Read luo Jo-Kolosai 3 Bible Online

Jo-Kolosai 3 - luo bible

Jo-Kolosai 3

¹ Osechieru kaachiel gi Kristo ua kuom joma otho, omiyo nyaka uket chunyu kuom gik man malo, kuma Kristo obetie e bat korachwich mar Nyasaye.

²Chomuru parou kuom gik man malo, to ok kuom gik mag piny,

³nikech usetho, kendo ngimau koro osepand gi Kristo kuom Nyasaye.

⁴Kristo e ngimau maradier, kendo ka ochako oduogo, to un bende unubi kode e duong’ne maler.

⁵Emomiyo neguru dhano machon gi timbene duto mag piny ka, kaka terruok, gi dwanyruok, gi hera marach, gi gombo marach, kod ich lach ma en mana lamo nyiseche manono,

⁶nikech weche ma kamago ema miyo Nyasaye olo mirimbe kuom joma otamore yie kuome.

⁷Un bende ne uluwo timbe ma kamago e ngimau machon.

⁸To koro kaka jo-Kristo, nyaka uwe timbego duto, kaka: ichwang’, gi mirima, gi himruok, gi ayany, kod weche mochido.

⁹ Kik ng’ato wuond wadgi, nimar uselonyo dhano machon gi timbene,

¹⁰ mi urwako dhano manyien mamedo doko manyien pile, mondo obed machal gi kit jachwechne, mi omi ung’e Nyasaye chuth.

¹¹E ngimau manyienni, onge ja-Yahudi kata ng’ama ok ja-Yahudi; onge ng’ama oter nyangu kata ng’ama ok oter nyangu. Kendo onge misumba kata ng’ama ni thuolo. Bende onge ng’ama ok osomo gi jamaranda. To Kristo en duto kendo kuom duto.

¹² Emomiyo, kaka Nyasaye oseyierou mondo ubed joge owuon mohero, nyaka ubed gi miwafu, gi ng’wono, gi bolruok, gi muolo kod horuok.

¹³ Beduru jogo ma ng’wono ni joma timonigi marach, to kik ubed joma mako sadha gi jowadgi. Ruoth oseweyonu richou, omiyo un bende nyaka uwe ni joma timonu marach.

¹⁴To ewi mago duto, to beduru gi hera, nikech hera ema riwo gik moko duto bedo achiel chuth.

¹⁵Kue ma Kristo chiwo ema mondo obed jang’ad bura e chunyu, nikech kue nogo ema ne Nyasaye oseluongoue kaachiel e ringruok achiel. Omiyo gouru erokamano mogundho.

¹⁶ Wach Kristo, gi gueth duto mokelo, mondo odag e chunyu. Puonjreuru kendo jiwreuru gi rieko duto. Weruru mamit e chunyu ni Nyasaye, kugoyone erokamano gi wende Zaburi gi wende pak kod wende mag chuny.

¹⁷Gimoro amora ma uwacho kata utimo onego obedi e nying Ruoth Yesu, kugoyoni Nyasaye Wuoro erokamano e nyinge.

¹⁸ Un mon, winjuru chwou, nimar mano e gima joma obedo kuom Ruoth onego tim.

¹⁹ Un chwo, heruru mondu, kendo kik ubed mager kodgi.

²⁰ Un nyithindo, winjuru jonywolu e weche duto, nikech mano ema long’o ni Nyasaye, kendo en gima joma obedo kuom Kristo onego tim.

²¹ Un jonywol, kik ulwer nyithindu, nikech dipo ka chunygi ojok.

²² Un wasumbini bende, winjuru chutho ruodhiu mae pinyni, kendo ka utiyo, to kik uti mana ni mondo ji oneu, ka gima udwaro bedo malong’o ni ji, to keturu chunyu e tichu, nikech uluoro Ruoth

²³Gimoro amora mutimo, to timuru gi chunyu duto, mana ka gima utiyo ni Ruoth, to ok ni dhano,

²⁴kung’eyo ni Ruoth ema nomiu pok mosesingore ni joge, nimar Kristo e Ruoth mutiyone.

²⁵ Ng’at matimo marach kata da bed ni en ng’ama nadi, noyud pok kuom rach mosetimo, nikech Nyasaye yalo ji duto mana machalre, ka ok odewo wang’ ng’ato.