Read luo Jo-Filipi 2 Bible Online

Jo-Filipi 2 - luo bible

Jo-Filipi 2

¹Ka bedowa kuom Kristo nyalo kelonwa hoch, kata hera maduogo chuny, kata bedo e achiel kuom Roho, kata ng’wono kod miwafu,

²to kara beduru gi paro achiel, gi chuny achiel mondo umi chunya opong’ gi mor.

³Kik ubed gi piem kata sunga, to beduru mobolore, ka ukwanoru ka joma tindoe moloyo jomoko,

⁴kendo kik upar mana gima konyou uwegi, to nyaka upar gima konyo jomoko bende.

⁵Paro mae chunyu nyaka bed machal gi paro mane Kristo Yesu nigo:

⁶Kite ne kit Nyasaye nyaka a chakruok, to ne ok otuere ni nyaka osik marom gi Nyasaye,

⁷to notimore gima nono. Nokawo kit misumba, mi odoko dhano mana ka wan, kendo konenore ka dhano kamano,

⁸to nobolore, kendo nowinjo wach nyaka tho, mana tho mar msalaba!

⁹Mano emomiyo Nyasaye ne omiye duong’ ahinya e polo, kendo omiye nying’ moloyo nying’ duto.

¹⁰ Kamano gik moko duto manie polo gi manie piny kod manie bwo piny mondo ogo chonggi piny, omi nying Yesu duong’,

¹¹kendo ji duto mondo ohul ni Yesu Kristo e Ruoth, mondo Nyasaye Wuoro bende oyud duong’.

¹²Kuom mano, osiepena, kaka ne uwinjo wachna kane an kodu, koro ka an mabor kodu, to ber mondo uwinj wachna moloyo. Tiuru gi luoro kod kibaji, mondo umi warruok ochop kare,

¹³nikech Nyasaye owuon ema tiyo e chunyu, komiyou dwaro kendo timo gima long’one.

¹⁴Gimoro amora mutimo to timuru ka ok ung’ur, kata ka ok ugoyoe mbaka.

¹⁵ Nyaka ubed nyithind Nyasaye maler kendo maonge wach, kubedo maonge ketho e kind tieng’ mobam kendo ma jarichoni, mondo urieny e kindgi ka sulue marieny e polo,

¹⁶kunyisogi wach ngima. Ka utimo kamano, to unumi abed mamor chieng’ ma Kristo obiroe, nikech mano nonyis ni ng’uech ma aringoni, kod tich ma atiyo, ok ne akethoe tekra kayiem nono.

¹⁷Yie maru en misango muchiwo ni Nyasaye, omiyo kata ka obedo ni remba iolo kimedo e misangono, to berna, kendo adwaro mondo uduto ung’e kaka amor.

¹⁸Kamano e kaka un bende onego ubed mamor, mondo wabed mamor kaachiel.

¹⁹Ageno ni ka Ruoth Yesu oyie, to abiro oro Timotheo iru mapiyo, eka chunya noduogi ka awinjo wach ma kuomu.

²⁰En bende ema chunye chalo gi mara, kendo en ema oparou adier,

²¹nikech ji duto dwaro mana mekgi giwegi, to ok dew wach Yesu Kristo.

²²To uduto ung’eyo ber mar Timotheo, kendo kaka osekonya e tich mar lando Injili, mana ka wuowi makonyo wuon.

²³Mano emomiyo en ema ageno ore iru piyo, ka aseng’eyo kaka wachna obet.

²⁴To pod ageno ni ka Ruoth oyie, to an awuon bende abiro biro iru piyo.

²⁵Aseneno ni ber mondo aornu owadwa Epafrodito bende, ma jatich wadwa ma wasekedogo kaachiel. Osebedo jaoteu mane uoro mondo okonya e gik ma adwaro,

²⁶to en gi siso mar nenou uduto, kendo chunye chandore nikech nuwinjo ni otuo.

²⁷Adier, notuo, mi both otho, to Nyasaye nokeche, to ok en kende ema ne okeche to an bende nokecha, mondo kik abed gi kuyo nyadiriyo.

²⁸Emomiyo adwaro ore ahinya iru, mondo ubed mamor kunene, kendo mondo kuyo ma an-go orum.

²⁹Kuom mano, rwakeuru gi mor maduong’ kaka owadu kuom Ruoth. Miuru joma chal kode kamano duong’,

³⁰nimar nochiwo ngimane mi both otho nikech tich Kristo, mondo okonya gi kony mane un uwegi ok unyal konyago, nikech un mabor koda.