Read luo Jo-Efeso 5 Bible Online

Jo-Efeso 5 - luo bible

Jo-Efeso 5

¹Kaka un nyithind Nyasaye mohero, nyaka utem mondo ubed machal kode.

² Beduru gi hera, mana kaka Kristo noherowa, mi ochiwonwa ngimane obedo misango madum tik mamit ni Nyasaye.

³Terruok gi tim ma ok ler moro amora, kata gombo, kik bedi e kindu, kendo kata mana wacho kik wachi nimar mano ok owinjore gi jo-Nyasaye,

⁴kendo tim ma kuodo wich, kata twak mofuwo, kata oyuma, bende ok owinjore. To moloyo onego ugo mana erokamano ni Nyasaye,

⁵nikech ung’eyo ni ng’ama terore kata ma ok ler, kata ma jagombo, ma en ng’ama lamo nyiseche manono, ok noyud gueth mar Loch Kristo gi Nyasaye.

⁶Kik uwe ng’ato wuondu gi weche manono, nikech gik ma kamago ema miyo Nyasaye olo mirimbe kuom joma tamore winjo wachne.

⁷Kuom mano, kik urip gi joma kamago ngang’.

⁸Chon ne un jomudho, to koro, kaka usedoko jo-Ruoth, un joler. Omiyo nyaka uwuoth ka joma nie ler,

⁹nimar ler ema kelo ber gi timbe makare kod adiera duto.

¹⁰Temuru mondo ung’e gik malong’o ni Ruoth.

¹¹Beduru mabor gi joma timo timbe mag mudho maonge ohala. To moloyo umi kit timbegi ong’ere ratiro.

¹²En wichkuot kata mana wacho gik ma gitimo ling’ling’.

¹³To ka gik moko duto ogol e lela, to kitgi madiera nenore,

¹⁴nikech gima kite onenore malong’o e lela, lokore ler. Mano emomiyo iwero niya, “In ma inindo, chiew! Chier, ia kuom joma otho, mondo Kristo orieny kuomi.”

¹⁵Emomiyo tang’uru ahinya kaka onego ubedi. Kik ubed ka joma ofuwo, to beduru ka joma riek.

¹⁶ Kik uketh kinde ma un-go, nikech ndalogi gin ndalo mag richo.

¹⁷Kuom mano, kik ubed joma ofuwo, to temuru ng’eyo gima Ruoth dwaro.

¹⁸Weuru mer, nono to ubiro ketho ngimau chuth. Kar timo kamano, to Roho ema mondo opong’u.

¹⁹ Weruru wende Zaburi, gi wende lemo ka un kaachiel, kendo kuwer kamano, to denduru Ruoth e chunyu.

²⁰Kamano gouru erokamano pile ni Nyasaye Wuoro kuom gik moko duto, e nying Ruodhwa Yesu Kristo.

²¹Beduru gi winjruok e kindu, kumiyog Kristo duong’.

²² Un mon luoruru chwou mana kaka uluoro Kristo,

²³nikech dichwo e wi dhako, mana kaka Kristo e wi kanyakla mar joma oyie kuome, ma en ringre, kendo en jawar mare.

²⁴Kuom mano, mon nyaka winj chwogi e weche duto, mana kaka kanyakla mar jo-Kristo winjo Kristo.

²⁵ Un chwo, heruru mondu mana kaka Kristo nohero kanyakla mar joma oyie kuome, mochiwo ngimane nikech en.

²⁶Ne ochiwore kamano mondo opwodhe, kolwoke gi pi kendo gi wach,

²⁷mondo ka okawe obedo mare, to obed gi duong’ kendo maler, maonge chilo kata jowruok kata gimoro amora ma kamano.

²⁸Chwo onego oher mondgi mana kaka gihero ringregi giwegi. Ng’at mohero chiege oherore owuon.

²⁹Onge ng’ama ok dwar ringre owuon, to opidhe kendo orite, mana kaka Kristo bende rito kanyakla mar joma oyie kuome,

³⁰nikech en ringre owuon. Wan to, wan fuond ringreno.

³¹ En mana kaka Muma wacho niya, “Emomiyo, ng’ato weo wuon gi min, to padore kuom chiege, kendo ji ariyogo doko ringruok achiel.”

³²Nitie adiera maduong’ mopondo e wachni, to aneno ni owuoyo kuom Kristo gi kanyakla mar joma oyie.

³³To un bende owuoyo kuomu kama: Ng’ato ka ng’ato mondo oher chiege kaka oherore owuon, kendo dhako ka dhako bende nyaka luor chwore.