Read luo 1 Jo-Korintho 16 Bible Online

1 Jo-Korintho 16 - luo bible

1 Jo-Korintho 16

¹ To kuom wach solro mitimo ni jo-Nyasaye, un bende timuru kaka nanyiso kanyakala mag jo-Kristo manie piny Galatia mondo otim.

²Chieng’ Jumapil ka Jumapil, ng’ato ka ng’ato kuomu mondo opog moko kuom gik ma Nyasaye osekonyego, oket tenge mondo solro kik tim ka abiro.

³Yieruru jomoko kuomu, kendo ka abiro, to anaorgi gi barupe mondo giter chiwou Jerusalem,

⁴kendo ka owinjore ni an bende onego adhi, to anadhi kodgi.

⁵ Anabi iru ka aselando Wach Maber e piny Makedonia,

⁶kendo dipo ka abedo kodu, mi kamoro datiek ndalo chwiri kodu, mondo ukowa maber kamoro amora ma adhiye.

⁷Anatim kamano nikech ok adwar nenou mana ka akadho, to ageno bedo kodu kuom ndalo moko, ka Ruoth oyie.

⁸ To pod abiro bet Efeso ka, nyaka chop chieng’ Pentekost,

⁹nikech oyawna dhoot malach kaeri mar tiyo tich maduong’ makelo konyruok, to bende nitie wasigu mang’eny.

¹⁰ To ka Timotheo obiro iru, to neuru ni obedo kodu koonge luoro, nikech otiyo ni Ruoth mana kaka an.

¹¹Omiyo kik ng’ato chaye, to ukowe gi kue mondo obi ira. Eri warite, wan kod owete.

¹²To koro adwaro nyisou wach owadwa Apolo. Asejiwe ahinya mondo obi iru kod owete, to pod ok oyie maber mondo obi e ndaloni, to obiro biro ka oyudo thuolo.

¹³Beduru motang’, kendo chung’uru motegno kuom yieu. Beduru gi chir kendo gi jing’o.

¹⁴Bende gik moko duto mutimo, timuru gi hera.

¹⁵ Owetena, donge ung’eyo Stefano kod joodgi? Gin e joma okwongo doko jo-Kristo ee piny Akaya, kendo gisechiwore mondo giti ni jo-Nyasaye.

¹⁶Koro akwayou owetena, ni mondo uyie bet e bwo joma kamago, kendo e bwo ng’ato ka ng’ato ma bende tiyo tich Nyasaye matek.

¹⁷Amor ahinya nikech Stefano gi Fortunato kod Akaiko josebiro, nimar gisekonya karu,

¹⁸kendo giseduogo chunya, mana kaka aparo ni giseduogo chunyu bende. Onego uyie joma kamago.

¹⁹ Kanyakla mag jo-Kristo manie piny Asia ooronu mos, kendo Akula gi Priska kod kanyakla mar jo-Kristo malemo e odgi bende omosou ahinya kuom Ruoth.

²⁰Owete duto omosou. Yogreuru gi mos maler.

²¹An Paulo ema koro andikonu mosni gi lweta awuon.

²²Ka ng’ato ok ohero Ruoth, to mondo okuong’re! Ruodhwa bi!

²³Ng’wono mar Ruoth Yesu obed kodu.

²⁴Herane obed kodu kuom Kristo Yesu.