Read luo 1 Jo-Thesalonika 1 Bible Online

1 Jo-Thesalonika 1 - luo bible

1 Jo-Thesalonika 1

¹ An Paulo, kaachiel gi Silvano, kod Timotheo, wandikonu un kanyakla mar jo-Kristo man Thesalonika, ma un jo-Nyasaye Wuoro kod Ruoth Yesu Kristo. Ng’wono gi kue obed kodu.

²Wagoyo ni Nyasaye erokamano ndalo duto nikech un, kendo waluongo nyingu pile e lemowa.

³E nyim Nyasachwa kendo Wuonwa, wiwa ok nyal wil gi timbe ma usetimo nikech yie ma un-go, gi tich matek musetiyo nikech hera ma ungo, kendo gi kinda ma unyisogo ni ugeno kuom Ruodhwa Yesu Kristo.

⁴Wang’eyo, owetewa, ni Nyasaye oherou kendo oseyierou mondo ubed joge owuon,

⁵nikech kane wakelonu Injili, to ne ok wakele mana gi wach mar dhok, to ne wakele gi teko mar Roho Maler, mi uyie chuth. Bende ung’eyo kaka ne wachalo ka ne wan kodu Thesalonika. Adier, ne wabet kamano mana nikech un.

⁶ Ne uluwo timwa kod tim Ruoth bende. To kata obedo ni Injili nokelonu chandruok malit kamano, to ne urwake gi mor ma Roho Maler ochiwo.

⁷Kuom mano, ne udoko ranyisi ni joma oyie duto manie piny Makedonia, kod piny Akaya,

⁸nimar wach Ruoth nolandore kochakore kuomu. Ok nolandore mana e Makedonia gi Akaya kende, to wach yie ma un-go kuom Nyasaye osechopo e it ji kuonde duto. Omiyo koro onge gima onego wawachi,

⁹nikech jogo duto wacho giwegi kaka ne urwakowa kane walimou, kendo kaka ne ulokoru uweyo nyiseche manono mondo uti ni Nyasaye maradier kendo mangima.

¹⁰Bende giwacho kaka koro urito Wuode mondo obi oa e polo. Wuodeno en Yesu, mane ochiero oa kuom joma otho, kendo moresowa kuom mirima mabiro.