Read luo Tich Joote 27 Bible Online

Tich Joote 27 - luo bible

Tich Joote 27

¹Kane oseng’ad wach ni ber mondo wakwang’ wadhi Italia, ne giketo Paulo gi joma otue moko e lwet Julio, mane jatend oganda lweny miluongo ni Oganda Kaisar Augusto.

²Ne waidho yie moro moa Adramutio mane oyudo dwaro dhi e dhowedhe mag piny Asia, mi ne wawuok. Aristarko ma ja-Makedonia moa Thesalonika bende ne ni kodwa.

³Kinyne ne wachopo Sidon, kendo Julio notimo ng’wono ni Paulo, mi oyiene odhi ir osiepene mondo omiye gik ma dokonyrego.

⁴Ne waa kuno, to kaka yamo ne kudho mochomowa tir, ne wakwang’ kwageng’ore e tiend chula mar Sipras.

⁵Eka ne wang’ado chuny nam, machiegni gi pinje mag Kilikia gi Pamfulia, mi wachopo Mura e piny Lukia.

⁶To kuno jatend lwenyno ne onwang’oe yie moro moa Aleksandria, mane dwaro dhi Italia, mi oketowae.

⁷Ne wakwang’ mos gi thagruok kuom ndalo mang’eny, eka ne wachopo e dho Kanido. To kaka yamo ne pod ok nyal weyo wadhi nyime tir, ne wakwang’ kwageng’ore e tiend chula mar Krete, kwakadho e bath sori miluongo ni Salmone.

⁸Ne wasiko wakwang’ mana e bath nam, kendo bang’ thagruok ne wachopo e dhowath moro miluongo ni Mbita Mokue, man machiegni gi dala mar Lasea.

⁹Ne wabet kuno kuom kinde mogwarore, nyaka koro dhi nyime gi kwang’ ne ok ber, nikech kinde mar Sap Tueyo Chiemo koro nosekadho. Omiyo Paulo nong’adonigi rieko,

¹⁰kawacho niya, “Owetena, aneno ni kwaa ka, to wuodhwa biro bet marach. Yiewani kaachiel gi gik moting’o biro kethore marach, kendo wan bende wanyalo tho.”

¹¹To jatend lweny noyie mana gi wach jatend yie kod mar wuon yie mi ok odewo gima ne Paulo owacho.

¹²To bende dhowath kanyo ne ok ber moromo betie ndalo chwiri, omiyo ji mathoth ne dwaro a kanyo, ka giparo ni digichop Foiniks, mondo gibedie ndalo chwiri. Foiniks en dhowath Krete, momanyore gi milambo ma yo podho chieng’.

¹³Kane yamb milambo ochako kudho mos, ne gigalo ni ginwang’o gima gidwaro, omiyo ne wachako wuoth, mi wakwang’ madiny e lak dhonam Krete.

¹⁴To bang’ kinde matin, yamb ahiti miluongo ni Yurakulo nokudho matek koa e chula mar Krete.

¹⁵Ne ogoyo yie, mi otamo mwomo, omiyo ne waloko yie mondo yamo oterwa atera kuma okudho kochomo.

¹⁶Kane yie ringo e tiend chula moro miluongo ni Kauda, ne wayudo thuolo mar tueyo yie matin mane oyudo wayuayo chien, to mana gi thagruok.

¹⁷Kane jotich yie oseting’e malo, ne gikawo tonde mi gitweyogo yie maduong’ alwora mondo kik barre. To kaka ne giluor ni dipo ka yie oterogi e kuoyo manie dhonam Afrika kama thanythany, ne giloro tanga mi giweyo yamo otero yie atera.

¹⁸Ahiti mager nomedo kudho, omiyo kinyne ne gichako wito gik mane yie oting’o e nam,

¹⁹to orue machielo gin giwegi ne giwito kata mana moko kuom gik michikogo yie.

²⁰Kuom ndalo mathoth ne ok wanyal neno wang’ chieng’ kata sulue, kendo yamo nomedo kudho matek, mi geno mane oyudo wan-go ni dipo koreswa norumo chuth!

