Read luo Joshua 1 Bible Online

Joshua 1 - luo bible

Joshua 1

¹Kane Musa jatich Ruoth Nyasaye osetho, Ruoth Nyasaye nowacho ni Joshua wuod Nun, mane jalup Musa niya,

²“Musa jatichna osetho. Omiyo ikri gi jo-Israel duto mondo ung’ad aora Jordan, udhi e piny mamiyou.

³ Kamoro amora ma tiendu onyono, nobed maru, kaka nasingora ni Musa.

⁴Kuonde duto nobed mau, chakre e thim ma yo milambo, nyaka Lebanon yo nyandwat, kendo koa Yufrate, aora maduong’ man yo wuok chieng’, koluwo piny jo-Hiti, nyaka Nam Mediterenia man yo podho chieng’.

⁵ Onge ng’at ma nosiri nyaka chieng’. Anabed kodi kaka nabet gi Musa, Ok naweyi kata jwang’i ok najwang’i.

⁶ Bed gi chir, kendo gi jing’o, nimar in ema nitel ni jogagi, ka gikawo piny mane asingora ni kweregi ni namigi.

⁷To bed mana gi chir, kendo gi jing’o, kiluwo chik duto mane Musa jatichna omiyi. Kik iwe chikno, kibaro koracham kata korachwich, mi inibed gi hawi kuonde duto midhiye.

⁸Kik wiyi wil gi Kitap Chikno, to nyaka isome odiechieng’ gotieno, kendo ine ni iluwo chik duto mondikie. Eka inidongi, kendo noguedh gik moko duto mitimo.

⁹Par kaka asechiki ni mondo ibed gi chir kendo gi jing’o. Kik iluor, kendo kik chunyi nyosre, nikech an Ruoth Nyasaye ma Nyasachi, an kodi kuonde duto midhiye.”

¹⁰Eka Joshua nochiko jotend jo-Israel kowachonigi niya,

¹¹“Wuothuru e kambi duto, kunyiso ji niya, ‘Ikreuru, nimar bang’ ndalo adek ubiro ng’ado aora Jordan, mondo ukaw piny ma Ruoth Nyasaye miyou.’ ”

¹² Joshua nowacho ni jo-Reuben gi jo-Gad kod jo-Manase konchiel niya,

¹³“Paruru gima Musa jatich Ruoth Nyasaye nochikou, kowacho niya, ‘Ruoth Nyasaye ma Nyasachu nomiu pinyni mondo obed kar daku.’

¹⁴Mondu gi nyithindu kod jambu nyalo dong’ e piny mane Musa omiyou yo wuok chieng’ mar aora Jordan, to un jolweny nyaka uidh loka, kutelo e nyim jo-Israel weteu, mondo ukonygi kedo.

¹⁵Ka gin bende gisekawo piny ma Ruoth Nyasaye ma Nyasachu miyogi, kendo gidakie, eka unuduogi, mondo udag e pinyu uwegi man yo wuok chieng mar aora Jordan, mane Musa jatich Nyasaye omiyou.”

¹⁶Ne giduoko Joshua niya, “Wanatim duto michikowa, kendo wanadhi kamoro amora miorowae.

¹⁷Wanawinji kaka ne wawinjo Musa, to Nyasaye mondo obed kodi kaka nobedo gi Musa!

¹⁸Ng’ato ang’ata ma nodagi winjo chikni, kata ma notamre timo gima ichiko, nonegi. Omiyo bed gi chir kendo gi jing’o!”