Read luo Jo-Rumi 4 Bible Online

Jo-Rumi 4 - luo bible

Jo-Rumi 4

¹Koro ere gima dwawachi kuom Ibrahim ma kwarwa? Ang’o mane oneno?

²Ka dine bed ni obet e winjruok gi Nyasaye nikech gik mane otimo, to kara da obedo gi gima omiyo onyalo sungore. To chutho oonge gi gima onyalo sungorego e nyim Nyasaye,

³ nikech Muma wacho niya, “Ibrahim noyie kuom Nyasaye, mi yieneno ema ne omiyo Nyasaye okwane ni en ng’ama kare.”

⁴Ka ng’ato osetiyo tich moro, to chudone ok kwan ka kony moro momiye amiya, to ikwano ka pok moyudo kuom luche.

⁵To ka ng’ato ok ogeno kuom gimoro mosetimo, to oyie mana kuom Nyasaye mamiyo joma richo bet e winjruok kode, to yieneno ema ikwano ka gima omiyo obet e winjruok gi Nyasaye.

⁶Mano bende e gima ne Daudi owacho kare, mak orango timbe mosetimo. Nowacho niya,

⁷ “Mano kaka joma Nyasaye oseweyonigi kethogi, kendo orucho richogi, gin johawi!

⁸Adier, ng’at ma Ruoth ok kwan ka jaricho en jahawi!”

⁹To uparo ni hawi mane Daudi owuoyo kuomeni, en mar joma oter nyangu kende koso? Ooyo, en mar joma ok oter nyangu bende, nikech wasehulo ni Muma wacho ni, “Yie mar Ibrahim ema ne omiyo Nyasaye okwane ni en ng’ama kare.”

¹⁰Nyasaye nokwane ni en ng’ama kare kosetere nyangu, koso ka podi? Donge nokwane kapok otere nyangu, to ok kosetere?

¹¹ To achien ne otere nyangu kaka ranyisi ni Nyasaye ne okwane ni en ng’at makare nikech yie mane en-go kane pok otere nyangu. Kuom mano, Ibrahim e wuon ji duto moyie kuom Nyasaye, kendo ma Nyasaye kwano ni joma kare, kata obedo ni ok otergi nyangu.

¹²To bende en e wuon jogo moter nyangu, to mana nikech giluwo yor yie mane wuonwa Ibrahim bende oluwo kane pok otere nyangu.

¹³ Nyasaye nosingore ni Ibrahim kod nyikwaye ni piny nobed margi to ne ok osingore kamano nikech Ibrahim norito chik, to mana nikech nokwane ni en ng’at makare kuom yie mane en-go.

¹⁴ Ka da bed ni gima Nyasaye osingore imiyo mana joma orito Chik, to kara yie ma ng’ato nigo onge tiende, kendo singruok mar Nyasaye bende onge tich.

¹⁵Chik kelo mirimb Nyasaye, to kama chik ongee, ketho chik bende ongee.

¹⁶ Gimomiyo yie nyaka bedie en ni mondo gik moko duto oyud nono kuom ng’wono, kendo singruok obed gi teko ni koth Ibrahim duto, ok mana ni joma rito Chik kende, to bende ni mago ma oyie mana kaka Ibrahim e wuonwa waduto,

¹⁷ mana kaka Muma wacho niya, “Aseketi wuon ogendini mang’eny.” Kuom mano, singruok nigi teko e nyim Nyasaye mane Ibrahim oyie kuome. En e Nyasaye machiero joma otho, kendo ma gima owacho miyo gik maonge betie.

¹⁸ Ibrahim noyie kendo nogeno agena, kata obedo ni gima dine mi ogen kamano ne onge! Mano omiyo nodoko wuon ogendini mathoth, mana kaka Muma wacho ni, “Nyikwayi nobed mana mathoth kamano.”

¹⁹ Kata obedo ni hike koro ne dirom mia achiel, ong’eyo ni ringre owuon chalo gi gima otho, kendo ni Sara bende koro ndalone mar nywol osekadho, to yie mare ne ok odok chien.

²⁰Ne pod ogeno agena singruok mar Nyasaye ma ok oriwo gi kiawa. Yie mare nopong’ gi teko, mi omiyo Nyasaye duong’,

²¹ka en gi ratiro ni Nyasaye nigi teko mar timo gima ne osesingore ni notim.

²²Yieno ema ne omiyo “Nyasaye okwane ni en ng’ama kare.”

²³To weche mondik ni, “Nyasaye nokwane ni en ng’ama kare,” ne ok ondiki mana nikech Ibrahim kende,

²⁴to nondiki nikech wan bende, ma ibiro kwano ni joma kare nikech wayie kuom Jal mane ochiero Yesu Ruodhwa oa kuom joma otho.

²⁵ Yesu ema ne ochiw mi otho nikech richowa, to ne ochiere mondo wabedi e winjruok gi Nyasaye.