Read luo 2 Jo-Korintho 12 Bible Online

2 Jo-Korintho 12 - luo bible

2 Jo-Korintho 12

¹Ochuna ni nyaka apakra, kata obedo ni ok kony gimoro kamano. To koro abiro wuoyo kuom fweny maseneno kod weche mopondo ma Ruoth oseelona.

²Ang’eyo ja-Kristo[2] moro mane oter e polo mar adek, higni apar gang’wen mokadho. (Ok ang’eyo ka ringre ema ne oter kuno, kata ne oneno mana fweny.)

³Awacho kendo ni ang’eyo ni ng’atno noter e Paradis. (To ok ang’eyo kata gino notimore adier, kata ne en mana fweny. Nyasaye kende ema ong’eyo.)

⁴Kuno, nowinjoe weche maling’ling’ ma ng’ato ok dihedhre hulo.

⁵Ng’at ma kamano ema nyalo miyo apakra, to ok abi pakora nikech an awuon, to mak mana ni abiro pakora kuom nyawona

⁶To ka dabed ni adwaro pakora, to ok dabedo ng’ama ofuwo, nikech dawacho mana adiera. To ok anyal pakora, nimar ok adwar ni mondo ng’ato opaka moloyo gima oseneno katimo, kata ma owinjo ka awacho.

⁷Emomiyo ne omiya kudho machwowo ringra, ma en jaote mar Satan, mondo omonja kik asungra, kata kik ating’ra malo nikech duong’ miwuoro mar gik mane Nyasaye ofwenyona.

⁸Ne asayo Ruoth didek mondo ogol wachni kuoma,

⁹to nowachona niya, “Mich ma amiyi kuom ng’wonona oromi, nikech kama nyawo nitie ema teko tiyoe moloo.” Emomiyo amor ahinya pakora nikech nyawona, mondo teko mar Kristo odag kuoma.

¹⁰Mano omiyo ayie nyawo, kata achaya, kata chandruok, kata sand, kata thagruok, nikech Kristo, nimar ka wanyap, to eka watek.

¹¹Atimora ka ng’ama ofuwo, to un ema usemiyo abedo kamano. Ne onego upwoya, nimar kata obedo ni ok an gimoro, to joote muparo ni dongogo ok oloya kata matin.

¹²Ne anyisou ni an jaote maradier katimonu ranyisi gi honni kod tije madongodongo, ka adhil gi chandruok kod masiche.

¹³Koro ere yo mane kanyakla mamoko mag jo-Kristo oloyougo, mak mana ni an awuon ema ne ok akwayou mondo ukonya? Ka uneno ni mano en ketho, to ara yieuru ung’wonna kuom kethonano!

¹⁴Koro aikora mondo abi iru e limbena mar adek, to pod ok nadwar mondo ukonya, nikech ok mwanduu ema adwaro, to adwaro mana un uwegi. Nyithindo ok onego ken ni jonywolgi, to jonywol ema keno ni nyithindgi.

¹⁵An to ayie chiworanu gi mor, katiyonu gi tekra duto. To ka an aherou ahinya kamano, koro mano dimi uhera mana matin koso?

¹⁶Ung’eyo ni ne ok akwayou mondo ukonya, to pod ubiro wacho ni ne ahoyou, mi amakou gi rieko.

¹⁷To joma ne aoro iru ne amiyo omayou gimoro koso?

¹⁸Adier, ne akwayo Tito mondo obi iru, kendo ne aore gi owadwa machielo cha. To Tito nomayou gimoro koso? Donge wan gi Tito ne wawuotho gi Roho achiel, kendo e yo achiel?

¹⁹Kamoro uparo ni watemo doko joma beyo e nyimu kwandikonu wechegi duto! Ooyo, wawuoyo mana e nyim Nyasaye, ka wan kuom Kristo. Osiepena, gik moko duto mwatimo, watimo mana ni mondo wagergo chunyu.

²⁰Aluor ni ka abiro to dipo ka anwang’o ka ok uchal kaka adwaro, kendo un bende dipo ka unwang’o ni ok achal kaka udwaro! Aluor ni dhaw gi nyiego gi mirima gi ichlit gi ajara gi kuoth gi sunga kod koko nyalo betie.

²¹Bende aluor ni ka abiro to Nyasacha dipo ka omiya bedo gi wichkuot e nyimu, mi dabed gi kuyo nikech joma thoth mane oketho, to otamore lokore kuom tim ma ok ler mane gisebedo ka gitimo, kaka terruok kod anjawo.