Read luo 1 Jo-Thesalonika 5 Bible Online

1 Jo-Thesalonika 5 - luo bible

1 Jo-Thesalonika 5

¹Owetewa, onge tiende ndikonu kuom ndalo kata sa ma gigo notimree,

² nikech ung’eyo maber ni Chieng’ Ruoth nobi mana kaka jakuo biro gotieno,

³ji nobed kawacho ni kue nitie, kendo weche ni kare, to ka diemo wang’ nono masira nopogi, mana kaka muoch poyo dhako man gi ich, kendo ok ginitony kata matin.

⁴To un owetewa, ok un e mudho, ma dimi odiechieng’no pou ka jakuo,

⁵nimar un duto un nyithind ler, kendo nyithind odiechieng’. Ok wan mag otieno, kata mag mudho.

⁶Omiyo kik wanindi kata ji mamoko duto nindo, to wanenuru ka waritore maber.

⁷Joma nindo to nindo gotieno, kendo jomer bende mer gotieno.

⁸ To wan, jogo mag odiechieng’, waritreuru ka waserwako yie gi hera kaka akor mar lweny, kendo ka waserwako geno mar warruok kaka ogut lweny.

⁹Nyasaye ok oseketowa ni mondo okumwa, to oseketowa ni mondo wayud warruok kuom Ruodhwa Yesu Kristo.

¹⁰Kristo ne othonwa ni mondo kata ka wangima, kata watho, to wabed mangima kode.

¹¹Kuom mano, jiwreuru kendo konyreuru, mana kaka koro utimoni.

¹²To wakwayou owetewa, ni mondo uluor jogo matiyonu matek. Gin jotendu kuom Ruoth, kendo gipuonjou.

¹³Migiuru duong’ ahinya, kendo hergiuru nikech tich ma gitiyo. Beduru gi kue e kindu uwegi.

¹⁴Owetewa, wakwayou ni mondo usiem joma budho abudha nono kayiem, kendo uduog chuny joma luor, bende ukony joma yomyom, kendo uhoru mos gi ji duto.

¹⁵Neuru ni onge ng’ato machulo richo kar richo, to ndalo duto temuru mondo utim maber e kindu uwegi, kendo ni ji duto.

¹⁶Beduru mamor pile.

¹⁷Lemuru ma ok uwe,

¹⁸kendo gouru ni Nyasaye erokamano, kata gima nade ema timore, nikech mano e gima Nyasaye dwaro ni mondo utim kaka jo-Kristo.

¹⁹Kik usind Roho tiyo,

²⁰kendo kik ucha weche mag joma hulo wach moa kuom Nyasaye.

²¹Temuru gik ma kamago duto, kendo rituru mabeyo kuomgi,

²²to weuru maricho duto.

²³Nyasaye owuon ma wuon kue mondo omi ubed maler chutho, kendo orit chunyu gi ngimau kod ringreu, mondo ka Ruodhwa Yesu Kristo obiro, to ubed joma onge bura chuth.

²⁴Jal maluongou en jaadiera, kendo enotim kamano.

²⁵Owetewa, wan bende lemnwauru.

²⁶Yogreuru owete duto gi mos mar jo-Nyasaye.

²⁷Achikou matek e nying Ruoth mondo usom baruani ni owete duto.

²⁸Ng’wono mar Ruodhwa Yesu Kristo mondo obed kodu.