Read luo Jo-Rumi 16 Bible Online

Jo-Rumi 16 - luo bible

Jo-Rumi 16

¹Apwoyonu nyaminwa Fibi. En jatich e kanyakla mar jo-Kristo man Kenkrea.

²Rwakeuru e nying Ruoth kaka jo-Nyasaye owinjore tim, kendo konyeuru e wach moro amora modwaro, nikech osekonyo ji mathoth, kaachiel gi an awuon bende.

³ Mosnauru Priska gi Akula ma jotich wetena kuom Kristo Yesu.

⁴Ne gichiwo ngimagi nikech an! Agoyonigi erokamano, to ok an kenda, to kanyakla duto mag jo-Kristo ma ok jo-Yahudi bende goyonigi erokamano.

⁵Mosnauru kanyakla mar jo-Kristo ma lemo e odgi. Bende mosnauru Epaineto osiepna, ma en ng’at mane okwongo yie kuom Kristo e piny Asia.

⁶Mosnauru Maria mosebedo katiyonu matek ahinya,

⁷kendo mosnauru bende Androniko kod Junias. Gin jo-Yahudi wetena, mane otwewago. Gin joma ogen kuom joote, bende ne gikwongona bedo jo-Kristo.

⁸Mosnauru Ampliato osiepna kuom Ruoth,

⁹kendo mosnauru Urbano ma jatich wadwa kuom Kristo, kod Stefano osiepna.

¹⁰Mosnauru Apele, ng’at mosetem moyud ni ja-Kristo maradier. Jood Aristobulo bende mosnauru.

¹¹Mosnauru Herodian, ma ja-Yahudi wadwa, kaachiel gi jo-Kristo ma jood Narkiso.

¹²Mosnauru Turfena gi Trufosa, ma jotiyo tich Ruoth matek. Bende mosnauru Persi osiepna mosetiyo tich Ruoth gi chunye duto.

¹³ Rufus, jatich matek mar Kristo, bende mosnauru, kaachiel gi min mare, mosebet ka rita ka nyathine.

¹⁴Mosnauru Asunkrito gi Flegon gi Herme gi Patroba gi Hermas kod owete man kodgi.

¹⁵Mosnauru bende Filologo gi Julia gi Nereas kod nyamin mare, gi Olumpa kod jo-Nyasaye duto man kodgi.

¹⁶Yogreuru gi mos mar jo-Nyasaye. Kanyakla duto mag joma oyie kuom Kristo omosou.

¹⁷Akwayou owetena ni beduru motang’ gi joma kelo pogruok kendo miyo ji lal, ka gitamore luwo puonj mane uyudo. Ayeuru kuom joma kamago,

¹⁸nikech ok gin jotich Ruodhwa Yesu Kristo, to gitiyo mana ni gombogi giwegi. Giwuondo joma kia gi weche mamit kendo malombo ji.

¹⁹Ji duto osewinjo ni umako Wach Maber; mano emomiyo amor kodu. Adwaro ni mondo udok joma riek korka timo gima ber, to ubed joma ofuwo korka timo gima rach.

²⁰Piyopiyo nono Nyasach kue biro miyo unyon Satan gi tiendu. Ng’wono mar Ruodhwa Yesu obed kodu.

²¹ Timotheo jatich wadwa, kaachiel gi Lukio gi Jason kod Sosipatro ma jo-Yahudi wetena, jomosou.

²²(An Tertio, mandiko baruani, bende amosou kuom Ruoth.)

²³ Gayo, ma an wendone, kendo ma bende jarwak jo-Kristo duto man ka e ode, omosou. Erasto ma jakeno mar dala, kod owadwa Kwarto, jomosou. [

²⁴Ng’wono mar Ruodhwa Yesu Kristo obed kodu un duto.]

²⁵Opak Nyasaye manyalo miyo ubed gi yie motegno, kaluwore gi Wach Maber mar Yesu Kristo ma alando. Wach Maber en wach mane opondo nyaka nene.

²⁶To koro Nyasaye mochwere osechiko ni mondo oele e lela mondo ogendini duto oyie kuome kendo omak chikne, mana kaka jonabi nondiko e Muma.

²⁷Duong’ obed ni Nyasaye kuom Yesu Kristo nyaka chieng’. En e kende ema oriek. Amen.