Read luo 2 Jo-Korintho 3 Bible Online

2 Jo-Korintho 3 - luo bible

2 Jo-Korintho 3

¹Koro mano nenore ka gima wachako wapakore kendwa koso? Wan ok wadwar barupe mag pak ma wabirogo iru, kata ma waago kuomu, kaka jomoko kuomu dwaro.

²Un e barupwa mondiki e chunywa ma ng’ato ka ng’ato nyalo neno, kendo somo.

³ Nenore ratiro ni un e barua moa kuom Kristo, mane wakelo. Ok en barua mondik gi wino, to ondiki gi Roho mar Nyasaye Mangima. Bende ok ondike e kite mopa, to ondike e chuny dhano.

⁴Wawacho kamano nikech wan gi geno e nyim Nyasaye kuom Kristo.

⁵Wan to waonge gi teko moro kuomwa wawegi mamiyo wawacho ni wanyalo timo gimoro, to gima wan-go a mana kuom Nyasaye,

⁶ kendo en ema ne otimowa jotich Winjruok Manyien. Ok en Winjruok mar chik mondiki, to en mar Roho. Chik mondiki kelo tho, Roho to kelo ngima.

⁷ Chik mane ogor e kite nukta ka nukta osebet kakelo tho, to kata kamano nobiro gi ler maduong’ mane omono jo-Israel ng’iyo wang’ Musa tir, kata obedo ni lerno ne rumo kamano.

⁸Koro gima Roho kelo donge nyaka bed gi ler maduong’ moloyo koso?

⁹Ka gima kelo bura ema ne obiro gi ler maduong’ machalo kamano, koro gima Roho kelo, mamiyo wabedo e winjruok gi Nyasaye donge dibed gi ler maduong’ moloyo?

¹⁰Adier, ler mane nigi duong’, koro ok nigi duong’ ngang’, nikech ler maduong’ moloye osebiro.

¹¹Ka gima rumo ema nigi ler ma kamano, koro gima dak mosiko to dibed gi ler maduong’ machal nade!

¹²Wawuoyo gi chir nikech geno ma kamano ma wan-go.

¹³ Wan ok watim kaka Musa, mane umo wang’e gi rageng’ mondo jo-Israel kik ne ler ka duono kendo rumo.

¹⁴To chutho chuny jo-Israel nodinore, nikech nyaka chil kawuono chunygi pod oum gi rageng’no ka isomo Muma Machon, nimar rageng’no igolo mana ka ng’ato ni kuom Kristo.

¹⁵Kata mana ndalogi, ka isomo Chik Musa to rageng’no pod oumo auma chunygi.

¹⁶ To Muma wacho ni, ka ng’ato olokore ni Ruoth to rageng’no igolo.

¹⁷To Ruoth nogono e Roho kendo, kama Roho mar Ruoth tinie, to thuolo tinie.

¹⁸Wan duto, ma waonge rageng’ e wang’wa, to wachalo gi rang’i, kendo wamiyo ler mar Ruoth nenore, kendo lerno medore ameda pile, ka kitwa medo lokore machal kode. Mano en tich Ruoth ma en Roho.