Read luo 1 Jo-Korintho 3 Bible Online

1 Jo-Korintho 3 - luo bible

1 Jo-Korintho 3

¹Kamano owetena, ne ok anyal wuoyo kodu kaka awuoyo gi joma nigi Roho. To ne nyaka awuo kodu ka gima un joma onge gi Roho, kendo mapod yom kuom Kristo.

² Ne apidhou mana gi chak, to ok gi chiemo matek, nikech ne pok utegno. To kata mana kawuono, pod ok unyal chame,

³nimar pod uchalo joma onge gi Roho, nikech kapod nitie nyiego e chunyu, kendo udhaw e kindu uwegi, to adier mano nyiso ni pod uchalo gi joma onge gi Roho, kendo utimo mana timbe mag dhano.

⁴ Ka jomoko kuomu wacho ni, “Wan jo-Paulo”, to moko ni, “Wan jo Apolo”, to mano donge nyiso ni utimo mana timbe mag dhano koso?

⁵Un uparo ni Apolo en ng’a? Koso Paulo to ng’a? Donge wan mana jotich Nyasaye mane omiyo uyie kuom Kristo? Ng’ato ka ng’ato kuomwa tiyo tich mane Ruoth omiye mondo oti.

⁶ An ne apidho kodhi, to Apolo ema ne oolo pi, to chutho Nyasaye ema ne omiyo odongo.

⁷Kamano ng’at ma opidho yath, kata ng’at moolo pi ok kwan ni osetimo gimoro, to mak mana Nyasaye momiyo yadhno odongo ema otimo gimoro.

⁸Onge pogruok manie e kind jal ma pidho gi jal maolo pi, to Nyasaye nomi ng’ato ka ng’ato pok mana kaka tichne owuon obet.

⁹Waduto wan jotich Nyasaye; un to un puoth Nyasaye, kendo un ot ma Nyasaye gero.

¹⁰Kuom mich mar Nyasaye mane omiya kuom ng’wonone, ne aketo mise ka jagedo molony, kendo koro ng’at machielo gedo kuom miseno. To ng’ato ka ng’ato nyaka non maber kaka ogedo kuom miseno.

¹¹Onge mise moro nono ma ng’ato nyalo keto mak mana mise ma oseketi, ma en Yesu Kristo.

¹²Ng’ato nyalo gedo kuom miseno gi dhahabu, kata gi fedha, kata gi kite ma nengogi tek, kata gi yien, kata gi lum, kata gi odundu,

¹³to tich ng’ato ka ng’ato nong’ere malong’o mana Chieng’ Giko. Chieng’no nobi gi mach, kendo mach notem tich mane ng’ato ka ng’ato otiyo.

¹⁴Ka gima ne ng’ato ogero kuom miseno osiro mach, to enoyud pok,

¹⁵to ka tich ng’ato owang’, to ok noyud pokne, to en owuon norese, to mana ka ng’ama osekadho e mach.

¹⁶ Donge ung’eyo ni un e Hekalu mar Nyasaye, kendo ni Roho mar Nyasaye odak e iu?

¹⁷To ka ng’ato oketho Hekalu mar Nyasaye, to Nyasaye nokethe, nimar Hekalu mar Nyasaye ler; to un e Hekalu nogo!

¹⁸Kik ng’ato wuondre owuon! Ka ng’ato kuomu galo ni en ng’at mariek, kaka pinyni okwano rieko, to onego obed mofuwo, eka mondo obed mariek adier,

¹⁹ nikech rieko mar pinyni en mana fuwo e wang’ Nyasaye. Nitie wach moro e Muma mawuoyo kuom Nyasaye kama: “En ema omako jorieko gi riekogi giwegi.”

²⁰ To moro bende wacho niya, “Ruoth ong’eyo ni paro jorieko gin nono.”

²¹Omiyo ng’ato kik pakre nikech dhano, nimar gik moko duto gin mau.

²²Adier, bed ni en Paulo, kata en Apolo, kata en Petro, kata en pinyni, kata en ngima, kata en tho, kata gin gik matimore ndalogi, kata gik mabiro, to duto gin mau!

²³Un to un mag Kristo; Kristo to en mar Nyasaye.