Read luo Jo-Rumi 10 Bible Online

Jo-Rumi 10 - luo bible

Jo-Rumi 10

¹Owetena, alamo Nyasaye matek mondo jo-Israel okwo, nikech mano ema chunya dwaro ahinya.

²Ayie ni giketo chunygi kuom tiyo ni Nyasaye, to gikia yo ma onego gitinego,

³nikech pok ging’eyo yo ma Nyasaye miyogo ji bet e winjruok kode, to gise mana temo loso yorgi giwegi. Kamano ne ok giyie luwo yo ma Nyasaye miyogo ji bet e winjruok kode.

⁴To koro Kristo osemiyo Chik obedo maonge gi tich, komiyo ji duto moyie kuome, bet e winjruok gi Nyasaye.

⁵ Gima ne Musa ondiko kuom wach bedo e winjruok gi Nyasaye kuom mako Chik wacho kama: “Ng’at ma omako Chik, Chik nomi obed mangima.”

⁶ To kuom wach bedo e winjruok gi Nyasaye kuom yie, to owachoe niya, “Kik ipenjri e chunyi ni, ‘Ng’ano ma didhi malo e polo?’ ” tiende ni, ng’ano ma didhi kwa Kristo obi e piny?

⁷“Kata kik ipenjri ni, ‘Ng’ano ma dilor mwalo e Piny Joma Otho?’ ” tiende ni, ng’ano ma digol Kristo a kuom joma otho?

⁸Ooyo Muma wacho kama: “Wach Nyasaye chiegni kodi; en mana e dhogi kendo e chunyi.” En e wach mar yie mwalando niya,

⁹Ka iwacho gi dhogi e lela ni Yesu e Ruoth, kendo iyie e chunyi ni Nyasaye ne ochiere oa kuom joma otho, to noresi.

¹⁰En kamano nikech ng’ato nyaka yie gi chunye mondo obed e winjruok gi Nyasaye, kendo nyaka owuo e lela gi dhoge mondo orese.

¹¹ Muma wacho niya, “Ng’at moyie kuome ok noywag ang’e.”

¹²Mano oriwo ji duto nikech onge pogruok e kind jo-Yahudi gi joma ok jo-Yahudi, to giduto gin gi Ruoth achiel man gi mwandu mang’eny mopogo ni ji duto malame.

¹³ Muma wacho ni, “Ng’ato ka ng’ato malamo Ruoth noresi.”

¹⁴To ere kaka ji nyalo lame, ka ok giyie kuome? Koso ere kaka digiyie kuom Jal ma pok giwinjo wachne? Koso digiwinj ni entie nadi, ka ng’at malandonigi wach onge?

¹⁵ Koso ere kaka ji nyalo lando Wach Maber ka ok oorgi? En mana kaka Muma wacho niya, “Mano kaka ji mor ka gineno joma kelo nigi Wach Maber!”

¹⁶ To ok en ni ji duto ne oyie Wach Maberno, to obet mana kaka Isaya wacho niya, “Ruoth, ere ng’ama oseyie wach mwalando?”

¹⁷Kuom mano yie a kuom winjo. To gima iwinjo en Wach Maber mawuoyo kuom Kristo.

¹⁸ To koro apenjo niya, “Bende nyalo bet ni jo-Israel ne ok owinjo Wach?” Ooyo! Ne gisewinjo, mana kaka Muma wacho ni, “Dwond joland wach osewinji e piny duto. Adier, wechegi osetundo e tung’ piny gi tung’ piny.”

¹⁹ Apenjo kendo niya, “Bende nyalo bet ni jo-Israel ne ok owinjo tiend wach?” To akwongo adwoko penjono kanyisou gima ne Musa owacho ni, “Anami nyiego maku kod joma ok oromo luong ni oganda. Adier, anami mirima maku kod oganda ma onge rieko.”

²⁰ To Isaya wuoyo gi chir niya, “Joma ne ok manya ema ne onwang’a. Adier, afwenyora ni joma ne ok penja.”

²¹ Kuom jo-Israel to owuoyoe niya, “Odiechieng’ duto narieyo bada, ka ahombo oganda ma wigi tek kendo ma piem koda, mondo oduog ira.”