Read luo 1 Jo-Korintho 13 Bible Online

1 Jo-Korintho 13 - luo bible

1 Jo-Korintho 13

¹Kata dabed ni awuoyo gi dhok mag ji, kata mana gi dho malaika, to aonge gi hera, to achalo mana okot maywak, kata olang’ migoyo.

² Kata da bed ni an gi mich mar hulo wach moa kuom Nyasaye, kendo ang’eyo midhierni kod rieko duto, kendo kata da abed gi yie mogik ma anyalo gologo gode kuonde ma gintie, to aonge gi hera, to ok an gimoro ngang’!

³Kata da bed ni apogo giga duto ni joma odhier, kendo kata da achiwo ringra mondo owang’, to aonge gi hera, to mano ok konya kata matin.

⁴Hera timo kinda, kendo ong’won. Ok otim nyiego, kendo ok osungre, bende ok opakre.

⁵Hera ok tim gima kuodo wich, ok odwar mare kende, iye ok wang’, bende ok omak sadha.

⁶Ok omor gi tim ma ok kare, to omor gi adiera.

⁷Hera odhil e weche duto, kendo kata ang’o ema otimore, to pod en gi yie, gi geno, kod kinda.

⁸Hera ok rem. Tich hulo wach to norum, kendo dhum gi dhok mayoreyore nowe, bende rieko notieki,

⁹nikech rieko ma wan-go orem, kendo tich hulo wach moa kuom Nyasaye bende orem,

¹⁰to ka gima ogik kare obiro, to mano morem norum.

¹¹Kane an nyathi, ne awuoyo kaka nyathi, kendo riekona ne mar nyathi, bende ne aparo kaka nyathi. To koro kaka asedoko ng’ama duong’, aseweyo timbe mag nyithindo.

¹²Koro waneno mana kido matiptip ka joma neno e rang’i marachrach, to chieng’no wananen malong’o. Rieko ma an-go sani en rieko morem, to chieng’no anang’e Nyasaye chuth, mana kaka Nyasaye ong’eya.

¹³To gik moko adek ema osiko. Gin yie, gi geno, kod hera; to gima duong’ moloyo kuomgi en hera.