Read luo Joshua 11 Bible Online

Joshua 11 - luo bible

Joshua 11

¹Kane Jabin ruodh Hazor owinjo wechego duto, nooro wach ni Jobab ruodh Madon kod ruodhi mag Shimron gi Akshaf,

²kod ruodhi mae piny gode ma yo nyandwat, gi holo mar aora Jordan man yo milambo mar Kinereth, kod mae pewe, gi mae piny Dor yo podho chieng’.

³Nooro wach bende ni jo-Kanaan ma yo wuokchieng’ gi ma yo podho chieng’, kendo ni jo-Amor gi jo-Hiti gi jo-Perizi gi jo-Jebus ma nodak e piny gode, kod jo-Hivi ma nodak e tiend got Hermon e piny Mizpa.

⁴Giduto ne giwuok gi jolwenjgi duto. Ne ging’eny ka kuoyo mae dhonam, kendo ne gin gi geche lweny mogundho.

⁵Ruodhigo duto noriwo paro achiel, mi ne gibiro, kendo gijot e dho kuonde motimo thidhiya mag Merom mondo gimonj jo-Israel.

⁶Ruoth Nyasaye nowacho ni Joshua niya, “Kik iluorgi, nimar kiny sa makama nachiwgi e lwet jo-Israel, kendo giduto ginitho, mi ning’ad odond faresegi kendo niwang’ gechegi.”

⁷Kamano Joshua kod jolwenje nopoyogi e dho kuonde motimo thidhiya mag Merom, mi gimwomore kuomgi.

⁸Ruoth Nyasaye nochiwogi e lwet jo-Israel, mi jo-Israel noloyogi, kendo nolawogi yo nyandwat nyaka Sidon Maduong’, kendo yo podho chieng’ nyaka Misrefoth, kendo yo wuok chieng’ nyaka holo mar Mizpa. Ne ginegogi, ma onge kata ng’at achiel ma nodong’ ka ngima.

⁹Joshua nong’ado odond faresegi, kendo nowang’o gechegi, kaka Ruoth Nyasaye nochiko.

¹⁰Eka Joshua nowichore ni Hazor, dala ma noyudo otelo ni pinjego. Jo-Israel nokawe, monego ruodhe.

¹¹Ne ginego gimoro amora mangima mane ni kuno, ma onge gima yueyo manodong’, kendo ne giwang’o dalano.

¹²Kamano Joshua nomako ruodhigo monego, kendo noketho miechgi. Nonego ji duto ma nodak e miego, kendo noketho gik moko duto, kaka Musa jatich Ruoth Nyasaye nosechiko.

¹³To jo-Israel ne ok owang’o mier mane oger ewi pidhe, mak mana Hazor kende ema ne Joshua owang’o.

¹⁴Ne gipeyo dhok, mi giyako gimoro amora mane giyudo e miego, kendo ne ginego ji duto, ma ok giweyo kata ng’at achiel ka yueyo.

¹⁵Ruoth Nyasaye noketo chikene e lwet Musa jatichne, to Musa nomiyogi Joshua, mi Joshua nochopo duto, ma ok oweyo kata chik achiel mane Ruoth Nyasaye omiyo Musa.

¹⁶Joshua nokawo piny gode gi piny milambo duto gi piny Goshen duto, kaachiel kod pewe gi holo mar aora Jordan kod piny gode mag Israel gi pewe mokiewo kode.

¹⁷Lochne nochakore got Halak man but Seir, nyaka Baal-gad e holo mar Lebanon manie tiend got Hermon.

¹⁸Nokedo gi pinjego kuom ndalo mang’eny, nyaka nomako ruodhi maggi duto, monego.

¹⁹Miego duto nokaw gi thwon, ma onge mane otimo winjruok gi jo-Israel mak mana Gibeon mane jo-Hivi odakie.

²⁰ Ruoth Nyasaye nomiyogi chir mar kedo gi jo-Israel mondo jo-Israel oneggi maonge ng’wono, kendo otiekgi chuth, mana kaka Ruoth Nyasaye nosechiko Musa.

²¹E ndalogo ema ne Joshua odhiye piny gode, motieko jo-Anak mane odak Hebron gi Debir gi Anab kendo e piny gode duto mag Juda kod mag Israel. Notiekogi duto, kendo noketho miechgi.

²²Onge jo-Anak ma nodong’ kata achiel e piny mane jo-Israel okawo, mak mana mago ma nodak Gaza gi Gath kod Ashdod.

²³Kamano Joshua nokawo pinyno duto, kochopo chike duto mane Ruoth Nyasaye omiyo Musa. Joshua nomiyo jo-Israel pinyno, kopogo ni dhoot ka dhoot lembe, mi piny nokue.