Read luo 2 Jo-Korintho 1 Bible Online

2 Jo-Korintho 1 - luo bible

2 Jo-Korintho 1

¹ An Paulo, jaote Yesu Kristo kuom dwaro mar Nyasaye, ema andiko baruani kaachiel gi owadwa Timotheo. Wandikonu un kanyakla mar joma oyie kuom Nyasaye man Korintho, kendo ni jo-Nyasaye duto manie piny Akaya.

²Ng’wono gi kue moa kuom Nyasaye kod ruodhwa Yesu Kristo obed kodu.

³Duong’ obed ni Nyasaye ma wuon Ruodhwa Yesu Kristo. En e wuon ng’wono kendo makonyowa e yore duto.

⁴Okonyowa e masichewa duto mondo wan bende wakony joma nigi masira moro amora, ka wanyisogi kaka Nyasaye osekonyowa.

⁵Kaka masiche moko mag sand mang’eny mane Kristo oneno koro bironwa mogundho e kaka kony mang’eny ma wayudo kuom Kristo bende koro bironwa mogundho.

⁶Ka isandowa, to en mana ni mondo okonyu, kendu uyud warruok. To ka ikonyowa, to en bende mana ni mondo Nyasaye okonyu, ka udhil gi sand ma wan bende wayudo,

⁷kendo geno mwagenougo ogurore nikech wang’eyo ni kaka uyudo sand kodwa e kaka uyudo kony kodwa bende.

⁸ Owetewa, wadwaro nyisou chandruok mane wayudo e piny Asia, ne omiwa ting’ mapek mohewo tekrewa, mi chunywa oa ni ok wanachak wabed mangima.

⁹Chutho, ne wagalo ni oseng’adnwa buch tho. To mano notimore mondo kik wagen kuomwa wawegi, to wagen mana kuom Nyasaye machiero joma otho.

¹⁰Noresowa e masiche malich mag tho kamano, kendo nochak oreswa. En ema waketo genowa kuome ni obiro medo resowa,

¹¹ka un bende ukonyowa kulemonwa. Kamano, kaka ji mang’eny bende nobed ka goyo ni Nyasaye erokamano nikech mich momiyowa kuom ng’wonone.

¹²To gimoro achiel mamiyowa mor en ni: wang’eyo malong’o e chunywa ni adier mar Nyasaye ema osetelonwa e kindwa gi ji, to moloyo to wasebet kamano mana kuom ng’wono mar Nyasaye, to ok kuom rieko mar dhano.

¹³Weche mwandikonugi onge gi tiendgi moko mopondo, to mak mana mago ma unyalo somo, mi uwinji. Kata obedo ni sani pod ung’eyowa mana matin kende,

¹⁴to ageno ni ubiro ng’eyowa malong’o, mondo chieng’ ma Ruoth Yesu biroe, to ubed mamor nikech wan, mana kaka wan bende wanabed mamor nikech un.

¹⁵Ne an gi geno ahinya kuom wachno, omiyo ne achano mokwongo mondo abi iru, uyud gueth diriyo,

¹⁶ nikech ne achano mondo aneu ka akadho adhi Makedonia, kendo anachak aneu ka aduogo aa kuno, mondo ukowa ka adhi Judea.

¹⁷To uparo ni kane achano kamano to ne an jahubagabaga koso? Koso uparo ni achano yorena mana kaka dhano chano, ka weche ariyo, ma “Ee” gi “Ooyo” okikore e chunya?

¹⁸Chutho, kaka Nyasaye en jaadiera, wach ma wawacho ok oting’o “Ee” kaachiel gi “Ooyo”,

¹⁹ nikech Yesu Kristo wuod Nyasaye, ma wan gi Sila kod Timotheo ne walandonu wachne, ok en “Ee” gi “Ooyo”. To en e “Ee” mogik ma Nyasaye wacho,

²⁰nimar en ema singruok Nyasaye duto chopo kare kuome. Mano emomiyo kwamiyo Nyasaye duong’ to wawacho ni, “Amin”[1] kuom Yesu Kristo.

²¹Jal mamiyo wan kod un wabedo gi ratiro ni wan kuom Kristo en Nyasaye. En ema osewirowa,

²²kendo oketo kido mare kuomwa, kendo omiyowa Roho mondo odag e chunywa kaka mich mokwongo mar gueth ma wabiro yudo achien.

²³To aluongo Nyasaye obed janenona ka aramo ni ne akechou emomiyo ne ok achako aduogo Korintho.

²⁴Ok wan gi teko kuom yieu ni nyaka uyie gima wawacho, nikech un joma nigi yie motegno. To watiyo kaachiel kodu mana ni mondo ubed mamor.