²¹Koro kane gisedak kuom ndalo mang’eny ka ok gichiem, Paulo nochung’ e nyimgi mowachonigi niya, “Owetena, dinyocha uwinj wachna, mi wawe kwang’ waa Krete, to da ok wanwang’o masirani, kendo gik moko da ok olal kama.

²²To koro akwayou ni mondo ubed gi chir! Onge kata ng’at achiel kuomu mabiro tho, to mak mana yie ema biro kethore.

²³Ang’eyo kamano nikech nikech nyoro gotieno malaika mar Nyasaye ma an ng’ate, kendo ma atiyone, nyoro obiro ira,

²⁴mi owacho niya, ‘Paulo, kik ibed maluor! Nyaka ichung’ e nyim Kaisar, kendo Nyasaye oseyie kuom ng’wonone ni joma kwang’ kodi duto ok bi tho.’

²⁵Kuom mano owetena, beduru gi chir, nikech ang’eyo ni Nyasaye biro timo mana kaka osewachona.

²⁶To yie nyaka moki e chula moro.”

²⁷Koro ne en otieno mar apar gang’wen, kendo yamo ne pod goyowa e nam Mediterania. To odiewuor tir, jokwang’ nogalo ni koro wasudo machiegni gi lowo.

²⁸Omiyo ne giluto tol motuene kidi e pi, mi giyudo ni tutne oromo mita piero ang’wen. Bang’e matin, ne gichako gipime kendo, mi ginwang’o ni tutne koro oromo mita piero adek.

²⁹Ne giluor ni yie biro tuomore e kite, omiyo ne gibolo rachungini ang’wen yoka bang’ yie, kendo ne gilemo ni mondo piny oyawre.

³⁰Jokwang’ koro ne dwaro tony weyo yie, omiyo ne giloro yie matin e pi, ka giriasore ni gidwaro bolo rachungini moko yoka wi yie.

³¹To Paulo nowacho ni jatend lweny kod askeche niya, “Ka jogi ok osiko e yie, to un uwegi ok unyal resoru.”

³²Kuom mano, askeche nong’ado tonde mane omako yie matinno, mi oweye odhi.

³³To kane piny koro dwaro yawore, Paulo nokwayogi giduto mondo gichiem, kowachonigi niya, “Usebedo ka chunyu chandore kuom ndalo apar gang’wen, kendo kuom ndalogo duto ok usechamo gimoro.

³⁴Omiyo koro akwayou ni mondo uchiem, uyud teko, nikech kata mana yie wiu achiel ok nolal.”

³⁵Kane Paulo osewacho kamano, nokawo makati, mi ogoyo ni Nyasaye erokamano e nyimgi giduto, eka nong’ingo mi ochamo.

³⁶Chuny jogo noduogo, kendo ng’ato ka ng’ato kuomgi nochiemo.

³⁷Waduto joma ne nie yie, kar rombwa ne mia ariyo gi piero abiriyo gauchiel.

³⁸Kane ji duto osechiemo moyieng’, ne giwito cham mane yie oting’o e nam mondo gimi yie odok mayot.

³⁹Kane piny oyawore, jokwang’ ne ok ong’eyo piny mane gintie, to ne gineno mbita moro motimo kuoyo, omiyo ne giparo ni, kanyalore, to gigow yie kanyo.

⁴⁰Kuom mano ne ging’ado tonde motuego rachungini, mi giweyo rachunginigo osiko e nam, to bende ne gigonyo tonde mamoko ngayi. Eka ne giywayo tanga yoka wi yie, mi yie ochako ng’uech, kochiko dhowath.

⁴¹To notuomo lowo kama pi thanythanyie, mi yoka wiye omoko matek, ma ok nyal ng’ingni. Eka apaka nogoyo yoka bang’e, mi oturo matindotindo.

⁴²Askeche ne dwaro nego joma otue, ni mondo kik moro kuomgi go abal, wuog oko, mi tony.

⁴³To jatend lweny ne dwaro reso ngima Paulo, omiyo notamogi ni kik gitim kamano. Nogolo chik ni mondo joma nyalo goyo abal okwong ochikre e nam ogo abal, ochop e lowo,

⁴⁴eka mondo joma odong’ oluw bang’gi, ka moko omako bepe, to moko omako mberni mobarore kuom yie. Kamano e kaka ne watony waduto, mi wachopo e lowo.