Read luo Joshua 13 Bible Online

Joshua 13 - luo bible

Joshua 13

¹Joshua koro noseti, kendo hike oniang’, mi Ruoth Nyasaye nowachone niya, “Isedoko jaduong’ moti to piny malach pod odong’ monego kaw.

²Magi e pinje ma pod odong’: Piny jo-Filistia kod piny jo-Geshur duto.”

³(Pinyno duto chakre Shihor yo wuok chieng’ mar Misri, nyaka Ekron yo nyandwat, ikwano ka piny Kanaan. To ruodhi mag jo-Filistia ma nodak Gaza gi Ashdod gi Ashkelon gi Gath kod Ekron ema ne weg pinyno.) “Piny jo-Avim duto

⁴yo milambo, gi piny jo-Kanaan duto, chakre Meara e piny jo-Sidon nyaka Afek gi mbap jo-Amor,

⁵kod piny jo-Gebal gi piny Lebanon duto man yo wuok chieng’ mar Baal-gad manie tiend got Hermon nyaka kama idonjogo Hamath.

⁶ Pinyno oting’o jo-Sidon modak e piny gode, chakre Lebanon nyaka Misrefoth-maim. Anariemb jogo duto mondo oweni jo-Israel thuolo. To pinyno duto ipog ni jo-Israel mondo obed margi, kaka asechiki.

⁷Koro pog pinyni ni dhoudi ochiko kande, kaachiel gi jo-Manase konchiel.”

⁸ Jo-Manase komachielo, kaachiel gi jo-Reuben kod jo-Gad, noseyudo pinje mane Musa jatich Ruoth Nyasaye omiyogi yo wuok chieng’ mar Jordan. Nopogonigi pinyno

⁹chakre Aroer man but holo mar aora Arnon gi piny mopie man e bath holo konchiel kendo noting’o piny pap duto chakre Medeba nyaka Dibon,

¹⁰kod mier duto mag Sihon ruodh jo-Amor ma nodak Heshbon, nyaka mbap jo-Amon.

¹¹Noting’o bende piny Gilead kod piny jo-Geshur gi jo-Maakath kod got Hermon duto gi piny Bashan duto nyaka Saleka.

¹²Piny Bashan noting’o piny Og duto, mane Og orito kodak Ashtaroth gi Edrei. E ndalo mane Musa onegoe jo-Refaim manok ma nodong’, mokawo pinygi, Og kende ema notony.

¹³To jo-Israel ne ok oriembo jo-Geshur gi jo-Maakath, omiyo pod gidak gi jo-Israel nyaka chil kawuono.

¹⁴ Jo-Lawi kende ema ne ok oyudo piny, nimar Ruoth Nyasaye ma Nyasach Israel ema nobedo ka mwandugi, kaka nosesingorenigi.

¹⁵Musa nosepogo piny gi dhout jo-Reuben.

¹⁶Pinygi nochakore Aroer man but holo mar aora Arnon, kod piny mopie manie bath holo konchiel, kendo noting’o piny pap duto nyaka Medeba,

¹⁷gi Heshbon kaachiel gi mier mokiewo kode duto, kod Dibon gi Beth-baal-meon

¹⁸gi Jahaz gi Kedemoth gi Mafaath

¹⁹gi Kiriathaim gi Sibma kod Zereth-shahar e got manie holo,

²⁰gi Beth-peor gi kuonde thidhiya mag got Pisga, gi Beth-jeshimoth

²¹kod mier moko duto mag piny pap, gi piny duto mane Sihon ruodh jo-Amor ma nodak Heshbon orito. Musa nosenego Sihon kaachiel gi Evi gi Rekam gi Zur gi Hur kod Reba mane jodong jo-Midian. Jodongogo nodak e pinyno, ka gin e bwo loch Sihon.

²²Balaam wuod Beor, mane jakor wach, ne en achiel kuom joma jo-Israel nonego.

²³Aora Jordan ema nobedo mbap jo-Reuben. Pinyno kaachiel gi mieche kod mier matindo mokiewo kodgi nobedo mwandu dhout jo-Reuben.

²⁴Bende Musa nopogo piny ni dhout jo-Gad.

²⁵Pinygi ne en Jazer gi miech Gilead duto kod piny jo-Amon konchiel nyaka Aroer man yo wuok chieng’ mar Raba.

²⁶Nochakore Heshbon nyaka Ramoth-mizpe gi Betonim, kendo chakre Mahanaim nyaka mbap Lodeba.

²⁷To pinygi mane nie holo mar aora Jordan noting’o Beth-haram gi Beth-nimra gi Sukoth gi Zafan kod bath piny Sihon ruodh Heshbon modong’. Pinygino ne ni yo wuokchieng’ mar aora Jordan kendo Jordan nyaka Nam Galili nodoko mbape.

²⁸Pinyno kaachiel gi mieche, kod mier matindo mokiewo kodgi nobedo mwandu dhout jo-Gad.

²⁹Kamano bende Musa nopogo piny ni dhout jo-Manase komachielo cha.

³⁰Pinygi nochakore Mahanaim, mokwako piny Og ruodh Bashan duto kod mier piero auchiel mag Jair e Bashan.

³¹Kamano dir Gilead konchiel gi Ashtaroth kod Edrei, ma gin joka Makir wuod Manase, tiende ni dhout joka Makir konchiel.

³²Mago e pinje mane Musa opogo ni dhoudigo e paw Moab, yo wuok chieng’ mar Jordan.

³³ To ne ok opogo ni jo-Lawi piny, nimar Ruoth Nyasaye ma Nyasach Israel nobedo ka mwandugi, kaka nosesingorenigi.