Read luo 2 Jo-Korintho 4 Bible Online

2 Jo-Korintho 4 - luo bible

2 Jo-Korintho 4

¹Kaka Nyasaye ema osemiyowa tijni kuom ng’wonone, omiyo ok wanyal nyosore.

²Wasekwedo timbe mag mudho kendo makuodo wich. Ok wawuoth gi miganga, bende ok wagaj Wach Nyasaye, to wawacho mana adiera e lela e nyim Nyasaye, kwanyiso wawegi ni wan kare, kendo wamiyo ji duto yie kodwa.

³Watimo kamano nikech ka Wach Maber mwalando ogeng’ore, to ogeng’ore mana ni joma lal.

⁴Gin joma ok yie, ma nyasach pinyni osedino chunygi, mondo kik gine ler ma Wach Maber manyiso ji duong’ maler mar Kristo, ma en owuon e kido mar Nyasaye.

⁵Ok waland wach kuomwa wan wawegi, to walando mana wach ni, Kristo Yesu en Ruoth, kendo ni wan mana jotichu nikech Kristo.

⁶ Watimo kamano nimar Nyasaye achiel mane owacho ni mondo ler orieny e chunywa mondo okelnwa ler mar ng’eyo duong’ mar Nyasaye mineno e wang’ Yesu Kristo.

⁷To wan ma wan gi mwandu mar chuny, wachalo mana agulini mag lowo, mondo onenre ni teko maduong’ ahinyano oa kuom Nyasaye, to ok oa kuomwa wawegi.

⁸Pile idiyowa koni gi koni, to kata kamano ok dinnwa. Wadhier nono, to chunywa ok a.

⁹Isandowa, to ok jwang’wa, bende igoyowa piny, to ok negwa.

¹⁰Pile wating’o tho mane Yesu othogo e ringrewa,

¹¹nimar kata obedo ni wangima, to pile iterowa kar tho nikech Yesu, mondo ngima mar Yesu bende onenre e ringrewa matho.

¹²Kamano tho tiyo kuomwa, to un, ngima tiyo kuomu.

¹³ Wan gi yie machalo gi mano ma Muma wuoyo kuome ni, “Ne ayie, emomiyo nawuoyo.” Kamano wan bende wayie, emomiyo wawuoyo.

¹⁴Wang’eyo ni Nyasaye, mane ochiero Ruoth Yesu oa kuom joma otho, nochierwa wan bende kaachiel gi Yesu, mi terwa e nyime kaachiel gi un bende.

¹⁵Mago duto obetie nikech un, mondo kaka ji mayudo ng’wono mogundho mar Nyasaye medore, e kaka erokamano mimiyogo Nyasaye duong’ bende omedore.

¹⁶Kuom mano, chunywa ok nyosre. Kata obedo ni ringrewa rumo, to chunywa iloso manyien pile ka pile,

¹⁷nimar thagruok matin mwayudoni rumo piyo, to obiro kelonwa duong’ miwuoro kendo mosiko,

¹⁸nikech ok waketo parowa e gik mineno, to mana e gik ma ok ne. Gik mineno rumo, to gik ma ok ne osiko mochwere.