Read luo 2 Jo-Korintho 2 Bible Online

2 Jo-Korintho 2 - luo bible

2 Jo-Korintho 2

¹Mano emomiyo naneno ni ber mondo kik achak alimu kendo, ka limbenano dimiu chuny lit,

²nikech ka amiyou chuny lit, to koro ere ng’ama dimiya mor, ka ok mana un ma asemiyo chuny litgo?

³Mano emomiyo nandikonu baruano. Ne ok adwar biro iru mondo ayud chuny lit kuom joma onego miya mor, nimar ang’eyo malong’o ni ka amor to un bende umor uduto.

⁴Ne andikonu ka chunya okuyo kendo chandore ahinya, kendo ka pi wang’a chuer mang’eny, to ok ni mondo amiu chuny lit, to mana ni mondo ung’e hera maduong’ ma aherougo.

⁵Ng’at moro osekelo chuny lit, to ok an ema osemiya chuny litno, to mana machiegni un duto ema osemiyou chuny lit, ka ok adwar jimbo wach.

⁶To kum ma jou mathoth osemiyo ng’atno oseromo,

⁷omiyo koro onego uwene kethone, kendo uduog chunye, nono to kuyo malit ohewe.

⁸Emomiyo akwayou mondo unyise ni uhere.

⁹Mano emomiyo ne omiyo andikonu, mondo atemugo, ang’e ka un joma oyie winjo wach.

¹⁰Ka uweyo ni ng’ato kethone, to an bende aweyone kethone, nikech kapo ni aweyo ni ng’ato kethone, to aweyone mana nikech un, kendo e nyim Kristo,

¹¹mondo Satan kik lowa, nikech wang’eyo riekone!

¹² Kane achopo Troa mondo aland Wach Maber mar Kristo, ne ayudo ka dhoot oyaworena malach mondo ati ni Ruoth.

¹³To chunya ne onge gi kue, nikech ne ok anwang’o owadwa Tito. Omiyo nagoyo oriti ni jokuno, mi achweyo Makedonia.

¹⁴To wagouru ni Nyasaye erokamano nikech wan ma wan kuom Kristo, otelonwa pile koselocho, kendo komiyo walando wach man kuom Kristo kuonde duto, mana ka tik mang’ue ng’ar.

¹⁵Wachalo gi ubani mang’ue ng’ar mar misango ma Kristo ochiwo ni Nyasaye, malandore e kind joma ireso kod joma lal.

¹⁶Kuom joma lal en tik mar tho makelo tho, to kuom joma ireso to en tik mar ngima. Koro ere ng’ama nyalo gik ma kamago?

¹⁷Wan ok wachal gi ji mathoth makonyore gi Wach Nyasaye e yo ma ok kare, mondo oyudgo ohala. Ooyo, wan joma Nyasaye oseoro, omiyo wawuoyo e nyim Nyasaye gi adiera ka joma ni kuom Kristo.