendo nowinje kowuoyo e wach yie kuom Kristo Yesu.

²⁵To kane Paulo odhi nyime kawuoyo kuom bedo makare, kendo kuom ritruok, kod Chieng’ Bura mabiro, Feliks nodoko maluor, mi owacho ni, “Koro dogi, to chieng’ moro nachak aluongi ka ayudo thuolo.”

²⁶To bende ne ogeno ni Paulo dimiye asoya, omiyo noluonge pilepile mondo otwag kode.

²⁷Bang’ higni ariyo, Porkio Festo nodoko ruoth kar Feliks. To kaka Feliks ne dwaro mondo jo-Yahudi one ni en ng’ama ber, noweyo Paulo e jela.